¹ Locutusque est Dominus ad Moysen, dicens :

² Tolle Aaron cum filiis suis, vestes eorum, et unctionis oleum, vitulum pro peccato, duos arietes, canistrum cum azymis :

³ et congregabis omnem cœtum ad ostium tabernaculi.

⁴ Fecit Moyses ut Dominus imperaverat. Congregataque omni turba ante fores tabernaculi,

⁵ ait : Iste est sermo, quem jussit Dominus fieri.

⁶ Statimque obtulit Aaron et filios ejus. Cumque lavisset eos,

⁷ vestivit pontificem subucula linea, accingens eum balteo, et induens eum tunica hyacinthina, et desuper humerale imposuit,

⁸ quod astringens cingulo aptavit rationali, in quo erat Doctrina et Veritas.

⁹ Cidari quoque texit caput : et super eam, contra frontem, posuit laminam auream consecratam in sanctificatione, sicut præceperat ei Dominus.

¹⁰ Tulit et unctionis oleum, quo linivit tabernaculum cum omni supellectili sua.

¹¹ Cumque sanctificans aspersisset altare septem vicibus, unxit illud, et omnia vasa ejus, labrumque cum basi sua sanctificavit oleo.

¹² Quod fundens super caput Aaron, unxit eum, et consecravit :

¹³ filios quoque ejus oblatos vestivit tunicis lineis, et cinxit balteis, imposuitque mitras, ut jusserat Dominus.

¹⁴ Obtulit et vitulum pro peccato : cumque super caput ejus posuisset Aaron et filii ejus manus suas,

¹⁵ immolavit eum, hauriens sanguinem, et tincto digito, tetigit cornua altaris per gyrum : quo expiato et sanctificato, fudit reliquum sanguinem ad fundamenta ejus.

¹⁶ Adipem vero qui erat super vitalia, et reticulum jecoris, duosque renunculos, cum arvinulis suis, adolevit super altare :

¹⁷ vitulum cum pelle, et carnibus, et fimo, cremans extra castra, sicut præceperat Dominus.

¹⁸ Obtulit et arietem in holocaustum : super cujus caput cum imposuissent Aaron et filii ejus manus suas,

¹⁹ immolavit eum, et fudit sanguinem ejus per circuitum altaris.

²⁰ Ipsumque arietem in frusta concidens, caput ejus, et artus, et adipem adolevit igni,

²¹ lotis prius intestinis et pedibus : totumque simul arietem incendit super altare, eo quod esset holocaustum suavissimi odoris Domino, sicut præceperat ei.

²² Obtulit et arietem secundum in consecratione sacerdotum, posueruntque super caput ejus Aaron et filii ejus manus suas :

²³ quem cum immolasset Moyses, sumens de sanguine ejus, tetigit extremum auriculæ dextræ Aaron, et pollicem manus ejus dextræ, similiter et pedis.

²⁴ Obtulit et filios Aaron : cumque de sanguine arietis immolati tetigisset extremum auriculæ singulorum dextræ, et pollices manus ac pedis dextri, reliquum fudit super altare per circuitum :

²⁵ adipem vero, et caudam, omnemque pinguedinem quæ operit intestina, reticulumque jecoris, et duos renes cum adipibus suis et armo dextro separavit.

²⁶ Tollens autem de canistro azymorum, quod erat coram Domino, panem absque fermento, et collyridam conspersam oleo, laganumque, posuit super adipes, et armum dextrum,

²⁷ tradens simul omnia Aaron et filiis ejus. Qui postquam levaverunt ea coram Domino,

²⁸ rursum suscepta de manibus eorum, adolevit super altare holocausti, eo quod consecrationis esset oblatio, in odorem suavitatis, sacrificii Domino.

²⁹ Tulitque pectusculum, elevans illud coram Domino, de ariete consecrationis in partem suam, sicut præceperat ei Dominus.

³⁰ Assumensque unguentum, et sanguinem qui erat in altari, aspersit super Aaron et vestimenta ejus, et super filios illius ac vestes eorum.

³¹ Cumque sanctificasset eos in vestitu suo, præcepit eis, dicens : Coquite carnes ante fores tabernaculi, et ibi comedite eas ; panes quoque consecrationis edite, qui positi sunt in canistro, sicut præcepit mihi Dominus, dicens : Aaron et filii ejus comedent eos :

³² quidquid autem reliquum fuerit de carne et panibus, ignis absumet.

³³ De ostio quoque tabernaculi non exibitis septem diebus, usque ad diem quo complebitur tempus consecrationis vestræ ; septem enim diebus finitur consecratio :

³⁴ sicut et impræsentiarum factum est, ut ritus sacrificii compleretur.

³⁵ Die ac nocte manebitis in tabernaculo observantes custodias Domini, ne moriamini : sic enim mihi præceptum est.

³⁶ Feceruntque Aaron et filii ejus cuncta quæ locutus est Dominus per manum Moysi.

¹ Applica quoque ad te Aaron fratrem tuum cum filiis suis de medio filiorum Israël, ut sacerdotio fungantur mihi : Aaron, Nadab, et Abiu, Eleazar, et Ithamar.

² Faciesque vestem sanctam Aaron fratri tuo in gloriam et decorem.

³ Et loqueris cunctis sapientibus corde quos replevi spiritu prudentiæ, ut faciant vestes Aaron, in quibus sanctificatus ministret mihi.

⁴ Hæc autem erunt vestimenta quæ faciet : rationale et superhumerale, tunicam et lineam strictam, cidarim et balteum. Facient vestimenta sancta fratri tuo Aaron et filiis ejus, ut sacerdotio fungantur mihi.

⁵ Accipientque aurum, et hyacinthum, et purpuram, coccumque bis tinctum, et byssum.

⁶ Facient autem superhumerale de auro et hyacintho et purpura, coccoque bis tincto, et bysso retorta, opere polymito.

⁷ Duas oras junctas habebit in utroque latere summitatum, ut in unum redeant.

⁸ Ipsa quoque textura et cuncta operis varietas erit ex auro et hyacintho, et purpura, coccoque bis tincto, et bysso retorta.

⁹ Sumesque duos lapides onychinos, et sculpes in eis nomina filiorum Israël :

¹⁰ sex nomina in lapide uno, et sex reliqua in altero, juxta ordinem nativitatis eorum.

¹¹ Opere sculptoris et cælatura gemmarii, sculpes eos nominibus filiorum Israël, inclusos auro atque circumdatos :

¹² et pones in utroque latere superhumeralis, memoriale filiis Israël. Portabitque Aaron nomina eorum coram Domino super utrumque humerum, ob recordationem.

¹³ Facies et uncinos ex auro,

¹⁴ et duas catenulas ex auro purissimo sibi invicem cohærentes, quas inseres uncinis.

¹⁵ Rationale quoque judicii facies opere polymito juxta texturam superhumeralis, ex auro, hyacintho, et purpura, coccoque bis tincto, et bysso retorta.

¹⁶ Quadrangulum erit et duplex : mensuram palmi habebit tam in longitudine quam in latitudine.

¹⁷ Ponesque in eo quatuor ordines lapidum : in primo versu erit lapis sardius, et topazius, et smaragdus :

¹⁸ in secundo carbunculus, sapphirus, et jaspis :

¹⁹ in tertio ligurius, achates, et amethystus :

²⁰ in quarto chrysolithus, onychinus, et beryllus. Inclusi auro erunt per ordines suos.

²¹ Habebuntque nomina filiorum Israël : duodecim nominibus cælabuntur, singuli lapides nominibus singulorum per duodecim tribus.

²² Facies in rationali catenas sibi invicem cohærentes ex auro purissimo,

²³ et duos annulos aureos, quos pones in utraque rationalis summitate :

²⁴ catenasque aureas junges annulis, qui sunt in marginibus ejus,

²⁵ et ipsarum catenarum extrema duobus copulabis uncinis in utroque latere superhumeralis quod rationale respicit.

²⁶ Facies et duos annulos aureos, quos pones in summitatibus rationalis, in oris, quæ e regione sunt superhumeralis, et posteriora ejus aspiciunt.

²⁷ Necnon et alios duos annulos aureos, qui ponendi sunt in utroque latere superhumeralis deorsum, quod respicit contra faciem juncturæ inferioris, ut aptari possit cum superhumerali,

²⁸ et stringatur rationale annulis suis cum annulis superhumeralis vitta hyacinthina, ut maneat junctura fabrefacta, et a se invicem rationale et superhumerale nequeant separari.

²⁹ Portabitque Aaron nomina filiorum Israël in rationali judicii super pectus suum, quando ingredietur Sanctuarium, memoriale coram Domino in æternum.

³⁰ Pones autem in rationali judicii Doctrinam et Veritatem, quæ erunt in pectore Aaron, quando ingredietur coram Domino : et gestabit judicium filiorum Israël in pectore suo, in conspectu Domini semper.

³¹ Facies et tunicam superhumeralis totam hyacinthinam,

³² in cujus medio supra erit capitium, et ora per gyrum ejus textilis, sicut fieri solet in extremis vestium partibus, ne facile rumpatur.

³³ Deorsum vero, ad pedes ejusdem tunicæ, per circuitum, quasi mala punica facies, ex hyacintho, et purpura, et cocco bis tincto, mistis in medio tintinnabulis,

³⁴ ita ut tintinnabulum sit aureum et malum punicum : rursumque tintinnabulum aliud aureum et malum punicum.

³⁵ Et vestietur ea Aaron in officio ministerii, ut audiatur sonitus quando ingreditur et egreditur sanctuarium in conspectu Domini, et non moriatur.

³⁶ Facies et laminam de auro purissimo, in qua sculpes opere cælatoris, Sanctum Domino.

³⁷ Ligabisque eam vitta hyacinthina, et erit super tiaram,

³⁸ imminens fronti pontificis. Portabitque Aaron iniquitates eorum, quæ obtulerunt et sanctificaverunt filii Israël, in cunctis muneribus et donariis suis. Erit autem lamina semper in fronte ejus, ut placatus sit eis Dominus.

³⁹ Stringesque tunicam bysso, et tiaram byssinam facies, et balteum opere plumarii.

⁴⁰ Porro filiis Aaron tunicas lineas parabis et balteos ac tiaras in gloriam et decorem :

⁴¹ vestiesque his omnibus Aaron fratrem tuum et filios ejus cum eo. Et cunctorum consecrabis manus, sanctificabisque illos, ut sacerdotio fungantur mihi.

⁴² Facies et feminalia linea, ut operiant carnem turpitudinis suæ, a renibus usque ad femora :

⁴³ et utentur eis Aaron et filii ejus quando ingredientur tabernaculum testimonii, vel quando appropinquant ad altare ut ministrent in sanctuario, ne iniquitatis rei moriantur. Legitimum sempiternum erit Aaron, et semini ejus post eum.