Maka 12

¹ Pakhona biezy ta ama hnohta reih ta, “Chyhsa ahy tlyma kresadô tao ta, a chheipâh cha dôh ta, kresaona khaoh chao ta, o sâhpa sa ta, lyu mokhâhtuhpazy hnohta pathlyu hlao sa ta, râh hlapapi lâta sie ha ta.

² Chatawhcha a thei lyu ti a daih nahta, lyu mokhâhtuhpazy hnohta sei tuah ta, lyu a mokhâhtuhpazy tawhta a kresadô liata a thei a hmô theina awpa ta.

³ Âmo chata sei cha patu ei ta, chhei ei ta, ku ruapa ta pasiesa ei ta.

⁴ Chatawhcha sei hropa ama hnohta tuah heih ta, cha chhao cha a luh liata alô ta vawh ei ta, hmah paphao ei ta, nozachhih ngaitapa ta tao ei ta.

⁵ A hropa tuah heih ta, ano chhao cha thie ei ta; sei hropa a hluhpi chhao thokha chhei ei ta, thokha ama thie hra.

⁶ Chatawhcha pakha, a sawchapawpa kho ngaitapa hnei ta, ‘Ei sawchapawpa he cha ama za aw,’ tahpa ta ano cha a chhâ chaina ta ama hnohta tuah ta.

⁷ Châhrasala cha lyu a mokhâhtuhpazy chata, ‘He chyhsa he ryutotuhpa cha a châ; a vy ula, thie suh u, chatanachata a ryuto awpa cha keimo châta a châ aw,’ a tah ei ta.

⁸ Ano cha patu ei ta, thie ei ta, kresadôh khôtho lâ thy ei ta.

⁹ Chatanachata kresadô a hneituhpa chata kheihta e a vaw tah aw? Lyu a mokhâhtuhpazy cha vaw pahleipadia aw ta, kresadô cha chyhsa hropazy a pie aw.

¹⁰ He Khazohpa châ bie he reih vei eichi ma:‘O satuhpazy alô kho leipa kha,cha tlai cha a ki liata alô pei chaipa vaw châ ha ta;

¹¹ he he Abeipa taopa a châ,eima mohmô liata noâhpa a châ he’?”tah ta.

¹² Chatawhcha ano cha patu a chhuah ei ta, châhrasala zawpizy cha ama chi, cha pakhona bie cha âmo pasiana awpa ta a reih tahpa pahno tlôh ei ta; ano cha siesaipa ta sie syulyu haw ei ta.

¹³ Chatawhcha a bie reipa liata patu awpa ta, Pharisaizy nata Herawda pyzy liata chyhsa ahyzy tlyma a hnohta vaw tuah ei ta.

¹⁴ Âmo cha amâ vy nahta, a hnohta, “Pachutuhpa, a do ngaitapa na châ, ahyhmah a papeisa va chi tahpa eima pahno; ahyhmah ta khakhaipa hnei leipa chi ta, Khazohpa kyh bie na pachu tyh. Kaisara hnohta chhie chei he âna ma, na vei?

¹⁵ Eima pie aw ma, pie aw vei?” tah ei ta. Ano deikua chata ama haiphiana cha pahnopa ta, ama hnohta, “Khazia e eina pasia ei chi? Tâkâ na vaw pie ula, ei vaw moh aw,” tah ta.

¹⁶ Chatawhcha vaw pie ei ta. Ano chata ama hnohta, “He he ahy nohthlahpa nata ahy moh maw?” tah ta. Chatawhcha âmo chata, “Kaisara,” tah ei ta.

¹⁷ Zisu ta ama hnohta, “Kaisara hmozy cha Kaisara hnohta pie ula, Khazohpa hmozy cha Khazohpa hnohta pie châh ei chi,” tah ta. Chatanachata ama noâh ngâsâ ta.

¹⁸ Saduasizy thyuheina y vei a tahpazy cha a hnohta a vy ei ta,

¹⁹ “Pachutuhpa, Mawsi ta chyhsa ahyrai a unawhpa ta saw hnei leipa ta a lahpinô thisai sala, a unawhpa chata a lahpinô cha khupa ta, a unawhpa chata chi a pathlapa awpa a châ tahpa ta maniah a ropa.

²⁰ Unawh pasari y ei ta, a uhthei chaipa ta lahpinô hnei ta, chi pathla leipa ta thi ta;

²¹ a panona chata ano cha hnei ta, thisai heih ta, chi chhao hnei leipa ta; a pathôhna chhao cha cha hawhna hra chata châ hra ta;

²² chatawhcha ama pasari ta hnei sai ei ta, chi rai hnei leipa ei ta. A chhâna lâta cha chanô cha thipâ ha hra ta.

²³ Thyuheina daihti liata ahy lahpinô e a châ aw? Ama pasari chata lahpinô ta hnei chyu tlôh ei ta,” tahpa ta hiahri ei ta.

²⁴ Zisu ta ama hnohta, “He vâna he vei ma nama pachâpasi tyh, Khazohpa châ bie nata Khazohpa hmotaotheina nama pahno leipa vâna heta?

²⁵ Athihpa hry tawhta ama thyuhei nahta, nô nata vah a hnei khao leipa aw ei ta, avâ liata vâlyuhchâpazy hawhta tlao ama châ aw.

²⁶ Chatawhcha thihpazy pathyupa ta ama y awpa kyh cha, Mawsi châbu liata, thobuh liana khata, Khazohpa ta, ‘Kei Abaraha Khazohpa, Aisika Khazohpa nata Zakaw Khazohpa ei châ,’ tahpa ta a chhona bie kha reih beih veih eichi ma?

²⁷ Ano cha athihpa Khazohpa châ leipa ta, ahrohpazy Khazohpa tlao a châ, nama pachâpasi kaw na,” tah ta.

²⁸ Ryhpa pachutuhpazy hryta chyhsa pakha a hnohta a vy ta, ama bie eipa cha vaw nahthlie ta, Zisu ta âmo sahlao cha a pha ngaitapa ta a chhy tahpa pahno ta, a hnohta, “Biepiepa zydua hryta khâpa e rôhnah chai?” tahpa ta hiahri ta.

²⁹ Zisu ta, “A rôhnah chaipa cha he he a châ, ‘Hy Izarel sahlao saih u, nahthlie teh u: Abeipa eima Khazohpa cha Abeipa pakha deita châ ta;

³⁰ “Abeipa nama Khazohpa cha nama pathipalôh tlokhuh ta, nama thlahhmipa tlokhuh ta, nama palôhrupa tlokhuh ta, nama thatlôna tlokhuh ta, kyh na pachâ awpa na a châ,’ tahpa hih.

³¹ A pazi heihpa cha he he a châ, ‘Nâma kyh nâ pachâpa hawhta na vaihzy kyh na pachâ awpa a châ,’ tahpa hih. He hlâna heta biepiepa rôhnah viapa rai y vei,” tahpa ta a chhy ta.

³² Chatawhcha Ryhpa pachutuhpa chata a hnohta, “A hmeihseih tly, Pachutuhpa; bie hmeiseihpa tlaina na reih, Khazohpa pakha ngalâh y ta, ano leipa ta cha a hropa rai y chachei veih ei;

³³ ano cha pathipalôh zydua ta, pahnona zydua ta, thatlôna zydua ta, kyhpachâpa ta eima kyh eima pachâpa hawhta vaihzy kyhpachâpa he, pôhpa raona hlâpa hmopiepa nata atheihna zydua hlâta, a pha via syulyu tahpa he â do tlaina,” tah ta.

³⁴ Chatawhcha so ngaitapa ta a chhy tahpa Zisu ta a pahno nahta, a hnohta, “Khazohpa Khihnarâh tawhta a hla va chi,” tah ta. Cha rakha tawhna chata ahyhmah ta bie hiahri ngâh khao leipa ei ta.

³⁵ Zisu ta achhyna-o liata a pachu hai nota, âmo a chhy ta, “Mesiah cha Davi Sawchapawpa a châ tahpa Ryhpa pachutuhpazy ta kheihtazie ta reih tyhpa ma ama cha?

³⁶ Davi tlai cha Thlahpa Pathaihpa ta,‘Abeipa chata ei Beipa hnohta,na khakhaipazy na pheitlyna ta ei tao khai hlâ lei ta cha,ei chachâh lâta atyuh teh a tah,’tah ta.

³⁷ Davi tlai chata ano cha Abeipa tah tlôh ta; kheihta e a saw a châ thai aw?” tah ta. Chatanacha zawpi ta aly ngaita ei ta, a bie nahthlie ei ta.

³⁸ A pachuna liana chata, “Ryhpa pachutuhpazy liata a chado teh u, âmo cha viahpakao pasihpazy a kypa ta, sôhdaona suzy liata anaohpa khoh tyh tlôh ei ta.

³⁹ Apakhyna-o liata dyuchhai pha chaipazy, kyhchhina liata su pha chaipazy a haw tyh ei ta,

⁴⁰ nôhmei sôhzy nie khai ei ta, haiphiapa ta a pasih ngaitapa ta thlahchhâ tyh ei ta. Cha sahlao cha thata thai lei ama châ via aw,” tah ta.

⁴¹ Tâkâ thyuna byh kiapâh ta a tyuh ta, thyuna byh liata zawpi sahlao tâkâ ama pathlapa cha moh ta. Chyhsa rôhnahpa hluhpizy ta a hluhpi thyu ei ta.

⁴² Chatawhcha nôhmei sipasapa a vy ta, phusâ dipa sâno pathla ta, cha cha paisa sâkha tlu a châ.

⁴³ Zisu chata a pachupazy cha aw ta, “Hmeiseihta ta, ei cha chho ei chuh, tâkâ thyuna byh liata a pathlapa zydua hlâta, he nôhmei sipasapa heta a pathla hluh chai.

⁴⁴ He zydua heta ama hneina laikhôpa pie ei ta; he chanô sipasapa deikua he a kho chaipa, a hnei chhôhpa, a hrona awpa zydua a pie khai,” tah ta.;