Arcana Coelestia # 8294
8294. ‘Evacuabo gladium’: quod significet pugnam falsi ex malo continuam, constat ex significatione ‘gladii’ quod sit verum pugnans contra falsum et malum, et in opposito sensu falsum pugnans contra verum et bonum, de qua n. 2799, 4499; et ex significatione ‘evacuare’ seu denudare illum, quod sit pugna continua usque dum hostis stratus est; pugna continua per evaginatum seu evacuatum gladium etiam significatur apud Moschen, Vos dispergam inter gentes, et evacuabo post vos gladium, Lev. 26:33:
apud Ezechielem,
Omnem turmam ejus dispergam in omnem ventum, et gladium evaginabo post illos, 12:14:
apud eundem,
Sic dixit Jehovah, Ecce Me contra te, educam gladium Meum e vagina ejus, et exscindam ex te justum et impium; exibit gladius Meus e vagina sua contra omnem carnem, e meridie septentrionem; ut cognoscant omnis caro quod Ego Jehovah eduxerim gladium e vagina ejus, nec reversurus sit amplius, 1 Ezech. 21:8-10 [KJV Ezech. 21:3-5];
hic ‘evaginare’ seu ‘evacuare gladium’ pro non cessare a pugnando usque dum strati hostes; ita pro pugna continua: pugna continua contra 2 mala et falsa etiam significatur per Gladium evaginatum principis exercitus Jehovae, qui visus Joschuae, cum venit in terram Canaanem, Jos. 5:13,
quo significabatur quod pugnarent contra gentes ibi et destruerent illas; per ‘gentes’ quae terram Canaanem tunc possederunt significantur qui ante Adventum Domini 3 occuparunt regionem caeli quae 4 postea dabatur illis qui e regno spirituali Domini, n. 6914, 8054.
Poznámky pod čarou:
1. The editors of the third Latin edition made a minor correction here. For details, see the end of the appropriate volume of that edition.
2. falsa et mala
3. Either occuparunt or occuparent altered to occupabant
4. The following two (or in some cases more) words are transposed in the Manuscript.
