794. "Et vox molae non audietur in te amplius," significat quod illis qui in Religioso isto ex doctrina ejus et ex vita secundum illam sunt, non sit aliqua inquisitio, scrutatio et confirmatio veri spiritualis, quia obstat falsum receptum et confirmatum et sic implantatum.--Per "vocem molae" non aliud significatur quam inquisitio, scrutatio et confirmatio veri spiritualis, imprimis, ex Verbo. Quod haec per "vocem molae" seu per molitionem significetur, est quia per triticum et hordeum, quae moluntur, significatur bonum caeleste et spirituale, et inde per similam et farinam significatur verum ex bono illo: omne enim verum est ex bono; et omne verum quod non est ex bono spirituali, non est spirituale. Dicitur "vox molae," quia spiritualia per instrumentalia, quae sunt ultima naturae, passim in Verbo designantur; sicut spiritualia vera et bona per poculos, phialas, utres, patinas, et plura alia vasa (672). Quod per "triticum" significetur bonum Ecclesiae ex Verbo (315); et quod per "similam ex tritico", significetur verum ex illo bono (778). Quod "mola" significet inquisitionem, scrutationem et confirmationem veri spiritualis, videri potest ex his locis:

Jesus dixit, In consummatione saeculi, "duo erunt in agro; unus assumetur et alter derelinquetur: duae erunt Molentes; una assumetur et altera derelinquetur," (Matthaeus 24:40-41);

per "consummationem saeculi" intelligitur finis Ecclesiae, quando Ultimum Judicium: per "agrum" significatur Ecclesia, quia ibi messis; per "molentes" significantur qui in Ecclesia inquirunt vera; per "assumptos" significantur qui illa inveniunt et recipiunt, et per "derelictos" qui non inquirunt nec recipiunt quia in falsis sunt.

"Abrogabo ex illis vocem gaudii et vocem laetitiae, vocem sponsi et sponsae, vocem Molarum, et lucem lucernae," (Jeremias 25:10); ¹

per "vocem molarum" hic simile significatur quod hic in Apocalypsi.

"Non in pignus accipies Molam aut Molarem, quia animam ille accipit in pignus," (Deuteronomius 24:6);

"mola" hic vocatur "anima," quia per "animam" significatur verum sapientiae et fidei (681).

In opposito sensu per "molam" significatur scrutatio et confirmatio falsi, ut patet ex his locis:

"Juvenes ad Molendum abduxerunt, et pueri in ligno corruunt," (Threni 5:13);

"Sede super pulvere, filia Babelis, sume Molam et Mole farinam, revela crines tuos, revela femur, transi flumina; reveletur nuditas tua, et videatur opprobrium tuum," (Esaias 47:1-3);

"sume molam et mole farinam" significat ut inquirant ac scrutentur, ut confirment falsa.

Poznámky pod čarou:

778. "Et vinum et oleum et similam et triticum," significat quod non illis amplius sit cultus ex veris et bonis caelestibus, quia non intus in cultu habent quae supranominatis correspondent. - Haec similia sunt cum illis quae nunc supra et prius dicta sunt, cum sola differentia, quod per haec significentur bona et vera caelestia; quaenam bona et vera dicuntur caelestia, et quaenam spiritualia, videatur supra (773); et quod, quia haec illis non sunt, nec in cultu eorum sint: nam, ut supra dictum est, bona et vera doctrinae sunt in cultu sicut anima in corpore, quare cultus absque illis est cultus inanimatus; talis est cultus qui in externis est sanctus, in quo non aliquid internum sanctum est. Quod "vinum" significet verum ex bono amoris, videatur supra (316); quod "oleum" significet bonum amoris, videbitur in sequente articulo; per "similam" significatur verum caeleste, et per "triticum" significatur bonum caeleste. Quod per "vinum," "oleum," "similam" et "triticum" significentur vera et bona cultus, est quia ex illis constabant libamina et minchae, quae una cum sacrificiis offerebantur super altari; et per sacrificia ac per munera oblata super altari significatur cultus, principalis enim cultus in illis consistebat.

Quod libamina, quae erant vinum, super Altari una cum sacrificiis oblata fuerint, videri potest Exodus 29:40; Leviticus 23:12-13, 18-19; Numeri 15:2-15; 28:11-15, 18 ad fin.; 29:1-7, seq.; et insuper Esajas 57:6; ¹ 65:11; Jeremias 7:18; 44:17-19; Ezechiel 20:28; Joel 1:9; Psalm. 16:4; Deuteronomius 32:38; Quod etiam oleum super Altari una cum sacrificiis oblatum fuerit, Exodus 29:40; Numeri 15:2-15; 28;

Quod minchae, quae erant ex simila tritici, una cum sacrificiis super Altari oblatae fuerint, Exodus 29:40; Leviticus 2:1-13; 5:11-13; ² 6:7-14 (B.A. 14-21); ³ 7:9-13; 23:12-13, 17; Numeri 6:14-21; 15:2-15; 18:8-20; 28:1-15; 29:1-7; et insuper Jeremias 33:18; Ezechiel 16:13, 19; Joel 1:9; Malachias 1:10-11; Psalm. 141:2; Panes facierum seu propositionis super mensa in Tabernaculo etiam ex simila tritici confecti sunt, (Leviticus 23:17; 24:5-9). ⁴

Ex his videri potest, quod quatuor haec, vinum, oleum simila et triticum fuerint sancta et caelestia cultus.

Poznámky pod čarou: