Malureina 22

¹ Izarel pathlazy cha sie lymâ ei ta, Zerikô dady Zawdâh kiapâh liata Môaba bypizy liata yna su tao ta.

² Zipô sawchapawpa Balaka chata Izarel mozy ta Amawri sahlao ama taonazie zydua cha pahno ta.

³ Môaba sahlaozy chata chyhsazy cha chi ngaita ei ta, hluh tlôh ei ta; Izarel pathlazy vâna chata Môaba sahlaozy cha ama nôpo ta.

⁴ Môaba mozy chata Midia sahlao machâzy hnohta, “He zawpizy heta viahchao ta sibipa a bâpa hawhta eima chheipâh liata chyhsa zydua ama bâ khai aw na,” tah ei ta. Cha nona chata Zipô sawchapawpa Balaka cha Môaba beipa châ ta.

⁵ ano chata, “Pachâ teh, phopi miakha Izi râh tawhta a vaw puapa sahlao y ei ta; leilô bie ei ta, eima chheipâh liata y ei ta.

⁶ Ngiachhiepata ta a vy la, he chyhsazy lâta chhie maniah sapa teh; kei châta cha ama tha a tlô tu haw, thiepa ta, pahniepa ta, eima râh tawhtapa he eima papua thei ngyu la; byhnâ na awpa maihzy cha byhnâ awpa ta y ei ta, chhie na sapa maihzy cha chhiesapa ta ama y tyh, tahpa pahno tlôh na ta,” tahpa ta aw awpa ta, a pathlazy yna râh chavah kiah liata Pethaw liata Beôra sawchapawpa Balama lâta chyhsa tuah ta.

⁷ Môaba machâzy nata Midia machâzy cha pachaopa tyh awpa cheipa ta pua haw ei ta; Balama lâna cha kei tlô ei ta, Balama bietapa cha kei chho ei ta.

⁸ Ano chata ama hnohta, “Atazâ he liata a rie ula, ABEIPA ta eina chhopa hawhta nama hnohta bie ei cha tlô khei aw ei,” tah ta; chatanachata Môaba molaipazy cha Balama hnohna chata a rie ei ta.

⁹ Balama hnohta Khazohpa a vy ta, “Na hnohta chyhsazy he, ahyzy e ama châ?” tah ta.

¹⁰ Balama chata Khazohpa hnohta, “Zipô sawchapawpa Môaba beipa Balaka chata ei hnohta.

¹¹ ‘Pachâ teh, Izi râh tawhta a vypa phopi chata leilô bie ei ta, a vy la, chhie mania sapa teh; adyuhpa ta ei papua thei ngyu la,’ tahpa ta chyhsa a vaw tuah,” tah ta.

¹² Khazohpa ta Balama hnohta, “Ama hnohta na sie awpa châ vei; cha chyhsazy lâta chhie na sa awpa châ vei, byhnâ a hmôpa ama châ na,” tah ta.

¹³ Balama cha myta thyu ta, Balaka molaipazy hnohna chata, “Nama râh lâ kua heih teh u; ABEIPA ta nama hnohta sie awpa ta pasai vei,” tah ta.

¹⁴ Chatanachata Môaba molaipazy cha thyu ei ta, Balaka lâta vawh ei ta, “Balama chata eima hnohta a vy khoh vei,” tah ei ta.

¹⁵ Balaka chata molaipa a hluh via, ama hlâta a rôhnah viapa tuah heih ta.

¹⁶ Balama lâta kei tlô ei ta, a hnohta, “Zipô sawchapawpa Balaka chata hetana heta a tah: ‘Kei lâta nâ vy awpa he, khâpahmah cha pakhâ khah se.

¹⁷ chyhsa rôhnah ngaitapa ta cha tao aw na ta, ei hnohta na reipa maih ei tao lymâ aw; chavâta a vy tlai la, he chyhsazy he chhiesapa teh, a tah,” tah ei ta.

¹⁸ Balama chata Balaka chakaotuhpazy a chhy ta, ama hnohta, “Balaka heta a o cha tâkâ nata ngôh ta a biepa ta na pie hrasala, khâpa ta hmahta ABEIPA ei Khazohpa bie paraopa ta tao thei va na.

¹⁹ Chavâta ABEIPA ta ei hnohta khâpa ma a reih heih aw, atazâ chhao, he liata a rie heih tua teh u,” tah ta.

²⁰ Cha zâ liana chata Balama hnohta Khazohpa cha a vy ta, a hnohta, “He chyhsazy he nâma aw awpa ta a vypa ama châ khiahtala, thyu la, ama hnohta sie teh; anodeikuacha na hnohta ei reipa deita he na tao awpa a châ,” tah ta.

²¹ Balama cha myta thyu ta, a alâ ky padia ta, Môaba molaipazy hnohna chata sie haw ta.

²² Châhrasala a siepa vâna chata Khazohpa cha a pathi-ia ta; ABEIPA vâlyuhchâpa cha a dyuhtuh awpa ta lâpi liata a vaw duah ta. A alâ chô liata a kiahpa châ ta, a chakaotuhpazy pano a hnohta y hra ei ta.

²³ Alâ chata ABEIPA vâlyuhchâpa zaozi chabapa ta lâpi liata a duahpa cha hmô ta; alâ cha lâpi tawhtapa cha tlei ta, lyurâhpa lâta sie ta; Balama chata alâ cha lâpi lâta pakuasa a chhuahpa ta chhei ta.

²⁴ ABEIPA vâlyuhchâpa cha kresadô dôhna nata dôhna likawh lâpi buahpa liana chata a duah ta.

²⁵ Alâ chata ABEIPA vâlyuhchâpa cha hmôta, a dôhna cha a kei hnieh ta, Balama phei cha a dôhna liata cha-ie ta; chatanachata chhei heih ta.

²⁶ ABEIPA vâlyuhchâpa cha a khô via lâta vaw heih ta, su buahpa liata chachâh lâ tlyma, chavei lâ tlyma, tleina y leipa liata a duah ta.

²⁷ Alâ chata ABEIPA vâlyuhchâpa a hmô no ta, Balama cha a byukhei haw ta; Balama cha a pathi-ia ta, a chôchahrei ta alâ cha chhei ta.

²⁸ ABEIPA ta alâ bie pareisa ta, Balama hnohta, “Kheihta ei chatah pa vâta ma, he hawhta ei thôh tlai eina chhei chi?” tah ta.

²⁹ Balama ta alâ hnohna chata, “Eina taolapa vâ chita a châ, zaozi chhochhi chaba aw sala, ei cha thie ha aw,” tah ta.

³⁰ Alâ chata Balama hnohta, “Atahmâ taihta na kia tyhna, na alâ châ vana mâ? He hawhna heta ei cha tao beih ma? tah ta. Ano chata, “Tao beih va chi,” tah ta.

³¹ ABEIPA ta Balama mo pavâhsa ta, ABEIPA vâlyuhchâpa zaozi chabapa ta lâpi liata a duahpa cha hmô haw ta; a bôh ta, a hmia alei lâ a bôhpa ta pao ta.

³² ABEIPA vâlyuhchâpa chata a hnohta, “Khazia e, he hawhta ei thôh dua na alâ na chhei? Pachâ teh, na taonazie cha ei mohmô liata raona a châpa vâta cha pakhâ awpa ta ei vaw pua.

³³ alâ chata na hmô ta, ei hmiakô liata ei thôh a tlei, tlei vei chhochhi sala ano cha pahropa ta ei cha thie ha ngyu aw,” tah ta.

³⁴ Balama chata vâlyuhchâpa hnohta, “Ei vaw molei ha na, eina pakhâ awpa chita lâpi liata nâ duah tahpa pahno tlôh lei khâh na ta. Chavâta nâ ly leipa khiahtala ei kua heih aw na,” tah ta.

³⁵ ABEIPA vâlyuhchâpa chata Balama hnohta, “He chyhsazy hnohna heta sie la, anodeikuacha na hnohta ei bie rei awpa deita he na reih awpa a châ,” tah ta. Chatanachata Balama cha Balaka molaipazy hnohna chata sie haw ta.

³⁶ Balaka ta Balama a vy tahpa a thei nahta, Arnaw lâta ama râhri rakha, râhri chhânapa, Môaba khihpi taihta kei dy ta.

³⁷ Balaka chata Balama hnohta, “Phahnai khoh ngaitapa ta cha aw awpa ta chyhsa tuah vana mâ? Khazia ei hnohta nâ vy khoh vei, chyhsa rôhnah ngaitapa ta cha tao thei vana mâ? tah ta.

³⁸ Balama chata Balaka hnohta, “Pachâ teh, a vy ha na ta! Kheihawhpa rai rei theina ei hnei ma? Khazohpa ta ei pakah liata bie a sopa deita ei reih awpa a châ,” tah ta.

³⁹ Chatanachata Balama hnohta sie haw ta, Kyzalhuzô tlô ei ta.

⁴⁰ Balaka cha viahchao tôhpa nata mietahkupa ta atheih ta, Balama nata a hnohta molaipa a ypazy cha paphao ta.

⁴¹ A mylâ myta Balaka chata Balama a chhi ta, Baal su sâhpazy liana chata khy khei ta, cha tawhna chata zawpi yna zydua cha hmô theipa châ ta.