6398. ‘ ¹ Erit Dan serpens super via’: quod significet ratiocinationem eorum de vero quia non adhuc bonum ducit, constat ex repraesentatione ‘Danis’ quod sint qui in vero et nondum in bono, de qua supra n. 6396; ex significatione ‘serpentis’ quod sit ratiocinatio ex sensuali, de qua sequitur; et ex significatione ‘viae’ quod sit verum, de qua n. 627, 2333; ita per ‘Dan serpens super via’ significatur ratiocinatio eorum de vero, quia non adhuc bonum ducit; qualis illa ratiocinatio sit, et quale inde verum, in sequentibus dicetur.

[2] Quod ‘serpens’ sit ratiocinatio ex sensuali, est quia interiora hominis repraesentantur in caelo per animalia varii generis, ac inde in Verbo similia per eadem significantur; sensualia hominis repraesentata fuerunt per serpentes ex causa quia sensualia ² sunt infima apud hominem, et sicut terrestria respective, ac quasi repunt, ut quoque constare potest ex formis per quas fluunt sensualia, de quibus, ex Divina Domini misericordia, ³ alibi; inde sensualia illa repraesentata sunt per ‘serpentes’, usque adeo ut Divinum sensuale Domini repraesentatum sit per ‘serpentem aeneum in deserto’, n. 4211 fin. ;

[3] ac ipsa prudentia et circumspectio, quae ⁴ existit in externis, significata sit per serpentes, apud Matthaeum, Estote prudentes sicut serpentes, et simplices sicut columbae, 10:16;

cum autem homo est in sensuali, remotus ⁵ ab interno ut sunt illi qui in vero et nondum in bono, et ex sensuali loquitur, tunc per ‘ ⁶ serpentem’ significatur ratiocinatio; hic itaque ubi de Dane agitur, ratiocinatio de vero quia non adhuc bonum ducit; alioquin etiam malitia, astutia et dolus significantur per ‘serpentes’, sed per serpentes venenatos, ut per viperas, et similes; horum ratiocinatio est venenum. Quod ‘serpens’ sit ratiocinatio et sensuali, videatur n. 195-197; et quod ‘serpens’ sit omne malum in genere, et quod mala per serpentum genera distinguantur, n. 251, 254, 257.

Poznámky pod čarou: