803. CAPUT XIX

1. POST haec audivi tanquam vocem turbae multae in Caelo, dicentis Alleluja, Salus et Gloria et Honor et Potentia Domino Deo nostro:

2. Quia vera et justa judicia Ipsius; quia judicavit Meretricem magnam, quae corrupit terram scortatione sua, et Vindicavit sanguinem servorum Suorum de manu ejus.

3. Et secundo dixerunt, Alleluja; et fumus ejus ascendit ¹ in saecula saeculorum.

4. Et prociderunt Seniores viginti quatuor, et quatuor Animalia, et adoraverunt Deum sedentem super Throno, dicentes, Amen, Alleluja.

5. Et vox e Throno exivit, dicens, Laudate Deum nostrum, Omnes servi Ipsius, et timentes Ipsum, et parvi et magni.

6. Et audivi tanquam vocem turbae multae, et tanquam vocem aquarum multarum, et tanquam vocem tonitruum vehementium, dicentium, Alleluja, quia regnat Dominus Deus Omnipotens.

7. Gaudeamus et exultemus et demus gloriam Ipsi, quia venerunt nuptiae Agni, et Uxor Ipsius paravit se.

8. Et datum illi ut amiceretur byssino mundo et splendido, nam byssinum justitiae sanctorum.

9. Et dixit mihi, Scribe, Beati qui ad Caenam nuptiarum Agni vocati sunt; et dixit, Haec verba vera sunt Dei.

10. Et procidi ante pedes ejus adorare illum; et dixit mihi, Vide, ne, conservus tuus sum, et fratrum tuorum habentium testimonium Jesu; Deum adora; nam testimonium Jesu est spiritus prophetiae.

11. Et vidi Caelum apertum, et ecce Equus albus, et Sedens super illo vocatur Fidelis et Verus, et in justitia judicat et pugnat.

12. Et Oculi Ipsius tanquam flamma ignis, et super capite Ipsius diademata multa; habens Nomen scriptum, quod nemo novit nisi Ipse.

13. Et circumindutus vestimento tincto sanguine, et vocatur Nomen Ipsius Verbum Dei.

14. Et exercitus qui in Caelo sequebantur Ipsum super equis albis, induti byssino albo et mundo.

15. Et ex Ore Ipsius prodibat romphaea acuta, ut per illam percutiat gentes; et Ipse pascet illas virga ferrea; et Ipse calcat torcular vini furoris et irae Dei Omnipotentis.

16. Et habet super vestimento et super femore Suo Nomen scriptum, Rex regum et Dominus dominorum.

17. Et vidi unum Angelum stantem in Sole; et clamavit voce magna dicens Omnibus avibus volantibus in medio Caelo, Venite et congregamini ad Caenam magni Dei.

18. Ut comedatis carnes regum, et carnes chiliarchorum, et carnes fortium, et carnes equorum et sedentium super illis, et carnes omnium liberorum et servorum, et parvorum et magnorum.

19. Et vidi Bestiam, et reges terrae et exercitus eorum congregatos facere bellum cum Sedente super Equo et cum exercitu Ipsius.

20. Et comprehensa est Bestia, et cum illa Pseudopropheta qui fecit signa coram illa, quibus seduxit accipientes characterem Bestiae, et adorantes imaginem ejus; vivi missi sunt hi duo in stagnum ignis ardens sulphure.

21. Et reliqui occisi sunt romphaea Sedentis super Equo, procedente ex ore Ipsius; et Omnes aves satiatae sunt ex carnibus eorum.

SENSUS SPIRITUALIS.

CONTENTUM TOTIUS CAPITIS.

GLORIFICATIO DOMINI AB ANGELIS CAELI, QUOD RELIGIOSUM ROMANO CATHOLICUM IN MUNDO SPIRITUALI REMOTUM SIT, EX QUO ILLI IN LUCEM ET IN BEATITUDINEM SUAM VENERUNT (vers. 1-5).

ANNUNTIATIO DE ADVENTU DOMINI, ET DE NOVA AB IPSO ECCLESIA (vers. 6-10).

APERITIO VERBI QUOAD SENSUM SPIRITUALEM PRO ILLA ECCLESIA (vers. 11-16).

VOCATIO OMNIUM AD ILLAM (vers. 17, 18).

RESISTENTIA AB ILLIS QUI IN FIDE SEPARATA A CHARITATE SUNT (vers. 19);

HORUM REMOTIO ET DAMNATIO (vers. 20, 21).

CONTENTA SINGULORUM VERSUUM.

