Arcana Coelestia # 574
574. Quod ‘caro’ significet quod homo corporeus factus, constat ex significatione ‘carnis’ in Verbo, ubi tam pro omni homine in genere quam pro corporeo in specie sumitur; pro omni homine, apud Joelem,
Effundam spiritum Meum super omnem carnem, et prophetabunt filii vestri, et filiae vestrae, Joel 3:1;
‘caro’ pro homine, ‘spiritus’ pro influxu veri et boni a Domino:
apud Davidem,
Audiens preces, usque ad Te omnis caro venient, Ps. 65:3 [KJV Ps. 65:2];
pro omni homine:
apud Jeremiam,
Maledictus is vir, qui confidet in homine, et ponet carnem brachium suum, 17:5;
‘caro’ pro homine, ‘brachium’ pro potentia:
[2] apud Ezechielem,
Et 1 scient omnis caro, 21:4, 5:
apud Zachariam, Sile omnis caro coram Jehovah, ii 17; pro omni homine. Pro corporeo in specie:
apud Esaiam,
Aegyptius homo, et non Deus; et equi ejus caro, et non spiritus, 31:3;
pro quod scientificum eorum sit corporeum; ‘equi’ hic et alibi in Verbo pro rationali:
apud eundem,
Recidet 2 ad dextram et esuriet, et comedet ad sinistram, et non saturabuntur, quisque carnem brachii sui comedent, Esai. 9:19 [KJV 20];
pro propriis quae omnia sunt corporea:
apud eundem,
Ab anima et usque carnem consumet, 10:18;
‘caro’ pro corporeis:
apud eundem,
Revelabitur gloria Jehovae, et videbunt omnis caro simul, ... vox dicit, Clama, et dixit, Quid clamabo? omnis ea caro gramen, 40:5, 6;
[3] ‘caro’ pro omni homine qui corporeus:
apud eundem,
In igne Jehovah disceptabit, et gladio Suo cum omni carne, et multiplicabuntur confossi Jehovae, 66:16;
‘ignis’ pro punitione cupiditatum, ‘gladius’ pro punitione falsitatum, ‘caro’ pro hominis corporeis:
apud Davidem,
Deus recordatus, quod caro illi, spiritus vadens, ut non reverteretur, Ps. 78:39;
de populo in deserto desiderante carnem, quod corporei; qui quod desideraverint carnem, repraesentabat quod solum corporea cuperent, Num. 11:32-34.
Poznámky pod čarou: