Arcana Coelestia # 3058
3058. Quod ‘haurire aquas’ significet instructionem, tum quoque inde illustrationem, ut in sequentibus hujus capitis, inde est quia ‘aquae’ in sensu interno significant vera fidei, n. 2702, ita ‘haurire aquas’ non aliud est quam instrui in veris fidei, et sic illustrari; ut quoque alibi in Verbo, ut apud Esaiam,
Haurietis aquas in gaudio e fontibus salutis; 1 in die illo confitemini Jehovae, 12:3, 4;
‘haurire aquas’ pro instrui, intelligere et sapere:
apud eundem,
Obviam sitienti adferte aquas, habitatores terrae Tema, 21:14;
‘obviam sitienti adferre aquas’ pro instruere:
apud eundem,
Miseri et egeni quaerentes aquas, et nullae, lingua eorum siti deficit, 41:17;
‘quaerentes aquas’ pro desiderantes in veris instrui, 2 et nullae' pro quod non apud aliquem. Praeterea per ‘haurientes aquas’ in Ecclesia Judaica repraesentabantur illi qui continue scire vera cupiunt, sed propter non alium finem quam ut sciant, 3 usum inde nihil curantes; tales inter vilissimos habiti sunt; ‘Gibeonitae’ illos repraesentarunt, de quibus Jos. 9:21, 23, 27.
Poznámky pod čarou: