2 Samuel 13

¹ Cha hnôh lâna chata Davi sawchapawpa Absalaw chata sietanô hmipha ngaitapa hnei ta, a moh cha Tamari châ ta; Davi sawchapawpa Amnaw chata ano cha a kyh pachâ ta.

² Amnaw cha a sietanô Tamari vâna chata a patypamâ kaw ta, tlâh leipa ta y ta; ano cha laihsa kôpa châ tlôh ta, a chô liata hmo kheihawhpa tlyma taopa cha Amnaw châta aru ngaitapa a châ.

³ Anodeikuacha Amnaw chata viasa hnei ta, a moh cha Zônadi châ ta, Davi unawhpa Shimiah sawchapawpa a châ; Zônada cha chyhsa piepie ngaitapa châ ta.

⁴ Chatawhcha a hnohta “Aw nâ abei sawchapawpa chi he, kheihta zie ta e, a noh chareih ta na zaoh rili tly’ Na chho khoh aw va chi mâ?” tah ta. Amnaw chata a hnohta, “Ei unawhpa Absalaw sietanô Tamari he a kyh ei pachâ,” tah ta.

⁵ Zônada chata a hnohta, “Na rakhô liata a zia thlâh ha la, tlâh leipa ta y pakhei la, na paw ta a cha vaw mo tita, a hnohta, ‘Ngiachhipa ta ei sietanô Tamari cha kei lâta a vy sala, viahchhâ nie awpa na vaw pie sala, ei hmô theipa liata, ei mohmô tlai liata niepa na taopa mawh sy, a ku liatahpa tlai ei vaw nie aw,’ vaw tah mah y,” tah ta.

⁶ Chatanachata Amnaw cha a zia ta, tlâh leipa ta y pakhei ta; abeipa ta a kei mo nahta Amnaw chata abeipa hnohta, “Ngiachhiepa ta ei sietanô Tamari a vy sala, ei mohmô tlai liana heta viahchhâ miano tlyma na taopa sala, ano ku tawhtapa tlai ei vaw nie aw na,” tah ta.

⁷ Davi chata Tamari hnohta, “Na rilâhpa Amnaw o lâta vawh la, nie awpa kei taopa teh,” tahpa ta a o lâta chyhsa tuah ta.

⁸ Chatanachata Tamari cha a rilâhpa Amnaw o lâna chata vawh ta, ano cha a vaw zia thlâh ha ta. Chatawhcha viahdie la ta, ny ta, a mohmô liata viahchhâ cha taopa ta, pakâh ta.

⁹ Chatawhcha a pakâhna cha la ta a hmiakô liata thaoh ta. Châhrasala nie khoh leipa ta. Chatawhcha Amnaw chata, “Chyhsa zydua heta na puasai khai ei se,” tah ta. Chatanachata puasai khai haw ei ta.

¹⁰ Chatawhcha Amnaw chata Tamari hnohta, “Na ku liatahpa tlai ei nie thei nawpa ta niepa cha chhôhpadâhpa lâna heta vaw cheih teh,” tah ta. Chatawhcha Tamari chata a viahchhâ taopazy cha cheih ta, rilâhpa Amnaw lâta chhôhpadâhpa lâna chata a ngiakhei ta.

¹¹ Paniesa awpa ta a kiapâh lâ a hniapa ta a vawkheipa cha vaw patu ta, a hnohta “Ei sietanô y, ei hnohta a vaw zia tua,” tah ta. Chatawhcha ano chata a chhy ta, “Châ vei, ei rilâhpa y, na tah raruah khâ; Izarel zy hry liata he hawhpa hmo he tao awpa châ vei; he hmo molei ngaitapa he tao kha.

¹³ Keima heta ei maohphyuna cha khataih lâ ei vawkhei aw? Chatawhcha nâ chhao Izarel zy hry liata chyhsa hrupa ta pachâpa na châ aw mâ tâh. Chavâta abeipa tlao a chhohia teh; eina hnei awpa chi châ thlyu aw vei,” tah ta.

¹⁴ Châhrasala a bie cha nahthlie khoh leipa ta; ano hlâta a tha tlô via tlôh ta, tah rarua ta, a ziakhei haw ta.

¹⁵ Chatanachata Amnaw chata thata a hao ta; â haona cha ano kyh a pachâ nota a kyhpachâna hlâta tha via ta â hao. Chatanachata Amnaw chata a hnohta, “Thyu la, sie syulyu teh,” tah ta.

¹⁶ Châhrasala ano chata a hnohta, “Cha hawhta châ vei; he hawhta â do lei ngaitapa ta eina papuapa” chi he ei chô liata na tao hawhpa hlâna khata a pha lei via,” tah ta. Châhrasala nahthlie khoh hlei leipa ta.

¹⁷ A deichhypa a chakaotuhpa cha aw ta, “He chanô he kei tawhtapa papua la, ochhi khâchâ khaw khâh teh,” tah ta.

¹⁸ Viahkao pasihpa a chapaicharupa a ky ta, cha hawhpa viahpakao cha abei zuah laihsa kôpa zy ta a ky tyh ei ta. Chatanachata a chakaotuhpa chata papua ta, ochhi khâchâ khaw khâh ta.

¹⁹ Chatawhcha Tamari chata a luh liata meipaoh a mia ta, a viahpakao pasihpa chapaicharupa a kypa cha hrie ta; a laki liata a ku soh ta, aoh tlili ta chana chôta sie haw ta.

²⁰ Chatawhcha a rilâhpa Absalaw chata a hnohta, “Na rilâhpa Amnaw chata a cha ykhei ha mâ? Châhrasala a chalih teh, ei sietanô y; na rilâhpa a châ mâ tâh; papeisa khâ,” tah ta. Chatanachata Tamari cha a rilâhpa Absalaw o liata aly lei ngaitapa ta y thlâh ha ta.

²¹ Abei Davi ta cha hmo zydua a thei nahta a pathi-ia ngaita ta.

²² Châhrasala Absalaw chata Amnaw hnohta a chhiepa tlyma, a phapa tlyma khâpahmah rei khoh leipa ta; a sietanô Tamari a tah raruapa vâta Absalaw chata Amnaw cha a hao kaw ta.

²³ Chatawhcha kô no bohlo a lei nahta Ephrai kiapâh liata Baalhazô liata Absalaw ta mietahkupa hmi pangyusa ta, Absalaw chata abei sawchapawpa zydua cha hrua ta.

²⁴ Absalaw cha abeipa lâta vawh ta, “Na chakaotuhpa ta mietahkupa hmi pangyusa ta; abeipa nata a chakaotuhpa zy cha na chakaotuhpa lâna heta sie hra ei sy,” tah ta.

²⁵ Châhrasala abeipa chata Absalaw hnohta, “Châ vei ei sawchapawpa y, eima zydua ta cha sie aw ma pi, na rie eima cha pathei tu pathlei aw na,” tah ta. Ano chata hrua rialia ta, châhrasala sie khoh hlei leipa ta byhnâ tlao aw pa ta.

²⁶ Chatawhcha Absalaw ta, “Cha khiahtala ei unawhpa Amnaw chhâ eima hnohta vaw sie sy,” tah ta. Abeipa chata a hnohta, “Khazia a vaw sie aw,” tah ta.

²⁷ Châhrasala Absalaw chata Amnaw nata abeipa sawchapaw zydua chhâ cha a hnohta sie hra awpa ta a haw ta.

²⁸ Chatawhcha Absalaw chata a chakaotuhpa zy cha, “Amnaw kresawti dopa ta a thapha nota, nama hnohta, ‘Amnaw cha thie teh u,’ ei cha tah khiah ei ta la, thie ula, chi khah u; bie cha pie veih ei na mâ? Nama riah a papha ula, a pachhyu teh u,” tahpa ta bie pie ta.

²⁹ Chatanachata Absalaw bie a piepa hawhna chata tao ei ta. Chatanachata abei sawchapawpa zydua cha thyu ei ta, ama sabaitu chô liata kiah chyu ei ta, a râ syulyu haw ei ta.

³⁰ Chatawhcha lâpi liata ama y nota, “Absalaw ta abei sawchapawpa zydua cha thie khai ha ta; pakha hmah pahlôh vei,” tahpa ta Davi lâta thâtih vaw tlô ta.

³¹ Chatanachata abeipa cha thyu ta, a chysia zy hrie ta, alei liata a zia ta; a chakaotuhpa zydua cha ama chysia zy hriepa ta, a kiapâh liata a duahpa ta.

³² Davi unawhpa Shimei sawchapawpa Zônada chata a chhy ta, “Abeipa chata abei sawchapawpa satliapa zydua cha ama thie khai haw tahpa zo khah se, Amnaw deita he a thi, a sietanô Tamari a tah raruah rakha tawhna khata Absalaw chata he hawhta tao awpa he â chhuahpa rai a châ.

³³ Chavâta ei zibeipa chata abei sawchapawpa zydua cha ama thie tlyma tahpa ta pangiasapa ta pachâ chhie khah se; Amnaw deita a thi,” tah ta.

³⁴ Absalaw deikua cha a râ haw ta. Chatawhcha a riahvaihtuhpa satliapa chata mohmia pasaih ta, kei moh ta, a hnôh lâta tlâh baikhaihpa lâpi liana chata chyhsa hluhpi a vy ei ta.

³⁵ Chatawhcha Zônada chata abeipa hnohta, “Moh teh, abei sawchapawpa zy cha ama y; na chakaotuhpa ta a reipa hawhna tlai kha a châ,” tah ta.

³⁶ Chatawhcha a rei khai pata nahta, abei sawchapawpa zy cha vaw tlô ei ta, aoh tlili ta cha ei ta; abeipa chhao a chakaotuhpa zy nata ao tlili ta thata cha ei ta.

³⁷ Absalaw deikua cha a râ haw ta, Keshu beipa Amihu sawchapawpa Talmai lâta sie ta. Davi chata a noh chareih a sawchapawpa mâchhie sa ta.

³⁸ Chatanachata Absalaw cha a râ ta, Keshu râh lâta sie ta, cha liana chata kô thôh kei y ta.

³⁹ Chatawhcha Abei Davi chata Absalaw lâta sie byuh ngaita ta; Amnaw kyh liana chata a thlalôh haw ta, ano cha thi haw tlôh ta.