1. "Post haec audivi tanquam vocem turbae multae in Caelo, dicentis Alleluja," significat gratiarum actionem, confessionem, et celebrationem Domini ab Angelis inferiorum Caelorum, propter remotionem Babyloniorum (803); "Salus et Gloria et Honor et Potentia Domino Deo nostro," significat quod nunc a Domino salvatio, quia nunc receptio Divini Verbi et Divini Boni ex Divina Potestate Ipsius (804).

2. Quia vera et justa judicia Ipsius, quia judicavit Meretricem magnam, quae corrupit terram scortatione sua," significat quia ex justitia condemnatum est prophanum Religiosum Babylonicum, quod per foedas adulterationes Verbi Ecclesiam Domini destruxit (805); "et vindicavit sanguinem servorum Suorum de manu ejus," significat retributionem propter damna, et violentias illatas animabus cultorum Domini (806).

3. "Et secundo dixerunt, Alleluja, (et) fumus ejus ascendit in saecula saeculorum," significat ex gaudio gratiarum actionem et celebrationem Domini, quod prophanum illud Religiosum damnatum sit in aeternum (807).

4. "Et prociderunt Seniores viginti quatuor et quatuor Animalia, et adoraverunt Deum sedentem super Throno, dicentes, Amen, Alleluja," significat adorationem Domini ut Dei Caeli et Terrae, ac ut Judicis universi, Angelis superiorum Caelorum, et confirmationem gratiarum actionis, confessionis et celebrationis Domini ab Angelis inferiorum Caelorum (808).

5. "Et vox e Throno exivit, dicens, Laudate. Deum nostrum, omnes servi Ipsius, et timentes Ipsum," significat influxum a Domino in Caelum; et sic unanimitatem Angelorum, quod omnes qui in veris fidei et in bonis amoris sunt, colant Dominum ut Solum Deum Caeli (809); "et parvi et magni," significat qui in minori et majori gradu colunt Dominum ex veris fidei et ex bonis amoris (810).

6. "Et audivi tanquam vocem turbae multae, et tanquam vocem aquarum multarum, et tanquam vocem tonitruum vehementium, dicentium Alleluja, quia regnat Dominus Deus Omnipotens," significat gaudium Angelorum infimi Caeli, Angelorum medii Caeli, et Angelorum supremi Caeli, quod Solus Dominus regnet in Ecclesia quae nunc ventura est (811).

7. "Gaudeamus et exultemus et demus ² gloriam Ipsi, quia venerunt nuptiae Agni," significat gaudium animae et cordis, et inde glorificationem Domini, quod a nunc fiat plenum conjugium Ipsius cum Ecclesia (812); "et Uxor Ipsius paravit se," significat quod illi qui ab Ecclesia hac, quae est Nova Hierosolyma, erunt, colligantur, inaugurentur et instruantur (813).

8. "Et datum illi ut amiceretur byssino mundo et splendido," significat quod illi instruantur in veris genuinis et puris per Verbum a Domino (814); "nam ³ byssinum justitiae sanctorum," significat quod per vera ex Verbo sint bona vitae illis qui ad Ecclesia Domini sunt (815).

9. "Et dixit mihi, Scribe, Beati qui ad Caenam nuptiarum Agni vocati sunt," significat unum Angelum e Caelo missum ad Johannem, et loquentem cum illo do Nova Ecclesia Domini, et dicentem, quod daretur scire in terris, quod vita aeterna sit illis qui recipiunt illa quae istius Ecclesiae sunt (816); "et dixit, Haec verba vera sunt Dei," significat quod hoc credendum sit quia a Domino (817).

10. "Et procidi ante pedes ejus adorare illum; et dixit, Vide, ne, conservus tuus sum, et fratrum tuorum habentium testimonium Jesu; Deum adora," significat quod angeli Caeli non adorandi et invocandi sint, quia nihil Divinum est illis, sed quod associati sint hominibus, ut fratres fratribus, illis qui colunt Dominum, et sic quod Solus Dominus in consociatione cum illis adorandus sit (818); "nam testimonium Jesu est spiritus prophetiae," significat quod Agnitio quod Dominus sit Deus Caeli et Terrae, et simul Vitam secundum praecepta Ipsius, sit in universali sensu omne Verbi et doctrinae inde (819).

11. "Et vidi Caelum apertum, et ecce Equus albus," significat Sensum spiritualem Verbi a Domino revelatum, et per id intellectum Verbi interiorem detectum, quod est Adventus Domini (820); "et Sedens super illo vocatur fidelis et verus, et in justitia judicat et pugnat," significat Dominum quoad Verbum, quod sit Ipsum Divinum Bonum et Divinum Verum, ex quo utroque facit judicium (821).

12. "Et oculi Ipsius tanquam flamma ignis," significat Divinam Sapientiam Divini Amoris Domini (822); "et super capite Ipsius diademata multa," significat Divina vera Verbi ab Ipso (823); "habens Nomen scriptum quod nemo novit "nisi Ipse," significat quod quale est Verbum in Sensu spirituali et caelesti ejus, nemo videat quam Dominus, et cui Ipse revelat (824).

13. "Et circumindutus vestimento tincto sanguine, et vocatur Nomen Ipsius Verbum Dei," significat Divinum Verum in Sensu ultimo, seu Verbum in litera, cui violentia illata est (825).

14. "Et exercitus qui in Caelo ⁴ sequebantur Ipsum super equis albis, induti byssino albo et mundo," significat angelos in Caelo novo Christiano, qui conjuncti Domino in intellectu Verbi interiori et sic in puris et genuinis veris erant (826).

15. "Et ex ore Ipsius prodibat romphaea acuta," significat dispersionem falsorum per doctrinam inde a Domino (827); "ut per illam percutiat gentes; et Ipse pascet illam virga ferrea," significat quod omnes qui in fide mortua sunt, per vera Sensus literae Verbi, et per rationalia, convincet (828); "at Ipse calcat torcular (vini) furoris et irae Dei Omnipotentis," significat quod Dominus solus sustinuerit omnia mala Ecclesiae, et omnem violentiam illatam Verbo, ita Sibi (829).

16. "Et habet super vestimento et super femore Suo Nomen scriptum, Rex regum et Dominus dominorum," significat quod Dominus doceat In Verbo qualis est, quod sit Divinum Verum Divinae Sapientiae et Divinum Bonum Divini Amoris, ita quod sit Deus universi (830).

17. "Et vidi unum Angelum stantem in Sole; et clamavit voce magna, dicens omnibus avibus volantibus in medio Caeli, Venite et congregamini ad Caenam Magni Dei," significat Dominum ex Divino Amore et inde ex Divino Zelo vocantem et convocantem omnes qui in affectione veri spirituali sunt, et de Caelo cogitant, ad Novam Ecclesiam, et ad conjunctionem Secum, ita ad vitam aeternam (831).

18. "Ut comedatis carnes regum, et carnes chiliarchorum, et carnes fortium, et carnes equorum et sedentium super illis, et carnes (omnium) liberorum et servorum, et parvorum et magnorum," significat appropriationem bonorum a Domino per vera Verbi et doctrinae inde, in omni sensu, gradu et genere (832).

19. "Et vidi Bestiam et reges terrae et exercitus eorum congregatos facere bellum cum Sedente super Equo, et cum exercitu Ipsius," significat quod omnes interius mali, qui professi sunt solam Fidem, cum antesignanis et eorum clientibus, impugnaturi sint Divina Vera Domini in Verbo Ipsius, et infestaturi illos qui e Nova Ecclesia Domini erunt (833).

20. "Et comprehensa est Bestia, et cum illa Pseudopropheta qui fecit signa coram illa, quibus seduxit accipientes characterem Bestiae, et adorantes imaginem ejus," significat omnes illos qui professi sunt solam Fidem, ac interius mali erant, tam Laici et vulgus quam Clerici et docti, qui per ratiocinationes et contestationes, quod sola Fides sit unicum medium salutis, adduxerint ⁵ alios ad recipiendum illam fidem, et ad vivendum secundum illam (834); "vivi missi sunt hi duo in stagnum ignis ardens sulphure," significat quod omnes illi, sicut fuerunt, conjecti sint in Infernum, ubi amores falsi sunt et simul cupiditates mali (835).

21. "Et reliqui occisi sunt ex romphaea Sedentis super Equo, procedente ex ore Ipsius," significat quod omnes ex varia haeresi inter Reformatos, qui non vixerunt secundum praecepta Domini in Verbo, quae noverant, ex Verbo judicati pereant (836); "et omnes aves satiatae sunt ex carnibus eorum," significat quod genii infernales ex concupiscentiis mali eorum, quae sunt propria eorum, quasi alantur (837).

EXPLICATIO.

