Zawba 31

Studie

          |

1 “Ei moh ta biehraina tao na ta; khazia laihsa pathaihpa ei moh aw?

2 Chô Khazohpa tawhta khâpa e tovyuh châ aw ta, Atotaotheipa tawhta khâpa e ei to aw?

3 A sia leipa chôta vâchhiena nata, hmoparaotuhpa châta raona châ vei mâ?

4 Châhrasala ei lâpi zy cha hmôpa ta, ei keih chakâna chhao rei ha vei mâ?

5 “Haipa lâta chareipa ta. dôveina lâta ei phei ei chakâ parah khiahtala;

6 (Pathliana dopa ta pathliapa châ sala, ei dona kyh he Khazohpa ta a pahno theina awpa ta!)

7 ei phei cha lâpi tawhta paviapa châ sala, ei mo hmôna hawhta ei palôh a sie hrapa châ tlôh, ei kuzy liana he a vyhpa rai a bai khiahta cha;

8 ei hiepa cha mo hropa ta nie mawh sy; a vaw pyupa cha a thari chhaota chakhiapa châ sala.

9 “Ei palôh ta chanô a reipasao khiahta nahta. ei opah ochhi kao liata a byhpa ei châ khiah cha;

10 ei lahpinô chata chyhsa sâh daih sala, a hropazy cha a hmiakô ta a bôh mawh ei sy.

11 Cha cha molei pasi a chhih ngaitapa a châ; cha cha moleina taotuhpa ryureipa ta a hrie awpa cha a châ;

12 Abadon lâta tlô khaina taihta kâpa mei a châ aw, ei sôh zydua chhao a kâ pamo khai aw.

13 “Ei seichanô ma, ei seichapaw ma, ei chôta ama palôhtlâh leina ei pachâ lei raruah khiah cha;

14 Khazohpa a vaw thyu tina cha khâpa e ei tao aw? Hiahrina a vaw tao tita, kheihta e ei chhy aw?

15 Chhi chhôh liata kei na taotuhpa khata ano cha tao hra vei mâ? Chhi chhôh liata na taotuhpa kha anano rai ma?

16 “Sipasapa zy khopa ei pakhâ khiah cha, nôhmeizy hnabei ei pady khiah cha,

17 ei pati keima deita niepa ta, paw hnei leipazy ama nie hra tlôh vei khiah cha,

18 (a thyutlia tawhta paw hawhta pasa na ta, a nô chhi tawhta ei vaih);

19 ahyrai chysia leipa ta leidiapa hmô sala, chyhsa rietheipa a bupa a hnei leipa tlyma;

20 a chai ta byhnâ awpa leipa a châ khiahta cha, ei mietahkupa hmi ta palalôhpa a châ vei khiahta cha;

21 ochhi kao liana cha chyhsa zy keima chhâ châpa ei hmô vâta; paw hnei leipa chô ta ei ku ei pathlâ khiah cha;

22 ei ngiatlâh he ei phiahkao nata a chhaih pathla ha sala, ei bâh he ei kokaru tawhta tlô ha mawh sy.

23 Khazohpa tawhta chichhihna kyh cha ei chi kawpa vâta, a rôhnahna cha moh ngâh aw va na.

24 “Ngôh cha ei lôbôna châta hmâpa ta. ngôhsuapa cha ei ngiapâpa ta raopa ta;

25 ei hneirôhpa vâta aly aw sala, ei ku ta a hluhpi a hria papuapa vâta;

26 noh khih a khai nota nata thlahpa a rôhnahna ta a sie ngâpa lâ mopa ta,

27 ei palôhrupa he a ru lâta reipasaopa châ sala, ei ku chhao a chhy awpa ta ei chalua khiah cha.

28 cha chhao cha ryureituhpa zy hrie thlyu awpa ta moleina a châ, chô Khazohpa lâta a haipa ei châ ha awpa vâta.

29 “Nâ haotuhpa zy raona kyh liata alypa châ sala, hmopha leipa ta a tlathlu nota alypa chhao,

30 (a hrona kyh liata chhiesa awpa ta ei pakah cha pasaih va na);

31 ei poh-o liata chyhsa zy chata, ‘A sabia liata a lôhrâ a tlô leipa ahy e a y? ‘ama tah mâ tâh.

32 Khitlyhpa cha ngiathliah liata a rie leipa ta; a tly kiahpa chata ochhi ei pahypa tyh vâta.

33 ei hmoparaona cha chyhsa zy hawhta ei nyu khiahta cha ei kalachhôh liata moleina a nyupa châ aw na ta,

34 zawpi a chi ngaitapa hryta a ypa ei châ vâta nata chhôhkha a mohnaotuhpa châpa ei chipa vâta, cha hawhpa vâta a chalihpa ta, khô pua leipa ta.

35 Aw, ei boh nawpa ta na pahnokheituhpa y tlai ei sala! Atotaotheipa ta ei thâtih cha pachia sy! Aw, nâ dyuhtuhpa ta eina leihna ropa ei hnei mawh sala; a chalih leipa aw na ta, ochhôh liata y hra aw va na.

36 Ei ngiatlâh ta a pu tlai aw na ta; lakho hawhta ei kho awpa tlai;

37 ei hro noh thâtih a kipa ta chho aw na ta; abeisaw riahpha kawpa hawhta ano eih pangai awpa tlai.

38 “Ei râh cha nâ haotuhpa ta awsaopa ta châ ta, alei paliena tihry zy ama cha pakhy khiahta cha;

39 a mâ pie leipa ta a theilâpa zy a niepa ei châ khiah cha, a hneituhpa hro pahleipa châ aw na ta;

40 sa vyuhpa ta ahloh zy tlao pyuh sala,bali sâh vyuhpa ta sibiepa rupa pyuh mawh sy,” tah ta. Zawba biezy cha a chhâ haw.