8906. ‘Non furaberis’: quod significet quod non alicui ejus bona spiritualia auferenda sint, et quod sibi non tribuenda quae Domini sunt, constat ex significatione 'furari' quod sit ¹ auferre alicui bona spiritualia; quod haec per ‘furari’ significentur, est quia divitiae et opes in spirituali sensu sunt cognitiones boni et veri, in genere omnia illa quae fidei et charitatis, hoc est, quae vitae spiritualis apud hominem sunt, quapropter illa alicui auferre est in sensu spirituali ‘furari’; et quia omnia bona spiritualia, hoc est, omnia fidei et charitatis, sunt unice a Domino et prorsus nihil ab homine, idcirco per ‘furari’ etiam significatur sibi tribuere quae Domini sunt; qui hoc faciunt vocantur etiam ² ‘fures’ et ‘praedones’ apud Johannem, Amen dico vobis, Qui non ³ ingrediens est per januam in caulam ovium, sed ‘ascendit’ aliunde, is est fur et latro; qui vero ingrediens est per januam, pastor est ovium; Ego sum janua [ovium; omnes qui ante Me fuerunt, fures fuerunt et latrones fuerunt, sed non, audiverunt illos oves. Ego sum janua] per Me si quis introiverit, salvabitur, et ingredietur et egredietur, et pascuum inveniet; fur non venit nisi ut furetur et mactet et perdat; Ego veni ut vitam habeant, et abundantiam habeant, 10:1-13;

‘ingredi per januam in caulam ovium’ est per Dominum, nam Dominus est ‘janua’, ut Ipse dicit; ‘oves’ sunt qui in charitate et inde in fide; hi per ‘Dominum’ ingrediuntur cum agnoscunt quod ab Ipso omne fidei et charitatis, nam haec tunc ab Ipso influunt ⁴ ; at aliis tribuere illa, imprimis sibi, est auferre illa, ita ‘mactare et perdere’; qui ⁵ sibimetipsis tribuunt illa quae Domini sunt, etiam in operibus ponunt meritum, et semet ⁶ faciunt justitiam, de quibus n. 1110 ⁷ , 1877, 2027, 2273, 2340, 2373, 2400, 3816, 4007 fin. , 4174, 4943, 6388-6390, 6392, 6393, ⁸ 6478; hoc nunc est ‘furari’ in ⁹ spirituali sensu, et hoc obvenit angelis in caelo cum ab homine legitur in Verbo ‘furari’, nam angeli Verbum non nisi quam spiritualiter intelligunt ¹⁰ .

[2] Simile per ‘furari’ significatur ¹¹ apud Hoscheam, Quando sanavi Israelem, tunc revelata est iniquitas Ephraimi, et mala Samariae, quia fecerunt mendacium, et fur venit, diffundit se turma foras; ¹² nunc circumdant illos opera illorum coram faciebus Meis; per malitiam suam laetificant regem, et per mendacia sua principes, 7:1-3:

et apud Joelem,

Venit dies Jehovae, ante eum comedit ignis, et post eum inflammat flamma, sicut hortus Eden terra ante eum, sed post eum desertum vastitatis; sicut aspectus equorum aspectus illius, et sicut equites ita currunt, sicut sonitus curruum super verticibus montium; in urbe discurrunt, in muro currunt, in domos ascendunt, per fenestras ingrediuntur sicut fur; coram illo commota est terra, contremuerunt caeli, sol et luna atrati sunt, et stellae contraxerunt splendorem, 2:1-10;