(Vers. 1.) "Post haec audivi tanquam vocem turbae ⁶ multae in Caelo, dicentis Alleluja," significat gratiarum actionem, confessionem et celebrationem Domini ad Angelis inferiorum Caelorum propter remotionem Babyloniorum. - Per "turbam multam in Caelo" significantur Angeli inferiorum Caelorum; per "vocem ejus dicentis Alleluja" significatur gratiarum actio, confessio et celebratio Domini ab illis: per "Alleluja" in lingua Hebraea significatur Laudate Deum; sic fuit vox gratiarum actionis, confessionis et celebrationis Domini ex gaudio cordis, ut patet ex his:

"Benedic anima mea Jehovae, Alleluja," (Psalm. 104:35);

"Benedictus Jehovah Deus Israelis ab aeterno in aeternum usque; et dicat omnis populus, Amen, Alleluja," (Psalm. 106:48);

"Benedicamus Jah ex nunc et in aeternum, Alleluja," (Psalm. 115:18);

"Omnis anima laudet Jah, Alleluja," (Psalm. 150:6).

(Praeter alibi, ut Psalm. 105:45; Psalm. 106:1; Psalm. 111:1; Psalm. 112:1; Psalm. 113:1, 9; Psalm. 116:19; Psalm. 117:2; Psalm. 135:3; Psalm. 148:1, 14; Psalm. 149:1, 9; Psalm. 150:1).

Quod sit propter rejectionem Babyloniorum, patet ex capite praecedente, in quo de Babyloniis actum, quare dicitur "Post haec;" et ex sequentibus (in vers. 2, 3), in hoc capite. Quod sint Angeli inferiorum Caelorum, qui per "turbam multam in Caelo" intelliguntur, constat ex versu 4, hujus capitis, ubi dicitur, quod "viginti quatuor Seniores et quatuor Animalia adoraverint Sedentem super Throno, dicentes Amen, Alleluja," per quos intelliguntur Angeli superiorum Caelorum.

Fußnoten:

808. (Vers. 4.) "Et prociderunt Seniores viginti quatuor et quatuor Animalia, et adoraverunt Deum Sedentem super Throno, dicentes; Amen, Alleluja," significat adorationem Domini ut Dei Caeli et Terrae, ac ut Judicis universi, ab Angelis superiorum Caelorum, et confirmationem gratiarum actionis, confessionis et celebrationis Ipsius ab Angelis inferiorum Caelorum factarum. - Per "procidere et adorare" significatur humiliatio et ex humilatione adoratio, ut supra (370); per "viginti quatuor Seniores et quatuor Animalia" significantur Caeli superiores (369); per "Sedentem super Throno" intelligitur Dominus ut Deus Caeli, ac ut Judex universi, quoniam per "Thronum" significatur Caelum et regnum ibi (14, 221, 222), et quoque judicium; hic judicium, quia de judicio super Babele, de quo praecedit: quod "Sedens super Throno" sit Dominus, videbitur infra: per "Amen, Alleluja" significatur confirmatio gratiarum actionis, confessionis et celebrationis ab Angelis inferiorum Caelorum factarum; per "Amen" significatur confirmatio et consensus ex veritate (23, 28, 61, 371, 375) ¹ , et per "Alleluja" significatur gratiarum actio, confessio et celebratio Domini (803); quod sint quae ab Angelis inferiorum Caelorum factae sunt, est quia illi primum locuti sunt et celebrabant Dominum ut Deum Caeli, Judicem et Vindicem, et dicebant "Alleluja," ut patet a vers. 1 et 2, et ab explicatione supra (803, 804); confirmatio illorum ab Angelis superiorum Caelorum significatur per "Amen, Alleluja."

Quod "Sedens super Throno" sit Dominus, patet ex Apocalypsi 1:4; 2:8; 3:21; 4:2-6, 9; 5:13; 6:16; 7:9-11; 22:1, 3);

in quibus locis dicitur "Deus" et "Agnus" "super Throno;" per "Deum" ibi intelligitur Ipsum Divinum Domini quod Pater vocatur, et per "Agnum" Divinum Humanum quod Filius vocatur (269, 291), ita Solus Dominus; hoc etiam patet a cap. 7, ubi dicitur,

"Agnus Qui in medio Throni pascet illos," (vers. 17);

et apud Matthaeum,

"Quando sedebit Filius Hominis super Throno gloriae Suae," judicaturus, (19:28);

"Quando venerit Filius Hominis in gloria Sua, et omnes Angeli cum Ipso, tunc sedebit super Throno gloriae Suae," (25:31).

Fußnoten:

832. (Vers. 18.) "Ut comedatis carnes regum, et carnes chiliarchorum, et carnes fortium, et carnes equorum et sedentium Super illis et carnes (omnium) liberorum et servorum, et parvorum et magnorum," significat appropriationem bonorum a Domino per vera Verbi et doctrinae inde, in omni sensu, gradu et genere. - Nunc supra (831) actum est de conjunctione cum Domino per Verbum; hic de appropriatione bonorum ab Ipso per vera Verbi: per "comedere" significatur appropriatio (89); per "carnes" quas comederent, significantur bona Verbi et inde Ecclesiae: ac per "reges, chiliarchos, fortes, equos, sedentes super illis, liberos et servos, minores et majores" significantur vera in omni sensu, gradu et genere; per "reges" significantur qui in veris Ecclesiae ex Verbo sunt, et abstracte vera Ecclesiae ex Verbo (20, 483); per "chiliarchos" significantur qui in cognitionibus boni et veri sunt, et abstracte cognitiones illae (337); per "fortes" significantur qui in eruditione ex doctrina e Verbo sunt, et abstracte eruditio inde (337); per "equos" significatur intellectus Verbi, et per "insidentes super equis" significantur qui in sapientia ex intellectu Verbi sunt, et abstracte sapientia inde (298, 820); per "liberos et servos" significantur qui ex se sciunt et qui ex aliis (337, 604); per "parvos et magnos" significantur qui in minori et majori gradu (527, 810). Ex his patet, quod per "comederent carnes illorum" significetur appropriatio bonorum a Domino per vera Verbi et doctrinae inde in omni sensu, gradu et genere. Sciendum est quod non aliquod bonum spirituale sit ulli homini a Domino quam per vera ex Verbo: vera enim Verbi sunt in luce Caeli, et bona sunt in calore illius lucis; quare nisi intellectus sit in luce Caeli per Verbum, non potest voluntas venire in calorem Caeli. Amor et charitas non potest formari quam per vera ex Verbo; non potest homo reformari quam per vera inde. Ipsa Ecclesia apud hominem formatur per illa, sed non per vera illa in solo intellectu, sed per vitam secundum illa; ita intrant vera in voluntatem, et fiunt bona; vertitur sic facies veri in faciem boni: quod enim est voluntatis et sic amoris, hoc vocatur bonum; et omne quod voluntatis seu amoris est, id etiam vitae hominis est. Ex his videri potest, quod appropriatio boni per vera in omni sensu, gradu et genere, per Verbum a Domino, hic per "comedere carnes" illorum qui nominantur, intelligatur. Quis non potest videre quod non carnes per "carnes" hic intelligantur; quis potest tam insanus esse, ut credat quod Dominus vocet et convocet omnes ad magnam Caenam, ut det illis comedere carnes regum, chiliarchorum, fortium, equorum, insidentium illis, liberorum et servorum, parvorum et magnorum; quis non videre potest, quod in his Sensus spiritualis sit, et quod absque illo Sensu nemo sciat quid haec significant; quis sustinet negare quin Verbum in sinu spirituale sit; annon id plus quam materiale foret, si illa secundum Sensum literae, et non secundum Sensum spiritualem, intelligerentur. Similia illis sunt haec apud Ezechielem:

"Sic dixit Dominus Jehovih, Dic avi omnis alae, et omni bestiae agri, Congregamini et venite; congregate vos a circuitu super sacrificium Meum magnum super montibus Israelis, ut comedatis carnem et bibatis sanguinem: carnem fortium comedetis, et sanguinem principum terrae bibetis, comedetis adipem ad satietatem, et bibetis sanguinem usque ad ebrietatem de sacrificio Meo quod sacrifico vobis; satiabimini super mensa Mea Equo et Curru et omni Viro belli: sic dabo gloriam Meam inter gentes," (39:17-21); ¹

per "carnem" hic similiter significatur bonum Ecclesiae a Domino per Verbum, et per "sanguinem" verum Ecclesiae: quis non videt quod non sanguis daretur ad bibendum usque ad ebrietatem, et quod (non) satiarentur super Mensa Domini Jehovih equo, curru, forti et omni viro belli. Cum itaque per "carnem" significatur bonum Ecclesiae, et per "sanguinem" verum Ecclesiae, patet manifeste quod per "Carnem et Sanguinem" Domini, in Sacra Caena, significetur Divinum Bonum et Divinum Verum a Domino; simile quod per "Panem et Vinum" (de quibus, Johannes 6:51-58). "Caro" significat bonum etiam multis aliis in locis in Verbo, ut in his:

"Removebo cor lapidis a Carne eorum, et dabo illis cor Carnis," (Ezechiel 11:19; 36:26);

"Desiderat te Caro mea in terra siccitatis," (Psalm. 63:2 (B.A. 1));

"Cor meum et Caro mea jubilant erga Deum vivum," (Psalm. 84:3 ² (B.A. 2));

"Caro mea habitabit confidenter," (Psalm. 16:9);

"Cum videris nudum et obtexeris eum, et a Carne tua non absconderis te," (Esaias 58:7).

Fußnoten: