Mathai 4

¹ Cha khai tawhta Zisu cha ahripa reipasaopa ta y awpa ta râhpathohpa lâta Thlahpa chhihthapa ta y haw ta.

² Chatawhcha noh sypalih nata zâ sypalih pati nie leipa ta a y tawhta a no vaw di ha ta.

³ Reipasaotuhpa cha a vy ta a hnohta, “Khazohpa Sawchapawpa na châ khiahtala he alôzy he viahchhâ lâta a vaw lie awpa ta bie pie teh,” tah ta.

⁴ Ano deikua chata, “Chyhsapa he viahchhâ deita ta hroh aw vei ei, ‘Khazohpa pakah ta bie to a puapa deita tlao ama hroh aw,’ tahpa ta ropa a châ,” tahpa ta a chhy ta.

⁵ Cha khai tawhna chata ahripa ta khihpi pathaihpa lâna chata a chhi ta, Khazohpa achhyna-o laki pazaopa liana chata soh ta,

⁶ a hnohta, “Khazohpa Sawchapawpa na châ khiahtala nâmasasyh ta a pathla teh.‘Ano ta a vâlyuhchâpazy cha pavaisa aw ta,’‘Ama ku ta cha chalo aw ei ta,chata leipa ta la na phei alô liata nâ chhuh pathlei aw na,’tahpa ropa châ tlôh ta,”tah ta."

⁷ Zisu ta a hnohta, “‘Abeipa, na Khazohpa pasia khah y,’ tahpa ropa a châ hra na,” tah ta.

⁸ Chatawhcha ahripa chata tlâh sâhpa lâta a chhi heih ta, a hnohta khizaw khihnarâh zydua nata ama rôhnahna zydua cha pamosa ta;

⁹ a hnohta, “A khu lâta paopa ta einâ naoh khiah chi tala, he hmo zydua he ei cha pie aw,” tah ta.

¹⁰ Chatanachata Zisu ta a hnohta,Sâtâ a râ teh! ‘Abeipa na Khazohpa nâ naoh awpa a châ,ano deita na chakao awpa a châ!’tahpa ropa châ tlôh ta,”tah ta.

¹¹ Chatawhcha ahripa chata siesai ha ta, vâlyuhchâpazy a vy ei ta ano ama chakao haw.

¹² Zawhana ama patu haw tahpa Zisu ta a pahno nahta Kalili râh lâta a kua haw;

¹³ Nazari khih puasai ta sie ta, Kapynia khih tilaipi kiah. Zebulawna nata Nathalai bia chhôh liata pahrâ ta,

¹⁴ hrohsopa Isai pakah ta.

¹⁵ “Tilaipi lâta, Zawdâh haosâ ta,Zebulawna nata Nathalai râh liata Kalili liata Zenitaizy

¹⁶ zohna liata atyuhpazy chata khaih ngaitapa hmô ei ta,thina zohna nohpahli râh liata atyuhpazy chôna chata khaihna a vaw khaih haw,tahpa ta a reipa kha a vaw tlô thei nawpa ta.

¹⁷ Cha rakha tawhna chata Zisu ta, “Ro teh u, vârâh Khihnarâh cha a hnia ha tlôh ta,” tahpa ta pachu pathao ha ta.

¹⁸ Kalili Tilaipi kiah liata a sie nota, unawh pano, Saimaw, Pity ama bipa nata a unawhpa Adru tilaipi liata sao ama vaw haipa hmô ta; nga patutuhpa châ tlai ei ta.

¹⁹ Ama hnohta, “Na zi teh u, chyhsa patutuhpa ta cha tao vâ ei na,” tah ta.

²⁰ Ama saozy thlai siesaipa ta zi haw ei ta.

²¹ Cha tawhna chata sie lymâpa ta unawh hropa pano, Zebadi sawchapawpa Zami nata a unawhpa Zawhana ama paw Zebadi chhaota, balyh liata saozy ama taopathi haipa ta hmô ta, âmo aw ta.

²² Ama balyh nata ama paw thlai siesaipa ta ano zi haw ei ta.

²³ Kalili chheipâh zydua liata, amâ pakhyna ozy liata pachupa ta Khihnarâh Thâtihpha chhopa ta zawpi hryta hri to rai nata pasana to rai a hneipa patlâhsapa ta chahry lymâ ta.

²⁴ Suria râh zydua liata a moh pathâh ha ta, chyhsa a tlâh leipa zydua, tlâh leina nata pasana to a taopazy, ahripa patupazy, riapamiepazy, asypazy a hnohta a vaw chhi ei ta, a patlâsa ei.

²⁵ Zawdâh khô lâ nata Zudia râh nata Zerusale khih nata Dekapôli râh nata Kalili râh tawhta zawpi a hluh ngaitapa ta ano ama zi haw.;