agitur ibi de Ecclesiae desolatione, cum falsa irrumpunt et destruunt vera; falsa haec ¹³ sunt ‘fures qui ascendunt domos et per fenestras ingrediuntur’; quis non miraturus est cur dicitur quod ‘dies Jehovae erit sicut aspectus equorum’ et quod tunc ‘sicut equites [ita] current, in urbe discurrent, in muro current, in domos ascendent, per fenestras ingredientur, commovebitur terra, contremiscent caeli, atrabuntur sol et luna, et contrahent splendorem stellae?’ qui non de sensu interno aliquid scit, et qui in corde suo sanctitatem Verbi in dubium vocat, is dicet quod haec solum voces sint absque Divino inibi recondito, et forte vocabit ¹⁴ dictiones inanes; at qui credit quod Verbum sanctissimum sit, quia Divinum, et insuper qui novit quod sensus internus sit, qui agit de Ecclesia, de caelo, deque Ipso Domino, ¹⁵ is fatebitur quod singulae voces ibi singula pondera sint; quid itaque voces et dictiones ibi significant, paucis explicandum:

[3] ‘dies Jehovae’ est ultimus status seu ultimum tempus' Ecclesiae, cum ‘non amplius’ verum sed loco veri falsum, ignis qui ante eum comedit ¹⁶ est mali cupido, ‘flamma quae post eum [inflammabit]’ est falsi cupido inde, ‘aspectus equorum’ est intellectuale ratiocinans ex falso sicut ex vero, ‘equites qui currunt ¹⁷ ’ sunt ratiocinatores, ‘currus’ sunt doctrinalia falsi, ‘urbs’ est ipsa doctrina, ‘murus in quo currunt’ est essentiale falsum, ‘domus quas ascendent’ est voluntarium hominis, ‘fenestrae per quas ingredientur’ sunt intellectualia, ‘fur’ est falsum quod aufert verum, terra quae coram illo commovebitur' est Ecclesia, etiam ‘caeli qui contremiscent’, ‘sol’ est amor in Dominum, ‘luna’ est fides in Ipsum, illa ‘atrari’ dicuntur cum ‘non amplius’ apparent, ‘stellae’ sunt cognitiones boni et veri quae non amplius ex fide et amore, ita e caelo, lucem habebunt, quod est ‘contrahere splendorem’; ex his constare potest quid haec in communi involvunt, tum in quo sensu dies ille, seu ¹⁸ ultimus status Ecclesiae dicitur ‘fur qui ascendet domos et ingredietur per fenestras’, quod nempe sit falsum quod tunc ¹⁹ occupabit totum hominem, tam ejus voluntarium quam ejus intellectuale, et sic auferet omne verum et bonum. Simile per ‘furem’ significatur apud Obadiam,

Dixit Dominus Jehovih Edomo, Si fures venerint tibi, si eversores noctu, quomodo excisus eris? nonne furabuntur quod illis satis? vers. [1, ] 5:

similiter per ‘furem’ seu ‘furantem’, Sach. 5:1-4: ²⁰ 50:17-19 [KJV 50:18-20]; ²¹ Matth. 6:19, 20.

[4] Sicut omnia statuta a Domino mandata filiis Israelis fundata sunt in legibus ordinis quae in caelo, hoc est, existentiam et essentiam suam traxerunt e mundo spirituali, idcirco etiam illa quae de furtis lata sunt; sicut quod Qui furatus bovem et vendens, quinque rependet, si pecudem quattuor, Exod. 21:37 ²² [KJV Exod. 21:22:1]:

tum, Fur in perfossione percussus, ²³ non sanguis; orto autem ²⁴ sole sanguis, fur rependet vel vendetur; si invenitur in manu ejus, restituet duplum, Exod. 22:1-3 [KJV Exod. 22:2-4]:

Qui furatus fuerit virum eumque vendiderit, sed inventus fuerit in manu ejus, moriendo morietur, Exod. 21:16: Si inventus ²⁵ vir qui furatus ²⁶ fuerit animam de fratribus suis, de filiis Israelis, et quaestum fecerit in eo, dum vendiderit eum, occidetur fur hic, ut removeas malum e medio tui, Deut. 24:7;

‘viri ex filiis Israelis’ in sensu interno sunt qui in veris et bonis fidei, ita in sensu abstracto sunt fidei vera et bona, n. 5414, 5879, 5951, quare ‘furari virum ex filiis Israelis’ est auferre illa, et ‘vendere illum’ est abalienare, et quoque facere ut serviant; vera enim et bona fidei, quia a Domino, in statu libero sunt, nec serviunt nisi Soli Domino; at cum abalienantur, tunc in statum servum veniunt, nam serviunt alicui ²⁷ malo amoris sui vel mundi, ita ²⁸ alicui cupiditati corporeae; inde legis hujus derivatio et correspondentia; et quia tunc verum et bonum Ecclesiae e libero fit servum, ita e vivo fit mortuum, ideo ²⁹ poena, quae effectus, est mors ³⁰ .

Poznámky pod čarou:

3816. ‘Et servires mihi gratis? indica mihi, Quid merces tua?’ quod significet quod erit medium conjunctionis, constat a significatione ‘servire gratis’ quod sit absque obligatorio; et ex significatione ‘mercedis’ quod sit medium conjunctionis; ‘merces’ aliquoties nominatur in Verbo, et ibi non aliud in sensu interno significat quam medium conjunctionis; causa est quia angeli prorsus nihil audire volunt de mercede, quod sit propter aliquid apud illos, ¹ immo aversantur prorsus ideam mercedis pro aliquo bono seu beneacto; sciunt enim quod apud unumquemvis quod proprium seu suum est, non sit nisi malum, et quia ita, quicquid faciunt ex proprio seu suo, contrarium mercedi secum haberet, et quod omne bonum sit ex Domino, et quod influat, et hoc ex sola misericordia, ita non a se, propter quod de mercede cogitent, immo ipsum bonum non fit bonum cum de mercede propter id cogitatur, nam finis propter se ilico se adjungit, qui finis quantum se adjungit, tantum inducit negationem quod a Domino et quod a misericordia, proinde tantum removet influxum, consequenter tantum ² a se caelum et beatitudinem quae bono et ejus affectioni inest; affectio boni seu amor in Dominum et amor erga proximum in se habet beatum et felix; ipsi affectioni et amori hoc inest; ex affectione et ejus beatitudine aliquid facere et simul propter mercedem, sunt sibi prorsus opposita; inde nunc est quod angeli per mercedem cum ea nominatur in Verbo, non percipiant aliquid mercedis, sed id quod gratis et ex misericordia a Domino illis donatur; ³ at merces pro medio conjunctionis inservit illis qui nondum ⁴ initiati sunt ⁵ ,

[2] qui enim nondum initiati sunt bono et ejus affectioni, hoc est, qui nondum plene regenerati, illi non possunt aliter quam etiam de mercede cogitare, quia bonum quod faciunt, non faciunt ex affectione boni, sed ex affectione beati et felicis propter se,

⁶ et simul ex timore pro inferno; sed cum regeneratur homo, tunc invertitur hoc, et fit affectio boni, quae cum est, non amplius mercedem spectat;

[3] hoc illustrari potest ab illis quae in vita civili ⁷ , qui habet amorem patriae, et in tali affectione erga patriam est ut sit ei voluptas ex bene velle ei benefacere, is, si ei hoc negaretur, doleret et supplicaret ut ei copia benefaciendi daretur, hoc enim affectionis ejus est, proinde ⁸ voluptatis et beatitudinis; talis etiam honoratur et ad dignitates evehitur quia hae sunt illi media patriae inserviendi, tametsi vocantur mercedes; at qui in nulla affectione patriae sunt, sed modo in affectione sui et mundi, ii propter honores et opes faciunt, quas etiam ut fines spectant; tales praeferunt se patriae, seu suum bonum communi bono, et sunt sordidi respective, et usque volunt prae aliis apparere quod ex sincero amore faciant quod faciunt; at cum de eo apud se cogitant, negant quod aliquis hoc faciat, et mirantur quod aliquis possit: qui tales sunt in vita corporis respective ad patriam seu publicum ibi, tales etiam sunt in altera vita respective ad regnum Domini ibi, sequitur enim unumquemvis affectio ejus seu amor, nam affectio seu amor est vita cujusvis.

Poznámky pod čarou: