Maka 2

¹ Noh khazie rakha tawhta tlyma Kapynia khih lâta vaw kua ta, o liana chata a y tahpa bie vaw pathâh haw ta.

² Chatanachata chyhsa hluhpi a vy pakhypa ta, o chhao a tlôh leipa ta, ochhi thaby lia taihta yna y leipa ta; ama hnohta bie pachu ta.

³ Chatawhcha asypa pakha chyhsa papalih ta a hnohta a vaw sy ei ta.

⁴ Zawpi vâna chata ano a hnia thei lei khâh ei ta, Zisu dady ta vâphuh phie ei ta; ama phie khai nahta asypa cha a hmophaw duata za pathlia ei ta.

⁵ Zisu ta amâ ngiapâna cha a hmô nahta, asypa hnohna chata, “Ei saw, na moleinazy cha a ngiahthaipa a châ haw,” tah ta.

⁶ Ryhpa pachutuhpa thokhazy cha cha liana chata atyuh ei ta,

⁷ “Khazia he chyhsa heta cha hawhta bie a reih? Khazohpa a reipachhie he! Khazohpa dei leipa ta, ahy e moleinazy a ngiahthai thei?” tahpa ta pachâ ei ta.

⁸ Zisu ta ama palôhrupa ta cha hawhta ama pachâ tahpa a palôhrupa ta thlai vaw pahno ha ta, ama hnohta, “Cha bie cha khazia e nama pathipalôh liata nama pachâ tly?

⁹ Asypa hnohna heta, ‘Na moleinazy a ngiahthaipa a châ haw,’ tahpa nata ‘Thyu la, na hmophaw la la, phei ta sie teh,’ tahpa he a kheihawhpa he a rei a nao via tly?

¹⁰ Kheihtarai châ sala khizaw liata Chyhsa Sawchapawpa ta molei ngiahthai theina a hnei tahpa nama pahnona awpa ta,” asypa hnohna chata

¹¹ “Ei cha tah chu, thyu la, na hmophaw la la, na o lâ a di teh,” tah ta.

¹² Ama mothlâh ha nota ano cha thlai thyu ta, hmophaw cha la ta, pua ha ta; cha vâna chata ama zydua ta ama noâh ta, Khazohpa palyupalihpa ta, “He hawhpa he hmô beih ma pi,” tahpa ta reih ei ta.

¹³ Chatawhcha Tilaipi ngiakâ lâta pua heih ta; zawpi zydua cha a hnohta a vy ei ta, âmo a pachu haw ei.

¹⁴ A sie nahta, Livai, Alphu sawchapawpa cha chhiekheina su liata atyupa hmô ta, a hnohta, “Na zi teh,” tah ta. Livai cha thyu ta, zi ha ta.

¹⁵ Chatawhcha Zisu cha Livai o liata pati a dôh nahta, chhiekheituhpa hluhpizy nata moleipazy nata a pachupazy chhaota a hnohta pati dôhkhei ei ta, ano zituhpazy hluhpi châ tlôh ei ta.

¹⁶ Pharisaizy hryta Ryhpa pachutuhpa thokhazy chata Zisu ta chhiekheituhpazy nata moleipazy hnohta pati a dôhpa ama hmô nahta, a pachupazy hnohta, “Kheihtazie ta e, chhiekheituhpazy nata moleipazy hnohta nie ta a do tly?” tah ei ta.

¹⁷ Zisu ta a vaw pahno nahta, ama hnohta, “Chyhsa hri-iah pathaihpazy ta patlâhtuhpa a ngiah veih ei; chyhsa chietlâhpazy deikua ta amâ ngiah; chyhsa siapa tlua awpa ta a zupa châ leipa na ta, moleipazy tlua awpa ta a zupa ei châ,” tah ta.

¹⁸ Zawhana pachupazy nata Pharisaizy chata pati nie leipa ta y ei ta; chyhsazy a vy ei ta, Zisu hnohta, “Khazia e Zawhana pachupazy nata Pharisai pachupazy chata pati nie leipa ta y tyh ei ta, na pachupazy deikua cha pati nie leipa ta y tlôh hra ei va?” tah ei ta.

¹⁹ Zisu ta ama hnohta, “Myuthieh alykheituhpazy hnohta myuhneituhpa cha a y chhôh na chata pati nie leipa ta ama y thei rai ma? Myuhneituhpa cha ama hnohta a y chhôhna cha pati nie leipa ta y thei veih ei.

²⁰ Châhrasala myuhneituhpa cha ama hry tawhta lana noh a vaw y aw, cha noh deikua chata pati nie leipa ta ama y aw.

²¹ Ahyhmah ta poh parohpa liata poh thiehpa bai beih veih ei; baipa châ sala, a baithlana chata tlao a daoparu aw ta, a thiehpa chata a parohpa cha hrie aw ta, tlao a hrie via aw.

²² Chatawhcha ahyhmahta kresawti thiehpa, savo titheih parohpa liata ryh beih veih ei; ryhpa châ ha sala, kresawti chata savo titheih cha tochhei aw ta, kresawti nata savo tithei cha ama lei rairie aw; kresawti thiehpa cha savo tithei thiehpa liata tlao ama ryh tyh,” tah ta.

²³ Zisu cha pahânoh ta sâh thihzy liata sie ta; a pachupazy chata ama siepa ta sâh su cha thlie ei ta.

²⁴ Chatawhcha Pharisaizy chata a hnohta, “Moh teh, khazia pahânoh ta hmo ânapazy cha ama tao tly?” tah ei ta.

²⁵ Ano chata ama hnohta, “Davi nata a viasazy ta a phahlapa ta ama nodi nota ama hmotaopa kha reih veih eichi ma?

²⁶ Abiatha theihthai beichaipa a châ nota, Khazohpa o liata a ngia ta. Theihthaipazy leipa ta nie anapa viahchhâ Sopa cha nie ta, a viasazy chhao a pie hrapa kyh kha?” tah ta.

²⁷ Chatawhcha ama hnohta, “Pahânoh he chyhsapa châta taopa châ ta, chyhsapa he pahânoh châta taopa châ vei;

²⁸ chatanachata Chyhsa Sawchapawpa he pahânoh Beipa chhao châ tlôh hra ta,” tah ta.;