2 Samuel 12

¹ ABEIPA chata Davi lâta Natha tuah ta, a hnohta, “Khih miakha liana heta chyhsa pano y ei ta, pakha cha chyhsa hneirôhpa châ ta, pakha cha chyhsa sipasapa châ ta.

² Chyhsa hneirôhpa cha mietahkupa zaw a hluhpi nata sahroh hri a hluhpi hnei ta;

³ chyhsa sipasapa deikua chata mietahkupa taw a chanôpa a chyhpa ta pôkha a chaleipa a pasapa miakha ta dei leipa ta cha khâpahmah hnei vei. Ano nata a sawzy hnohta vaw laiseih ta; a beikoh a chapaolâhpa nata a nyu a hlypa, a kalachhôh liata a ypa a sawchanô hawh tlaita a pachâpa châ ta.

⁴ Chatawhcha chyhsa hneirôhpa hnohta khichhai pakha he kei tlô ta, a hnohta, khichhai a vaw tlôpa cha ano mietahkupa nata sahroh cha thie pasaih leipa ta chyhsa sipasapa mietahkupa taw cha chhu ta, a hnohta a vaw tlôpa cha thiepa ta,” tah ta.

⁵ Chatanachata Davi cha cha chyhsa chô liana chata a pathi-ia kaw ta, Natha hnohta, “ABEIPA hrona reipa ta ei reih, cha hmo a taotuhpa cha thi tlâh a châ;

⁶ he hawhpa hmo a taopa vâta nata ngiachhiena a hnei leipa vâta a mietahkupa taw cha a lie palih ta a thô awpa a châ aw,” tah ta.

⁷ Natha chata Davi hnohta, “Nâma he na châ, ABEIPA Izarel zy Khazohpa chata he tana heta a tah, ‘Izarel zy abei châta sathaw cha thu na ta, Sawla ku tawhtapa cha pachha na ta;

⁸ na zibeipa o ryu cha patosa na ta, na zibeipa lahpinô zy cha na kalachhôh liata soh na ta, chatawhcha Izarel chhôhkha zy nata Zudah chhôhkha zy cha pie na ta; chazy cha a chyh tu khiahtala hmo hropa zy chhao ei cha baichha aw mâ tâh.

⁹ Khazia e, ABEIPA bie cha khâpa sawta reih leipa ta a mohmô liata hmo pha leipa na tao? Hiti chyhsa Uriah cha zaozi ta thie chi ta, a lahpinô cha na lahpinô châta na hnei, Amawna pathlazy zaozi ta thie chi ta.

¹⁰ Chavâta zaozi chata he chhôhkha zy cha paisai aw vei, nâ chata khâpa sawta na reih leipa chi ta, Hiti chyhsa Uriah lahpinô cha na lahpinô châta chhu ha tlôh chi ta,’ tah ta.

¹¹ ABEIPA chata he tana heta a tah, ‘Nama chhôhkha hry tawh tlaita na chô liata hmo pha leipa papua aw na ta; na mohmô tlai liata na lahpino zy cha cha lapa aw na ta, na vaihzy pie aw na ta, nohchhô ta na lahpinô zy amâ ziakhei aw.

¹² Nâ chata a ru lâta tao chi ta; kei deikua chata Izarel mo zydua mohmô liata nohchhô a khaihpa liata ei tao aw,’ tahpa ta,” tah ta.

¹³ Davi chata Natha hnohta, “ABEIPA chô liata hmo ei parao haw,” tah ta. Natha chata Davi hnohta, “ABEIPA chhaota na moleipa cha a pahlei haw; thi aw va chi.

¹⁴ Anodeikua cha he na hmotaopa heta Khazohpa reipachhiena ryhpaoh ngaitapa ABEIPA khakhaipa zy châta na taopa vâta, hawti nâ liata a pihpa cha a thi tlai aw,” tah ta.

¹⁵ Chatanachata Natha chata a o lâta a di haw ta. Uriah lahpinô ta Davi a sapapa chô liana chata ABEIPA ta a ku pazawh ta, tlâh lei ngaitapa ta y ta.

