2698. ‘Et corrobora manum tuam in illo’: quod significet sustentationem inde, constat a significatione ‘corroborari’ quod sit sustentari, et a significatione ‘manus’ quod sit potentia, de qua n. 878, quae est sustentationis; ‘in illo’, seu puero, est inde, nempe ex spirituali quoad verum: qui in dolore interno sunt ac in desperatione ex privatione veri ii elevantur et sustentantur unice per verum, quia de hoc illis dolor et desperatio: qui in affectione boni sunt, bonum apud eos desiderat bonum sicut esuriens panem, qui autem in affectione veri sunt, bonum apud eos desiderat verum, sicut sitiens aquam. Quid hic ‘corroborare manum in illo’, non alicui intellectum erit nisi a sensu interno.