10032. ‘Et duos renes, et adipem super illis’: quod significet verum interius externi seu naturalis hominis, et illius bonum, constat ex significatione ‘renum’ quod sint vera interiora ¹ , de qua sequitur, et ex significatione ‘adipis’ quod sit bonum, de qua supra n. ² 10029; quod sit bonum illius veri, est quia erat adeps super renibus. Dicitur bonum illius veri quoniam omni bono est suum verum, et omni vero est suum bonum; sunt innumerabilia genera boni, et cuivis generi boni est verum quod ejusdem generis est; nam in universo caelo sunt bona et vera quae faciunt vitam ibi, ac ubivis sunt varia. Quale bonum est quod per adipem super renibus significatur ³ , constat ex veris quae significantur ⁴ per ‘renes’; per ‘renes’ significantur vera explorantia, purificantia, et castigantia ⁵ ; significatio illa ducit causam ex functione illorum; inde patet quid ⁶ significatur per ‘renes’ in sequentibus his locis:

apud Jeremiam,

Jehovah probat renes et cor, 11:20:

apud eundem,

Jehovah probans justum, videns renes et cor, 20:12:

apud Davidem,

Probas corda et renes, Deus juste, Ps. 7:10 [KJV Ps. 7:9]:

apud eundem,

Jehovah, explora renes meos, et cor meum, Ps. 26:2:

apud eundem,

Jehovah, Tu possides renes meos, Ps 139:13:

apud Johannem, Ego sum Qui scrutatur renes et cor, Apoc. 2:23;

‘scrutari et probare renes’ ⁷ est explorare vera fidei, et ‘scrutari et probare cor’ est explorare bona amoris, nam ‘cor’ est bonum amoris, n. 3883-3896, 7542, 9050; quod vera fidei per ‘renes’ significentur, patet manifeste apud Davidem,

Jehovah, ecce veritatem desideras in renibus, Ps. 51:8 [KJV Ps. 51:6].

Quod per ‘renes’ significetur verum interius et ejus exploratio, est quia per ‘ureteres et ⁸ vesicam’, quae ex renibus exeunt, significatur verum exterius et ejus exploratio, ut et castigatio, n. 5381-5384.

脚注: