2 Thatihzy Rona 24

¹ Zôasha cha a bei tua no ta kô saripa châ ta, Zerusale liata kô sari a bei ta; ano nô moh cha Zibiah, Besheba chyhsa a châ.

² Zôasha chata theihthaipa Zehôida hro chhôh ta ABEIPA mohmô liata hmo phapa tao ta.

³ Zehôida chata lahpinô pano hiapa ta, sawchanô zy nata sawchapaw zy sa ta.

⁴ Cha khai nata Zôasha chata ABEIPA o tao pathi awpa a chhuah ta.

⁵ Theihthaipa zy nata Livai sahlao aw pakhy ta, “Zudah sahlao khih zy lâta sie ula, kô chareih ta nama Khazohpa o sa pathi nawpa ta Izarel chyhsa zydua lâta tâkâ khei teh u; a parah teh u,” tah ta. Châhrasala Livai mozy cha a parah leipa ei ta.

⁶ Chatawhcha abeipa chata theihthaipa beichaipa Zehôida cha aw ta, a hnohta, “Khazia Livai mozy cha ABEIPA chakaotuhpa Mawsi nata Izarel zawpi zy raopa pahnosana poh-o châta hria awpa a raopa cha Zudah mo nata Zerusale liata a ypa zy hria awpa ta chhie ama vaw cheih vei?” tah ta.

⁷ Moleipa chanô Athaliah sawchapawpa zy chata Khazohpa o cha parao haw tlôh ei ta; ABEIPA o liata hmohlâpa zydua cha Baal pie haw tlôh ei ta.

⁸ Chatanachata abeipa ta biepie ta, byh tao ei ta, ABEIPA o chhikao khôtho lâna chata soh ei ta.

⁹ Chatawhcha râhpathohpa liata Khazohpa chakaotuhpa Mawsi ta Izarel chyhsa zy tao awpa ta chhie a raopa cha ABEIPA châta vaw thyu awpa ta Zudah râh zydua nata Zerusale liata pathâhsa ei ta.

¹⁰ Molaipa zy nata zawpi zy cha aly kaw ei ta, ama tâkâzy vaw cheih ei ta, ama khei khai hlâ lei cha byh liana chata thata vaw soh ei ta.

¹¹ Chatawhcha Livai sahlao ta abeipa pawhrâhpa zy lâta byh cha vaw cheihpa ta, tâkâ hluhpi a y tahpa ama pahno nahta beipa chârohtuhpa nata theihthaipa beipa a raopa pawhrâhpa châta byh tawhtapa cha thaoh ei ta, la ei ta, a su liata soh ei ta. Cha hawhna chata nohchareih tao ei ta, tâkâ cha a hluhpi pachô ei ta.

¹² Chatawhcha abeipa nata Zehôida chata ABEIPA o raihriatuhpa zy kyh liata pie ei ta, ABEIPA o taopathi heih nawpa ta, alô a daihtuhpa zy nata zôthaipa zy chhao.

¹³ Chatanachata raihriatuhpa zy chata hria ei ta, a phapa ta hria ei ta, Khazohpa o cha a ualua ta tao pathi ei ta, â ipa ta padua haw hei ei ta.

¹⁴ Chatawhcha ama paloh nahta tâkâ a laipa zydua cha abeipa nata Zehôida lâta vaw cheih ei ta, cha chata ABEIPA o liata chakao nawpa ta hmobaoh zy, hlâna hmobaoh zy, thua phiathla zy, ngôh nata tâkâri hmobaoh zy taihta tao ei ta. Chatanachata Zehôida hro chhôh cha ABEIPA o liata raopa hlâna cha hlâ tyh ei ta.

¹⁵ Châhrasala Zehôida cha pawpi ngaitapa chhâ a palopa ta thi ta; a thi no ta kô za kha nata sythôhpa a châ.

¹⁶ Izarel zy hry liata Khazohpa chô liata nata a o kyh liata hmo phapa a taopa vâta Davi khihpi liata abeizy hry liata pabu ei ta.

¹⁷ Zehôida thi tawhna chata Zudah molaipa zy cha vaw pua ei ta, abeipa a vaw naoh ei ta; abeipa chata ama bie cha a vaw pyh ta.

¹⁸ Chatanachata ama mahpaw zy Khazohpa ABEIPA o cha a heisai ei ta, Ashera zy nata khazoh nohthlahpa zy chakao haw ei ta, ama moleina vâta Zudah zy nata Zerusale chô liata pathi-iana vaw tlô haw ta.

¹⁹ Châhrasala ABEIPA lâta a chhi heih awpa ta ama hnohta hrohsopa zy tuah ta; ama thai leizie zy pahnosa ei ta, châhrasala nahthlie khoh hlei veih ei.

²⁰ Chatawhcha theihthaipa Zehôida sawchapawpa Zekaria chô liata Khazohpa Thlahpa vaw tlô ta; ano cha zawpi chô lâta a duah ta, ama hnohta, “Khazohpa ta he tana heta a tah, ‘Khazia thlao chhi thei leina taihta ABEIPA biepiepa cha nama parao? ABEIPA cha namâ heisaipa vâta ano chhaota a châ heisai ei,’” tahpa ta.

²¹ Chatawhcha ano lâta bie parao ei ta, abeipa bie piepa ta ABEIPA achhyna-o dôhpachhôh liana chata alô ta vaw sao haw ei ta.

²² Châhrasala Abei Zôasha chata Zekaria paw Zehôida ngiachhiena cha a thei thlâh ha leipa ta, a sawchapawpa cha a thi haw. Chatawhcha a thi chy ta, “ABEIPA ta hmô aw ta, phuh a vaw la aw!” tah ta.

²³ Kô chhâna lâta Suria pheisaih zy ta a vaw dyuh ei ta. Zudah râh nata Zerusale liata a ngia ei ta, ama molaipa zydua cha pahleipadiapa ei ta, Damaska beipa lâta ama hraona sôh zydua paphao khai haw ei ta.

²⁴ Suria pheisaih zy cha a chyta deita vaw thyu hra ei sala ama mahpaw zy Khazohpa ABEIPA cha ama heisaipa vâta ABEIPA ta pheisaih hluhpi zy cha ama ku liata a pie. Cha hawhna chata Zôasha chô liata hriena a patlôsa.

²⁵ Chatawhcha Suria sahlao chata pasana ru ngaitapa taopa ta kuasai ei ta, ano chyhsa zy tlaita theihthaipa Zehôida sawchapawpa thisaih vâna khata tei ei ta, rakhô liata a zia thlâh ha no ta thie ei ta. Thi haw ta; Davi khihpi liana chata pabu ei ta, châhrasala abeizy thlâ liata pabu veih ei.

²⁶ Hezy he ano a teituhpa zy cha ama châ, Amawna chyhsa Shimia sawchapawpa Zaba nata Môaba chanô Shimri sawchapawpa Zehôzaba.

²⁷ A sawchapawpa zy kyh zy, cha a chô liata phaohri ngaitapa a hniehpa kyh zy, Khazohpa o a phapa ta a paduana kyh zy cha Abei thâtih chhopasiana Châbu liana chata a rohpa a châ. Chatawhcha ano vyuhpa ta Amaziah cha a bei haw ta.