¹⁶ ודור רביעי ישובו הנה כי לא־שלם עון האמרי עד־הנה׃

¹ מזמור לדוד בברחו מפני אבשלום בנו׃

² יהוה מה־רבו צרי רבים קמים עלי׃

³ רבים אמרים לנפשי אין ישועתה לו באלהים סלה׃

⁴ ואתה יהוה מגן בעדי כבודי ומרים ראשי׃

⁵ קולי אל־יהוה אקרא ויענני מהר קדשו סלה׃

⁶ אני שכבתי ואישנה הקיצותי כי יהוה יסמכני׃

⁷ לא־אירא מרבבות עם אשר סביב שתו עלי׃

⁸ קומה יהוה הושיעני אלהי כי־הכית את־כל־איבי לחי שני רשעים שברת׃

⁹ ליהוה הישועה על־עמך ברכתך סלה׃