Zawba 31

¹ “Ei moh ta biehraina tao na ta; khazia laihsa pathaihpa ei moh aw?

² Chô Khazohpa tawhta khâpa e tovyuh châ aw ta, Atotaotheipa tawhta khâpa e ei to aw?

³ A sia leipa chôta vâchhiena nata, hmoparaotuhpa châta raona châ vei mâ?

⁴ Châhrasala ei lâpi zy cha hmôpa ta, ei keih chakâna chhao rei ha vei mâ?

⁵ “Haipa lâta chareipa ta. dôveina lâta ei phei ei chakâ parah khiahtala;

⁶ (Pathliana dopa ta pathliapa châ sala, ei dona kyh he Khazohpa ta a pahno theina awpa ta!)

⁷ ei phei cha lâpi tawhta paviapa châ sala, ei mo hmôna hawhta ei palôh a sie hrapa châ tlôh, ei kuzy liana he a vyhpa rai a bai khiahta cha;

⁸ ei hiepa cha mo hropa ta nie mawh sy; a vaw pyupa cha a thari chhaota chakhiapa châ sala.

⁹ “Ei palôh ta chanô a reipasao khiahta nahta. ei opah ochhi kao liata a byhpa ei châ khiah cha;

¹⁰ ei lahpinô chata chyhsa sâh daih sala, a hropazy cha a hmiakô ta a bôh mawh ei sy.

¹¹ Cha cha molei pasi a chhih ngaitapa a châ; cha cha moleina taotuhpa ryureipa ta a hrie awpa cha a châ;

¹² Abadon lâta tlô khaina taihta kâpa mei a châ aw, ei sôh zydua chhao a kâ pamo khai aw.

¹³ “Ei seichanô ma, ei seichapaw ma, ei chôta ama palôhtlâh leina ei pachâ lei raruah khiah cha;

¹⁴ Khazohpa a vaw thyu tina cha khâpa e ei tao aw? Hiahrina a vaw tao tita, kheihta e ei chhy aw?

¹⁵ Chhi chhôh liata kei na taotuhpa khata ano cha tao hra vei mâ? Chhi chhôh liata na taotuhpa kha anano rai ma?

¹⁶ “Sipasapa zy khopa ei pakhâ khiah cha, nôhmeizy hnabei ei pady khiah cha,

¹⁷ ei pati keima deita niepa ta, paw hnei leipazy ama nie hra tlôh vei khiah cha,

¹⁸ (a thyutlia tawhta paw hawhta pasa na ta, a nô chhi tawhta ei vaih);

¹⁹ ahyrai chysia leipa ta leidiapa hmô sala, chyhsa rietheipa a bupa a hnei leipa tlyma;

²⁰ a chai ta byhnâ awpa leipa a châ khiahta cha, ei mietahkupa hmi ta palalôhpa a châ vei khiahta cha;

²¹ ochhi kao liana cha chyhsa zy keima chhâ châpa ei hmô vâta; paw hnei leipa chô ta ei ku ei pathlâ khiah cha;

²² ei ngiatlâh he ei phiahkao nata a chhaih pathla ha sala, ei bâh he ei kokaru tawhta tlô ha mawh sy.

²³ Khazohpa tawhta chichhihna kyh cha ei chi kawpa vâta, a rôhnahna cha moh ngâh aw va na.

²⁴ “Ngôh cha ei lôbôna châta hmâpa ta. ngôhsuapa cha ei ngiapâpa ta raopa ta;

²⁵ ei hneirôhpa vâta aly aw sala, ei ku ta a hluhpi a hria papuapa vâta;

²⁶ noh khih a khai nota nata thlahpa a rôhnahna ta a sie ngâpa lâ mopa ta,

²⁷ ei palôhrupa he a ru lâta reipasaopa châ sala, ei ku chhao a chhy awpa ta ei chalua khiah cha.

²⁸ cha chhao cha ryureituhpa zy hrie thlyu awpa ta moleina a châ, chô Khazohpa lâta a haipa ei châ ha awpa vâta.

²⁹ “Nâ haotuhpa zy raona kyh liata alypa châ sala, hmopha leipa ta a tlathlu nota alypa chhao,

³⁰ (a hrona kyh liata chhiesa awpa ta ei pakah cha pasaih va na);

³¹ ei poh-o liata chyhsa zy chata, ‘A sabia liata a lôhrâ a tlô leipa ahy e a y? ‘ama tah mâ tâh.

³² Khitlyhpa cha ngiathliah liata a rie leipa ta; a tly kiahpa chata ochhi ei pahypa tyh vâta.

³³ ei hmoparaona cha chyhsa zy hawhta ei nyu khiahta cha ei kalachhôh liata moleina a nyupa châ aw na ta,

³⁴ zawpi a chi ngaitapa hryta a ypa ei châ vâta nata chhôhkha a mohnaotuhpa châpa ei chipa vâta, cha hawhpa vâta a chalihpa ta, khô pua leipa ta.

³⁵ Aw, ei boh nawpa ta na pahnokheituhpa y tlai ei sala! Atotaotheipa ta ei thâtih cha pachia sy! Aw, nâ dyuhtuhpa ta eina leihna ropa ei hnei mawh sala; a chalih leipa aw na ta, ochhôh liata y hra aw va na.

³⁶ Ei ngiatlâh ta a pu tlai aw na ta; lakho hawhta ei kho awpa tlai;

³⁷ ei hro noh thâtih a kipa ta chho aw na ta; abeisaw riahpha kawpa hawhta ano eih pangai awpa tlai.

³⁸ “Ei râh cha nâ haotuhpa ta awsaopa ta châ ta, alei paliena tihry zy ama cha pakhy khiahta cha;

³⁹ a mâ pie leipa ta a theilâpa zy a niepa ei châ khiah cha, a hneituhpa hro pahleipa châ aw na ta;

⁴⁰ sa vyuhpa ta ahloh zy tlao pyuh sala,bali sâh vyuhpa ta sibiepa rupa pyuh mawh sy,” tah ta. Zawba biezy cha a chhâ haw.