Nehemia 2

¹ Kei cha abei nyu a hlâtuhpa châ tlôh na ta. Abei Artazerzia kô syno a bei kô Nisan thla liata, kresawti ama vaw pie nahta, kresawti cha la na ta, abei cha pie na ta. Cha hlâta cha a hmiakô liata pachârôhna hmia phaoh beih leipa na ta.

² Chatawhcha abei chata ei hnohta, “Na tlâh leipa châ tlôh leipa ta kheihta zie ta e pachârôhpa hmia na phaoh tly. Hmo hropa châ aw vei, na palôhrupa lâta a pachârôhpa a châ he,” na tah ta. Chatanachata chi ngaita na ta.

³ Kei chata abei hnohta, “Beipa cha chhâzaw ta hroh mawh sy! Na pathlatuhpa zy thlâ yna khih cha roryhrâpa ta, a ochhi zy cha mei ta kâ khai ha tlôh ta, pachârôh hmia a phaoh lei thei awpa ma ei châ tly,” tah na ta.

⁴ Chatanachata abei chata ei hnohta, “Khâpa e na hiah khoh?” tah ta. Chatanachata avâ Khazohpa lâta thlahchhâ na ta, abei lâna chata, “Beipa a ryh atahna zie a châ nata na chakaotuhpa heta na modypa ei châ khiahtala, Zudah râh liata na pathlatuhpa zy thla yna khih lâta na pasiesa la, khih cha ei kei padua heih aw,” tah na ta.

⁶ Chatawhcha abei chata ei hnohta (abeinô chhao a kiapâh liata a tyuh ta), “Khachâ e hawh aw chi ta, khatita e nâ vy heih aw?” na tah ta. Chatanachata abei chata aly ngaitapa ta na pasiesa haw ta; chatawhcha keima ta daihti taih na ta.

⁷ Cha dei leipa ta abei hnohna chata, “Beipa a ryh a tahna zie a châ khiahtala, Chavah Haosâ lâta ryureituhpa zy hmô awpa ta Zudah râh ei tlôna taihta eina pasiesa lymâ awpa pasaih nawpa ta chazy na pie la;

⁸ chatawhcha abei thothi a vaihtuhpa Asapha hmô awpa ta a vaihna kuh ochhi chhaichhi châta zy, khihpi kuh châta zy, ei kei pahrâ nawpa o châta zy, tho eina pie thei nawpa ta cha na pie hra teh”, tah na ta. Chatawhcha ei Khazohpa eina khokheina lymâ hawhta abei chata na pie ta.

¹⁰ Châhrasala Hôrô chyhsa Sanbala nata Amawna chyhsa chakaotuhpa Tobiah zy ta ama vaw thei nata, Izarel pathlazy huhiehna a pachâtuh awpa ta chyhsa amâ vy tahpa ta ama pachârôh kaw ta.

¹¹ Chatanachata Zerusale kei tlô nahta, noh thôh y na ta.

¹² Chatawhcha zâ ta thyu na ta, keima nata mo hropa a chyhta zy chhaota, Zerusale châta ei tao awpa ei Khazohpa ta ei palôhrupa liata a sopa cha ahyhmah chho leipa na ta. Ei kiana sa dei leipa ta cha sa hropa ei hnohta a ypa y leipa ta.

¹³ Zâ ta saikao ochhi lâta pua na ta, Drakao tikhaorei lâ nata Hnaihny Chhikao lâta sie na ta, Zerusale kuh a chopa nata a ochhi mei ta a kâpa zy cha moh na ta.

¹⁴ Chatawhcha Tikhaorei Chhikao nata Abei Tipo taihta sie lymâ na ta; châhrasala ei kiana sa sie thei nawpa rai y leipa ta.

¹⁵ Chatanachata zâ ta chavah kaw sao na ta, kuh cha moh na ta; chatawhcha kua ha nata, Saikao Chhikao lâna chata angia na ta, cha hawhna chata a di haw na ta.

¹⁶ Ryureituhpa zy chata khataihlâ ei siepa nata khâpa ei tao tahpa chhao pahno veih ei. Zuzy, theihthaipa zy, chyhsa phapa zy, ryureituhpa zy nata mo hropa rai a hriatuh awpa rai chhao chho mâh hra leipa na ta.

¹⁷ Chatanachata ama hnota, “Eima topa a chhiezie he hmô eichi ta, Zerusale roryhrapa ta a y tahpa zy, a ochhizy mei ta a kâ tahpa zy chhao pahno eichi ta. A vy teh u, reipachhiepa eima châ khao lei nawpa ta Zerusale kuh cha sa pathi ei suh u,” tah na ta.

¹⁸ Chatawhcha ei Khazohpa eina khokheina kyh zy chho na ta, ei hnohta abei bie reipa zy chhao. Âmo chata, “Thyu ei suh u, padua tlai ei suh u,” tah ei ta. Chatanachata cha raihria phapa hria awpa ta ama ku tha a patlô ei ta.

¹⁹ Anodeikuacha Hôrô chyhsa Sanbala nata Amawna chyhsa chakaotuhpa Tôbiah nata Arabia chyhsa Kesa ta ama thei nata na pahneisao ei ta, na mohnao ei ta, “Nama hmotaopa he kheihta zie ta ma a châ, abei chô liata atyna ma a châ?” na tah ei ta.

²⁰ Chatanachata âmo cha achhy na ta, “Avâ Khazohpa chata vânoh maniah patosa aw ta, chatanachata keimo a chakaotuhpa zy chata thyu aw pi ta, padua aw pi ta, nâmo deikua chata Zerusale liana heta tovyuh tlyma, biehneina tlyma, khâpahmah hnei aw veih eichi,” tah na ta.