¹⁶ Chavâta Davi chata nie leipa ta y ta, a ngia ta, zâkhihdei a lei liata a zia ta.

¹⁷ Chatawhcha a chhôhkha zy hry liata machâ zy cha thyu ei ta, alei tawhtapa cha pathyu awpa ta a kiapâh liata a duah ei ta; châhrasala thyu khoh leipa ta ama hnohta chhao pati nie hra vei.

¹⁸ A noh sari noh liata hawti cha thi haw ta. Davi chakaotuhpa zy chata hawti cha a thi haw tahpa chho awpa ta chi ei ta; “Hawti a hro nona khata a hnohta bie reih pi ta, nahthlie khoh tlôh leipa ta; hawti cha a thi haw tahpa kheihta e, eima chho ngâh aw? Kheihta ma anosasyh ta a tao aw na” tah ei ta.

¹⁹ Châhrasala Davi ta cha hawhta a chakaotuhpa zy a ru lâta bie amâ chhopa a hmô nahta Davi chata hawti cha a thi tahpa pahno haw ta: Davi chata a chakaotuhpa zy hnohta, “Hawti cha a thi ha ma?” tah ta. Âmo chata, “A thi haw” tah ei ta.

²⁰ Chatanachata Davi cha alei tawhtapa cha thyu ta, a sie ta, sathaw a thu ta, a pohzy a patly ta; ABEIPA o lâ vawh ta, a chhy ta; ano o lâta vawh heih ta; pati haw ta, a hmiakô liata sopa ei ta, nie ta.

²¹ Chatanachata a chakaotuhpa zy chata a hnohta, “Na hmotaona zie he kheihta zie tlyma? Hawti cha a hro nona khata, nie leipa ta y chi ta, cha chi ta, châhrasala hawti cha a thi haw nahta thyu chi ta, pati zy tlao na nie,” tah ei ta.

²² Ano chata, “Hawti cha a hroh thei nawpa ta, ABEIPA chata eina ngiachhie ngyu aw la, ahy a pahno aw pi? tah na ta.

²³ Châhrasala atahmâ cha thi haw tlôh ta; khazia nie leipa ta ei y khao aw? Ei aw pakua thei aw mâ? Ano lâta keima he sie aw na ta, châhrasala ano la kei lâta vaw kua hei khao aw vei,” tah ta.

²⁴ Chatanachata Davi chata a lahpinô Basheba cha a thlah palôh ta, a hnohta a ngia ta, a ziakhei ta; sawchapawpa sa ta, a moh Sawlawmaw bi ta. Chatawhcha ano cha ABEIPA ta a kyh pachâ ta,

²⁵ hrohsopa Natha cha bie patah sa ta; ano chata ABEIPA bie hmâpa ta a moh ta Zedidia bi ta.

²⁶ Zôaba chata Amawna pathlazy khihpi Rabah hrao ta, abei khihpi cha la ta.

²⁷ Chatawhcha Zôaba chata Davi lâta chyhsa tuah ta, “Rabah adyuh ta, tizy khihpi cha ei la haw.

²⁸ Chatanachata chyhsa a ypa zydua cha pakhy la, khihpi cha adyuhpa ta padô la, la teh; keima ta khihpi cha ei la khiahtala ei moh a phaoh pathlei aw na,” tah ta.

²⁹ Chatanachata Davi chata chyhsa zydua cha pakhy ta, Rabah lâna chata sie ei ta, a kei dyuh ei ta, la haw ei ta.

³⁰ Chatawhcha ama beipa abeilakho a kho haipa cha lapa ta; â hrina lâ cha ngôh talent a tliahpa châ ta, lôsôhpa zy chhao a hlao ta; Davi pakho ei ta. Chatawhcha khihpi liatahpa hraona sôh a hluhpi la ta.

³¹ Chatawhcha cha liata a ypa zawpi zy puakhei ta, thoâna zy, alei paliena thua pazaohpa zy, thua ahrei zy hmâpa ta rai pahriasa ei ta, alei raopa zy pataosa ei ta; Amawna pathlazy khihpi zydua cha cha hawhna chata tao ta, Davi nata chyhsa zydua cha Zerusale lâ a di haw hei ei ta.