7161. ‘Quod putere fecistis odorem nostrum in oculis Pharaonis et in oculis servorum ejus’: quod significet quod propter illa tanta aversatio sit obsequii nostri omnibus illis qui in falsis sunt, constat ex significatione ‘putere facere’ quod sit aversatio, de qua sequitur; et ex significatione ‘odoris’ quod sit perceptivum grati, de qua n. 925, 1514, 1517-1519, 3577, 4626, ¹ 4628, 4748; et quia odor est perceptivum grati, est perceptivum fidei et charitatis, nam illa sunt grata, n. 1519, 4628, 4748; et quia illa sunt grata, est obsequium gratissimum, nam obsequium est ipsum bonum fidei et charitatis; inde est quod per ‘odorem’ hic significetur obsequium.

[2] Quia odor est id omne quod Domino gratum est, ita putor est id quod Domino ingratum est, proinde est putor aversatio et quoque abominatio; ² etiam putor actualiter correspondet ³ aversationi et abominationi, quae sunt ⁴ falsi et mali; quia putor est id quod aversationis est, ideo quoque in Verbo ⁵ pro aversatione dicitur, ut apud Samuelem, Putidus factus est Israel apud Philistaeos, 1 Sam. 13:4:

apud eundem,

Achischus de Davide, quod putidum faciendo putidum se fecerit in populo suo, in Israele, 1 Sam. 27:12:

apud eundem,

Cum viderent filii Ammonis quod putidi facti essent apud Davidem,

2 Sam. 10:6:

apud eundem,

Achitophel ad Abschalomem, ut audiat universus Israel, quod putidus factus sis apud patrem tuum, 2 Sam. 16:21;

in illis locis ‘putidus’ pro aversatione:

apud Esaiam,

Confossi ⁶ gentium projiciantur, et cadaverum earum ascendat putor, et montes liquescant sanguine, 34:3;

‘putor ⁷ ’ pro malo abominabili; similiter apud Amos 4:10;

et apud Davidem,

Ps. 38:5, 6 [KJV Ps. 38:4, 5].

[3] Quod ‘in oculis Pharaonis et in oculis servorum ejus’ sit in perceptione omnium illorum qui in falsis sunt, constat ex significatione ‘oculorum’ quod sit perceptio, n. 4339; et ex repraesentatione ‘Pharaonis ⁸ ’ quod sint qui in falsis, de qua n. 6651, 6679, 6683, 7107, 7110, 7126, ⁹ 7142. Quod in oculis illorum dicatur fetere odor illorum, est quia omnes qui in falsis et malis sunt aversantur ¹⁰ bona, et vera illis putent.

[4] Quod ¹¹ putor sit illis qui in malis ei inde falsis sunt, patet manifeste ab infernis quae vocantur inferna cadaverosa, ubi sicarii et vindictae tenacissimi, et ¹² ab infernis quae vocantur ¹³ excrementicia, ubi adulteri et qui pro fine habuerunt foedas voluptates; cum aperiuntur illa inferna, exhalantur inde fetores intolerabiles, ¹⁴ n. 4631, sed illi non sentiuntur nisi ab illis quibus interiora, quae sunt spiritus, aperta sunt; sed usque illi qui ¹⁵ in infernis illis sunt putores illos ¹⁶ appercipiunt gratos, et inde amant vivere in fetoribus illis, n. 4628; sunt enim sicut ¹⁷ illa animalia quae in cadaveribus et ¹⁸ excrementis degunt, et ibi ¹⁹ vitae suae jucundum habent; cum ²⁰ illi extra sphaeram fetorum illorum veniunt, odores dulces et grati illis sunt taetri et maxime ingrati; ex his constare potest quomodo intelligendum quod illi qui in falsis sunt tantum aversentur illa quae ²¹ sunt legis Divinae, et ²² inde doctrinae, quae repraesentantur per Moschen et Aharonem, de quibus dicitur ²³ quod ‘fetere fecerint odorem illorum in oculis Pharaonis et in oculis servorum ejus’.

Fußnoten: