Arcana Coelestia # 5215
5215. ‘Et exustae euro’ quod significet plena cupiditatum, constat ex significatione ‘exuri euro’ quod sit consumi ab igne cupiditatum; ‘eurus’ enim et ‘oriens’ in genuino sensu est amor in Dominum et amor erga proximum, n. 101, 1250, 3249, 3708, 1 3762; inde in opposito est amor sui et amor mundi, proinde 2 concupiscentiae et cupiditates, nam hae sunt amorum illorum; de his praedicatur ‘ignis’ ex causa de qua n. 5071, consequenter ‘exuri’.
[2] Sunt enim binae origines caloris, sicut quoque sunt binae origines lucis, una origo caloris est ex sole mundi, altera origo caloris est ex sole caeli, qui est Dominus; quod sol mundi calorem effundat in suum mundum et in omnia quae ibi sunt, notum est; quod autem sol caeli calorem infundat in universum caelum, non ita notum est; 3 at usque notum esse potest si modo reflectatur super calorem qui intrinsecus in homine est, et non commune habet cum calore mundi, hoc est, super calorem qui vitalis vocatur; inde sciri posset quod hic calor alius indolis sit quam calor mundi, quod nempe ille sit vivus, hic autem prorsus non vivus, et quod ille calor, quia vivus, accendat interiora hominis, nempe ejus voluntatem et intellectum, et quod det desiderare et amare, tum affici; inde quoque desideria, amores, affectiones sunt calores spirituales, et quoque ita vocantur; quod calores sint, manifeste patet, ex corporibus enim vivis ab undique exspirat calor, etiam in maximo frigore; et quoque cum increscunt desideria 4 et affectiones, hoc est, amores, tunc in eo gradu incalescit corpus; hic calor est qui in Verbo intelligitur per aestum, ignem, flammam, et 5 est in genuino sensu amor caelestis et spiritualis, ac in opposito sensu amor corporeus et terrestris; inde constare potest quod hic per ‘exuri euro’ significetur consumi igne cupiditatum, et cum praedicatur de scientificis quae 6 sunt ‘aristae graciles’, quod significetur quod plena sint cupiditatum.
[3] Quod per ‘eurum’ seu ventum orientis significentur illa quae cupiditatum et inde phantasiarum sunt, constat a locis in Verbo ubi nominatur, sicut apud Davidem,
Proficisci fecit eurum in caelis, et produxit virtute sua austrum; ac depluere fecit super illos sicut pulverem carnem, sicut arenam maris avem alae, Ps. 78:26, 27;
quod per ‘carnem quam ventus ille adduxit’ significatae sint concupiscentiae, et per ‘avem alae’ phantasiae inde, patet apud Mosen,
Num. 11:31-35, quod ubi plaga populi propter esum carnis, vocatum nomen loci illius ‘sepulcra concupiscentiae, quia ibi sepeliverunt populum concupiscentes’:
[4] apud Ezechielem,
Ecce vitis plantata num prosperabitur? nonne cum attigerit illam ventus orientalis (eurus) exarescet exarescendo? super areolis germinis illius exarescet, 17:10:
et apud eundem,
Vitis evulsa est in ira, in terram projecta est, et ventus orientis arefecit fructum ejus; divulsae sunt et exaruerunt unaquaevis 7 virga roboris ejus; ignis comedit unamquamque, ... exivit enim ignis e virga ramorum ejus, comedit fructum ejus, ut non sit in ea virga roboris, ... sceptrum ad dominandum, 19:12, 14;
ibi ‘ventus orientalis’ seu eurus pro illis quae sunt cupiditatum:
apud Esaiam,
Meditatus est de vento suo duro, in die euri, 27:8:
[5] apud Hoscheam,
Veniet eurus, ventus Jehovae a deserto ascendens, et exarescet scaturigo ejus, et exsiccabitur fons ejus, ille depraedabitur thesaurum omnis vasis desiderii, 13:15;
ibi quoque ‘ventus orientis’ seu ‘eurus’ pro illis quae sunt cupiditatum: similiter apud Jeremiam,
Sicut ventus orientalis dispergam eos coram hoste, 18:17:
[6] apud Davidem,
Per ventum orientalem confringes naves Tarshish, Ps. 48:8 [KJV Ps. 48:7]:
apud Esaiam,
Deseruisti populum Tuum, domum Jacobi, quia repleti sunt 8 euro, et divinatores 9 sicut Philistaei, 2:6:
apud Hoscheam,
Ephraim pascens ventum, et persequitur eurum, omni die mendacium et vastationem multiplicat, 12:2 [KJV 1];
‘ventus’ hic pro phantasiis, et ‘eurus’ pro cupiditatibus: simile etiam per ‘ventum orientalem’ in sensu interno intelligitur, per quem ‘productae sunt locustae’, et per 10 quem ‘locustae conjectae in mare’, Exod. 10:13, 19;
et quoque per quem divisae sunt aquae maris Suph, Exod. 14:21.
Poznámky pod čarou:
1. The editors of the third Latin edition made a minor correction here. For details, see the end of the appropriate volume of that edition.
2. The Manuscript inserts affectiones illorum.
3. sed
4. vel
5. consequenter
6. per aristas graciles significantur
7. (virga) in the Manuscript, Schmidius
8. The Manuscript inserts ab.
9. sunt, in the First Latin Edition
10. But see Arcana Coelestia 7702
Arcana Coelestia # 8940
8940. ‘Et si altare lapidum facias Mihi’: quod significet repraesentativum cultus in genere ex veris, constat ex significatione ‘altaris’ quod sit repraesentativum cultus Divini in genere, de qua n. 921, 2777, 2811, 4489, et ex significatione ‘lapidum’ quod sint vera, de qua n. 643, 1298, 3720, 3769, 3771, 3773, 3789, 3798, 6426, 8609. Est cultus Domini ex bono, et est ex vero; cultus Domini ex bono repraesentabatur per ‘altare ex humo’, et cultus ex vero per ‘altare ex lapide’; de uno et altero cultu videatur supra n. 8935. Quia altare ex lapide' significabat cultum ex vero, idcirco mandatum erat ut tale altare erigeretur cum primum transirent Jordanem et venirent in terram Canaanem, et super illo scriberentur praecepta legis, hoc est, vera Divina e caelo, nam per decem praecepta 1 significantur omnia vera Divina in summa; de altari illo 2 ita apud Moschen, Cum transiveris Jordanem, eriges tibi lapides magnos, et incrustabis eos calce; deinde scribes super illos omnia verba Legis: post aedificabis ibi altare Jehovae Deo tuo, altare lapidum, super quos non impelles ferrum; ex lapidibus integris aedificabis altare Jehovae Dei tui, et facies ascendere super eo holocausta et eucharistica; et scribes super lapides altaris verba Legis probe exprimendo, Deut. 27:1-8; Jos. 8:30-32;
[2] quod scriberentur verba Legis super lapidibus altaris, erat causa quia per ‘lapides’ significabantur vera, et per ‘altare lapidum’ cultus ex veris; illa etiam causa fuit quod decem praecepta, 3 quae significabant Divina Vera in complexu, inscripta fuerint tabulis lapideis; quod id 4 fieret ut primum transiverunt Jordanem, erat causa quia Jordanes, 5 qui a parte deserti erat terminus terrae Canaanis primus et ultimus, significabat 6 introductionem in Ecclesiam seu caelum, quae fit per cognitiones veri et boni, ita per vera ex Verbo, n. 7 4255; omnes enim fluvii qui erant termini illius terrae significabant prima et ultima regni Domini, n. 4116, 4240. Per ‘lapides altaris’ etiam significatur vera fidei apud Esaiam,
Removebit peccatum cum posuerit omnes lapides altaris sicut lapides calcis dispersos, 27:9;
ibi de vastatione Ecclesiae; ‘lapides altaris sicut lapides calcis dispersi’ pro quod ita vera fidei quae cultus. Quod altaria in genere attinet, erant illa ex humo, ex lapidibus, ex aere, ex ligno, et quoque ex auro; ex aere, ligno, et auro, quia haec significabant bonum; de altari ex aere, videatur Ezech. 9:2;
de altari ex ligno, Ezech. 41:22;
et de altari ex auro, quod erat altare suffitus, 1 Reg. 6:22, 7:48; Apoc. 8:3;
quod [aes] significet bonum, videatur n. 425, 1551, quod lignum, n. 643, 2784, 8 2812, 3720, 8354, tum quod aurum, n. 113, 1551, 1552, 5658.
Poznámky pod čarou:
1. The editors of the third Latin edition made a minor correction here. For details, see the end of the appropriate volume of that edition.
2. quo altari
3. The editors of the third Latin edition made a minor correction here. For details, see the end of the appropriate volume of that edition.
4. hoc
5. The editors of the third Latin edition made a minor correction here. For details, see the end of the appropriate volume of that edition.
6. etiam
7. The editors of the third Latin edition made a minor correction here. For details, see the end of the appropriate volume of that edition.
8. The editors of the third Latin edition made a minor correction here. For details, see the end of the appropriate volume of that edition.
