Arcana Coelestia＃2960
2960. Quod ‘inter me et inter te quid hoc?’ significet quod annueret sed vellet usque a semet, nempe praeparari seu reformari, constare potest a sensu litterae applicato ad sensum internum in quo agitur de reformatione; supra dictum ab Ephrone, ‘Agrum do tibi, et speluncam quae in illo do tibi illam’, vers. 11, quibus significatum, quod vellent praeparare semet quoad illa quae sunt Ecclesiae et fidei, hoc est, se reformare; quod status primus illorum qui reformantur, sit talis, videatur n. 2946, at cum ulterius progrediuntur in cognitionibus veri seu fidei, tunc secundus illorum status est, quod quidem annuant, sed usque velint a semet; de hoc statu in hoc versu agitur; at tertius status mox describitur, quod credant reformari a Domino. Quod tales sint in principio, causa dicta est supra n. 2946; quod autem cum progrediuntur in cognitionibus veri seu fidei, agnoscant quidem se reformari a Domino, sed usque velint a semet, causa est quia nubes ignorantiae successive discutitur, et quia confirmationes veri tempore corroborantur, et quia per imbuitiones cognitionum veri perficitur bonum; ipsum bonum cui implantatum est verum, facit ut non solum agnoscant, sed etiam credant, quod reformatio sit a Domino; hic status est tertius, quem sequitur status quartus, nempe quod percipiant quod a Domino; sed pauci sunt qui ad hunc statum veniunt in vita corporis, est enim angelicus; at qui regenerati sunt, in eum statum veniunt in altera vita. Inde patet quod in sensu interno hic describatur homo Ecclesiae spiritualis, qualis ejus status est cum adhuc immaturus, et qualis cum maturescere incipit, et tandem cum maturuit.
Arcana Coelestia＃2276
2276. ‘Forte inventi fuerint triginta’: quod significet aliquid pugnae, constat ex significatione 'numeri triginta: quod ‘triginta’ significent aliquid pugnae, ita parum pugnae, est inde quia numerus ille per multiplicationem compositus est ex ‘quinque’, quibus significatur aliquid parum, et ex ‘sex’, quibus significatur labor seu pugna, ut in Parte Prima n. 649, 720, 737, 900, 1709 ostensum est:
[2] inde etiam numerus ille, ubicumque in Verbo legitur, significat aliquid parum respective, sicut apud Zachariam, Dixi ad illos, Si bonum in oculis vestris, date mercedem [meam, ] et si non, omittite; et appenderunt mercedem meam, triginta argenteos; et dixit Jehovah ad me, Projice illud ad figulum, magnificentiam pretii, qua aestimatus sum ab apud eos; et sumpsi triginta argenteos, et projeci illud in domum Jehovae ad figulum, 11:12, 13;
pro quod tam parum aestimaverant meritum Domini, ac redemptionem et salvationem ab Ipso; ‘figulus’ pro reformatione et regeneratione:
[3] inde de iisdem triginta argenteis 1 apud Matthaeum, Sumpserunt triginta argenteos [pretium aestimati], quem emerant a filiis Israelis, et dederunt pro agro figuli, sicut praecepit mihi Dominus, xxvii [9, ] 10; ex quibus manifeste constat, quod ‘triginta’ ibi pro pretio aestimati parvo: 2 aestimatio servi 3 qui pro vili habebatur, erat triginta siclorum, ut constat apud Mosen,
Si servum ferierit bos, aut ancillam, argentum triginta siclorum dabit domino ejus, et bos lapidabitur, Exod. 21:32;
quam vilis habebatur servus, constat ibi vers. 20, 21, 21;
‘servus’ in sensu interno pro labore.
[4] Quod Levitae assumerentur ad obeundum ministerium, quod describitur per venientem ad exercendum militiam, et faciendum opus in tentorio, a filio triginta annorum ad quinquaginta, Num. 4:3, 23, 30, 35, 39, 43,
erat quia per ‘triginta’ significabantur qui initiarentur, ita qui parum adhuc exercere militiam in spirituali sensu intellectum possent;
[5] praeter alibi, ubi ‘triginta’ in Verbo nominantur;
Sicut quod offerrent super filium bovis minham tres decimas, Num. 15:9,
quod erat 4 quia sacrificium de bove repraesentabat bonum naturale, ut supra n. 2180 ostensum, et bonum naturale parum est respective ad bonum spirituale, quod repraesentabatur per sacrificium arietis, et adhuc minus respective ad bonum caeleste, quod repraesentabatur per sacrificium agni, circa quae alia ratio decimarum minhae fuit, ut constat ibi vers. 4;
tum Num. 28:12, 13, 20, 21, 28, 29; 29:3, 4, 9, 10, 14, 15; quae rationes decimarum seu proportiones nusquam mandatae fuissent nisi involvissent arcana caelestia. 5 'Triginta' pro parvo etiam apud Marcum, Semen, quod cecidit in terram bonam, dedit fructum ascendentem, et crescentem, et tulit unum triginta, et alterum sexaginta, et alterum centum, 4:8;
‘triginta’ pro parvo proventu, et pro quod parum laboravit; numeri illi non designati fuissent nisi involvissent illa quae significant.
脚注:
1. The Manuscript inserts ita.
2. The Manuscript has In Verbo alibi etiam triginta occurrunt, et ibi significant parum, sicut apud Mosen.
3. The Manuscript has enim.
4. The editors of the third Latin edition made a minor correction here. For details, see the end of the appropriate volume of that edition.
5. The Manuscript inserts Quod.
