4275. ‘Usque ascendere auroram’: quod significet ante conjunctionem boni naturalis per ‘Jacobum’ significati cum caelesti spirituali seu bono Divino veri, constat ex significatione ‘aurorae’ quod sit in supremo sensu Dominus, in sensu repraesentativo regnum Ipsius et in sensu universali caeleste amoris, de qua n. 2405, hic caeleste spirituale; cum enim ascendit aurora, tunc Jacob nominatus est Israel per quem significatur caelestis spiritualis homo, quapropter ‘ante ascensum aurorae’ est ante conjunctionem boni naturalis per Jacobum nunc significati cum caelesti spirituali: quid caeleste spirituale, dicetur ad vers. seq. 28 ubi de Israele agitur.