1
Chatawhcha cha vaw di ta, abeizy adyuh awpa ta ama pua tyhna daihti chata Zôaba ta pheisaih hluhpi a chhi ta, Amawna pathlazy râh cha parao ta, Rabah khih dôh ei ta. Davi deikua cha Zerusale liata y ta. Zôaba chata Rabah khih cha a dyuh ta, la haw ta.
2
Davi ta ama abei beilakho a kho haipa cha lapa ta; a hrina lâ cha ngôh talent miakha châ ta, lôsôpazy chhao a hlao ta; Davi pakhosa ei ta. Chatawhcha khihpi liatahpa hraona sôh a hluhpi cha la ta.
3
Cha liata zawpi zy cha papua ta, thoâna zy, leipaliena thua pazaopa zy, ahrei zy ta rai pahriasa ta; cha hawhna chata Amawna pathla khihpi zydua cha Davi ta tao ta. Davi nata chyhsa zydua cha Zerusale lâta a di haw ei ta.
4
Cha hnôh lâna chata Philistina mozy nata Keza liata adyuhna y ta; Husa chyhsa Sibekai ta mopahreipa pathlazy hry liatahpa Sipai thie ta; panawhpa ta y haw ei ta.
5
Philistina mozy nata adyuhna y heih ta; chatawhcha Zaira sawchapawpa Elhana ta Kiti chyhsa Kôliatha unawhpa Lahmi thie ta, a sei bi cha bâtlâh hawhta a châ.
6
Katha khih liata adyuhna y heih ta; cha liana chata chyhsa doh sei ngaitapa, a ku chavei chachâh paro miacharu, a phei chavei chachâh paro miacharu, a zydua ta syno nata miapali a hneipa y ta, ano chhao mopahreipa liata a pihpa a châ.
7
Chatawhcha ano chata Izarel mozy kei pahao ta, Davi unawhpa Shimia sawchapawpa Zawnatha chata vaw thie ta.
8
Chazy cha Katha khih liata mopahreipa liata a pihpa châ ei ta; chazy cha Davi nata a chyhsa zy ku liata thi ei ta.