7668. ‘Ite quaeso juvenes, et servite Jehovae’: quod significet quod relinquentur qui in veris confirmatis, ut colant Dominum, constat ex significatione ‘ite’ quod sit quod relinquentur, ut supra n. 7658; ex significatione ‘juvenum’ quod sint vera confirmata, de qua sequitur; et ex significatione ‘servire Jehovae’ quod sit colere Dominum, ut supra n. 7654, 7664. Quod ‘juvenes’ sint qui in veris confirmatis, est quia per ‘ ¹ filios, pueros, ² juvenes, viros, et senes’ significantur illa quae intelligentiae et sapientiae ³ sunt in suo ordine; talia loco illorum in caelo intelliguntur; sunt enim illi qui in caelo in ideis spiritualibus in quas intrare non potest ⁴ quod merae naturae et mundi est, quin ilico exuatur, et ⁵ transeat in tale quod sapientiae caeli et cogitationi angelicae conforme est; inde est quod per ‘ ⁶ filios, pueros, ⁷ juvenes, viros, senes’ in sensu spirituali non possint illi significari, sed quod correspondentia spiritualia quae sunt illa quae sunt intelligentiae et sapientiae; quod ea significentur, patet manifeste ex ⁸ sensu interno in Verbo ubi nominantur;

[2] per ‘juvenes’ in Verbo intelliguntur illi qui intelligentes sunt, seu, secundum ideas abstractas angelicas, intelligentia; et quia intelligentia per illos intelligitur, etiam verum confirmatum, nam hoc intelligentiae est; ⁹ vox quoque per quam ‘juvenes’ hic in lingua originali exprimitur derivatur a robore et potentia, quae vero est ex bono, ita vero confirmato; inde ¹⁰ nomen hoc tribuitur Domino: apud Sachariam,

Gladie, surge contra pastorem Meum, et contra virum (juvenem) proximum Meum; percute pastorem, ¹¹ et dispergantur oves, 13:7;

quod haec de Domino dicta sint, videatur Matth. 26:31: et quoque apud Jeremiam,

Quousque circumvagaris, filia aversa? creavit Jehovah novum in terra, femina circumdedit virum (juvenem), 31:22.

[3] ‘Juvenes’ alia voce in lingua originali pro intelligentia, ita pro vero ejus, apud Amos, Misi in vos pestem in via Aegypti, occidi gladio juvenes vestros, cum captivitate equorum, 4:10;

‘via Aegypti’ pro scientifico perverso; ‘juvenes qui occisi’ pro veris inde destructis; ‘captivitas equorum’ pro seducto intellectuali:

apud eundem, 4

Vagabuntur a mari ad mare, et a septentrione usque ad orientem, discursitabunt ad quaerendum Verbum Jehovae, nec invenient; in die illo deficient virgines pulchrae et juvenes siti, 8:12, 13;

‘virgines pulchrae’ pro ¹² affectione veri; ‘juvenes’ pro intelligentia; ‘deficere siti’ ¹³ pro privari vero; ideo dicitur ‘discursitabunt ad quaerendum Verbum Jehovae, nec invenient’; quod ibi non ‘virgines pulchrae’, nec ‘juvenes’, nec ‘deficientia ex siti’ intelligantur, patet:

apud Jeremiam,

Ascendit mors per fenestras nostras, venit in palatia nostra, ad exscindendum infantem e platea, juvenes e vicis, 9:20 [KJV 21]:

apud eundem,

Quomodo non relicta est urbs gloriae, urbs gaudii Mei! quare cadent juvenes ejus in plateis ejus, 49:[25, ] 26, 50:30:

apud eundem,

Audite, quaeso, omnes populi, videte dolorem meum, virgines meae, et juvenes mei iverunt in captivitatem, Threni 1:18;

in his locis ‘juvenes’ pro veris quae intelligentiae.

Poznámky pod čarou: