3658. SENSUS INTERNUS

vers. 1-2. Et vocavit Jischak ad Jacobum, et benedixit illi, et praecepit illi, et dixit illi, Non accipies mulierem e filiabus Canaan. Surge, vade Paddanem Aram, domum Bethuelis patris matris tuae, et accipe tibi exinde mulierem a filiabus Labanis fratris matris tuae. ‘Vocavit Jischak ad Jacobum’ significat perceptionem qualis quoad bonum veri a Domino: ‘et benedixit illi’ significat quod ita conjungeretur: et praecepit illi, et dixit illi significat reflexionem et inde perceptionem: ‘Non accipies mulierem e filiabus Canaan’ significat modo ne conjungeretur affectionibus falsi et mali: ‘surge’ significat modo elevet illud bonum inde: ‘vade Paddanem Aram’ significat cognitiones talis veri: ‘domum Bethuelis patris matris tuae, et accipe tibi exinde mulierem a filiabus Labanis fratris matris tuae’ significat bonum collaterale externum, et inde verum quod conjungendum.