2 Thatihzy Rona 24

Studie

  

1 Zôasha cha a bei tua no ta kô saripa châ ta, Zerusale liata kô sari a bei ta; ano nô moh cha Zibiah, Besheba chyhsa a châ.

2 Zôasha chata theihthaipa Zehôida hro chhôh ta ABEIPA mohmô liata hmo phapa tao ta.

3 Zehôida chata lahpinô pano hiapa ta, sawchanô zy nata sawchapaw zy sa ta.

4 Cha khai nata Zôasha chata ABEIPA o tao pathi awpa a chhuah ta.

5 Theihthaipa zy nata Livai sahlao aw pakhy ta, “Zudah sahlao khih zy lâta sie ula, kô chareih ta nama Khazohpa o sa pathi nawpa ta Izarel chyhsa zydua lâta tâkâ khei teh u; a parah teh u,” tah ta. Châhrasala Livai mozy cha a parah leipa ei ta.

6 Chatawhcha abeipa chata theihthaipa beichaipa Zehôida cha aw ta, a hnohta, “Khazia Livai mozy cha ABEIPA chakaotuhpa Mawsi nata Izarel zawpi zy raopa pahnosana poh-o châta hria awpa a raopa cha Zudah mo nata Zerusale liata a ypa zy hria awpa ta chhie ama vaw cheih vei?” tah ta.

7 Moleipa chanô Athaliah sawchapawpa zy chata Khazohpa o cha parao haw tlôh ei ta; ABEIPA o liata hmohlâpa zydua cha Baal pie haw tlôh ei ta.

8 Chatanachata abeipa ta biepie ta, byh tao ei ta, ABEIPA o chhikao khôtho lâna chata soh ei ta.

9 Chatawhcha râhpathohpa liata Khazohpa chakaotuhpa Mawsi ta Izarel chyhsa zy tao awpa ta chhie a raopa cha ABEIPA châta vaw thyu awpa ta Zudah râh zydua nata Zerusale liata pathâhsa ei ta.

10 Molaipa zy nata zawpi zy cha aly kaw ei ta, ama tâkâzy vaw cheih ei ta, ama khei khai hlâ lei cha byh liana chata thata vaw soh ei ta.

11 Chatawhcha Livai sahlao ta abeipa pawhrâhpa zy lâta byh cha vaw cheihpa ta, tâkâ hluhpi a y tahpa ama pahno nahta beipa chârohtuhpa nata theihthaipa beipa a raopa pawhrâhpa châta byh tawhtapa cha thaoh ei ta, la ei ta, a su liata soh ei ta. Cha hawhna chata nohchareih tao ei ta, tâkâ cha a hluhpi pachô ei ta.

12 Chatawhcha abeipa nata Zehôida chata ABEIPA o raihriatuhpa zy kyh liata pie ei ta, ABEIPA o taopathi heih nawpa ta, alô a daihtuhpa zy nata zôthaipa zy chhao.

13 Chatanachata raihriatuhpa zy chata hria ei ta, a phapa ta hria ei ta, Khazohpa o cha a ualua ta tao pathi ei ta, â ipa ta padua haw hei ei ta.

14 Chatawhcha ama paloh nahta tâkâ a laipa zydua cha abeipa nata Zehôida lâta vaw cheih ei ta, cha chata ABEIPA o liata chakao nawpa ta hmobaoh zy, hlâna hmobaoh zy, thua phiathla zy, ngôh nata tâkâri hmobaoh zy taihta tao ei ta. Chatanachata Zehôida hro chhôh cha ABEIPA o liata raopa hlâna cha hlâ tyh ei ta.

15 Châhrasala Zehôida cha pawpi ngaitapa chhâ a palopa ta thi ta; a thi no ta kô za kha nata sythôhpa a châ.

16 Izarel zy hry liata Khazohpa chô liata nata a o kyh liata hmo phapa a taopa vâta Davi khihpi liata abeizy hry liata pabu ei ta.

17 Zehôida thi tawhna chata Zudah molaipa zy cha vaw pua ei ta, abeipa a vaw naoh ei ta; abeipa chata ama bie cha a vaw pyh ta.

18 Chatanachata ama mahpaw zy Khazohpa ABEIPA o cha a heisai ei ta, Ashera zy nata khazoh nohthlahpa zy chakao haw ei ta, ama moleina vâta Zudah zy nata Zerusale chô liata pathi-iana vaw tlô haw ta.

19 Châhrasala ABEIPA lâta a chhi heih awpa ta ama hnohta hrohsopa zy tuah ta; ama thai leizie zy pahnosa ei ta, châhrasala nahthlie khoh hlei veih ei.

20 Chatawhcha theihthaipa Zehôida sawchapawpa Zekaria chô liata Khazohpa Thlahpa vaw tlô ta; ano cha zawpi chô lâta a duah ta, ama hnohta, “Khazohpa ta he tana heta a tah, ‘Khazia thlao chhi thei leina taihta ABEIPA biepiepa cha nama parao? ABEIPA cha namâ heisaipa vâta ano chhaota a châ heisai ei,’” tahpa ta.

21 Chatawhcha ano lâta bie parao ei ta, abeipa bie piepa ta ABEIPA achhyna-o dôhpachhôh liana chata alô ta vaw sao haw ei ta.

22 Châhrasala Abei Zôasha chata Zekaria paw Zehôida ngiachhiena cha a thei thlâh ha leipa ta, a sawchapawpa cha a thi haw. Chatawhcha a thi chy ta, “ABEIPA ta hmô aw ta, phuh a vaw la aw!” tah ta.

23 Kô chhâna lâta Suria pheisaih zy ta a vaw dyuh ei ta. Zudah râh nata Zerusale liata a ngia ei ta, ama molaipa zydua cha pahleipadiapa ei ta, Damaska beipa lâta ama hraona sôh zydua paphao khai haw ei ta.

24 Suria pheisaih zy cha a chyta deita vaw thyu hra ei sala ama mahpaw zy Khazohpa ABEIPA cha ama heisaipa vâta ABEIPA ta pheisaih hluhpi zy cha ama ku liata a pie. Cha hawhna chata Zôasha chô liata hriena a patlôsa.

25 Chatawhcha Suria sahlao chata pasana ru ngaitapa taopa ta kuasai ei ta, ano chyhsa zy tlaita theihthaipa Zehôida sawchapawpa thisaih vâna khata tei ei ta, rakhô liata a zia thlâh ha no ta thie ei ta. Thi haw ta; Davi khihpi liana chata pabu ei ta, châhrasala abeizy thlâ liata pabu veih ei.

26 Hezy he ano a teituhpa zy cha ama châ, Amawna chyhsa Shimia sawchapawpa Zaba nata Môaba chanô Shimri sawchapawpa Zehôzaba.

27 A sawchapawpa zy kyh zy, cha a chô liata phaohri ngaitapa a hniehpa kyh zy, Khazohpa o a phapa ta a paduana kyh zy cha Abei thâtih chhopasiana Châbu liana chata a rohpa a châ. Chatawhcha ano vyuhpa ta Amaziah cha a bei haw ta.