2362. ‘Ecce quaeso mihi duae filiae, quae non cognoverunt virum’: quod significet affectiones boni et veri, constat a significatione ‘filiarum’ quod sint affectiones, de qua ¹ n. 489-491; ‘quod non cognoverint virum’ significat quod non falsum contaminaverit illas, ‘vir’ enim significat rationale verum, tum quoque in opposito sensu falsum, n. 265, 749, 1007: sunt binae affectiones, nempe boni et veri, videatur n. 1997; illa seu affectio boni, constituit Ecclesiam caelestem, et vocatur in Verbo ‘filia Zionis’, ut et ‘filia virgo Zionis’; haec autem, seu affectio veri, constituit Ecclesiam spiritualem, et vocatur in Verbo ‘filia Hierosolymae’;

[2] ut apud Esaiam,

Sprevit te, subsannavit te filia virgo Zionis, post te caput movit filia Hierosolymae 37:22; 2 Reg. 19:21:

apud Jeremiam,

Quid assimilabo tibi o filia Hierosolymae? quid aequabo tibi, et consolabor te, virgo filia Zionis? Thren. 2:13:

apud Micham, Tu o turris gregis, clive filiae Zionis usque ad te veniet et veniet dominium prius, regnum filiae Hierosolymae, 4:8:

apud Zephaniam,

Jubila filia Zionis, clangite Israel, laetare et exsulta in toto corde filia Hierosolymae, 3:14:

apud Zachariam,

Exsulta valde filia Zionis, clange filia Hierosolymae, ecce rex tuus veniet tibi, 9:9 ² ; Matth. 21:5; Joh. 12:15.

[3] Quod Ecclesia caelestis, seu regnum caeleste Domini, ex affectione boni, hoc est, ex amore in Ipsum Dominum, dicatur ‘filia Zionis’ videatur adhuc, Esai. 10:32; 16:1; 52:2; 62:11; Jer. 4:31; 6:2, 23; Thren. 1:6; 2:1, 4, 8, 10; Mich. 4:10, 13; Zach. 2:14; Ps. 9:15 [KJV Ps. 9:14]; et quod Ecclesia spiritualis, seu regnum spirituale Domini, ex affectione veri, et sic ex charitate erga proximum, dicatur ‘filia Hierosolymae’, Thren. 2:15. De utraque illa Ecclesia; qualis una et qualis altera: pluries in Parte Prima actum est.

[4] Ecclesia caelestis ex eo quod ex amore in Dominum sit in amore erga proximum, assimilatur imprimis filiae innuptae seu virgini, immo etiam vocatur virgo, ut apud Johannem, Hi sunt qui cum mulieribus non polluti sunt, virgines enim sunt: hi sunt qui sequuntur Agnum, quo vadit, ... immaculati enim sunt coram throno Dei, Apoc. 14:4, 5;

ut quoque repraesentaretur hoc in Ecclesia Judaica, injunctum fuit sacerdotibus, ut ‘non viduas, sed virgines in uxores acciperent’, Lev. 21:13-15; Ezech. 44:22.

[5] Ex his quae in hoc versu sunt, constare potest quam purum sit Verbum in sensu interno, tametsi aliter in littera apparet; dum enim haec leguntur, ‘Ecce quaeso mihi duae filiae, quae non cognoverunt virum, educam quaeso eas ad vos, e faciatis eis sicut bonum in oculis vestris, tantum viris illis ne faciatis quicquam’, non aliud quam quoddam impurum subit ideas, imprimis in illorum qui in vita mali sunt; sed usque quam casta haec sint in sensu interno, patet ab explicatione, nempe quod significent affectione: boni et veri, ac beatitudinem quam perciperent ex fruitione earum illi qui Divinum et Sanctum Domini non violant.

Poznámky pod čarou:

1997. ‘Multiplicabo te in valde valde’: quod significet fructificationem affectionis veri in infinitum, constare potest a significatione ‘multiplicari’ quod praedicetur de vero, de qua n. 43, 55, 913, 983; et quia de Domino, significat fructificationem veri ex bono in infinitum, de qua prius n. 1940. Sunt binae affectiones, nempe affectio boni et affectio veri; affectio boni est facere bonum ex amore boni, affectio veri est facere bonum ex amore veri; hae binae affectiones apparent primo intuitu sicut forent eaedem, sed sunt in se distinctae, tam quoad essentiam quam quoad originem; affectio boni, seu facere bonum ex amore boni, est proprie voluntatis; sed affectio veri, seu facere bonum ex amore veri, est proprie intellectus; ita binae hae affectiones inter se distinctae sunt sicut voluntas et intellectus: affectio boni est ex amore caelesti, sed affectio veri est ex amore spirituali; affectio boni non praedicari potest nisi de homine caelesti, sed affectio veri de homine spirituali; quid caeleste et homo caelestis et quid spirituale ¹ seu homo spiritualis, in Parte Prima satis ostensum est. Antiquissima Ecclesia quae fuit ante diluvium, erat in affectione boni, sed Antiqua Ecclesia quae post diluvium, erat in affectione veri, illa enim erat Ecclesia caelestis, haec autem Ecclesia spiritualis; omnes angeli in caelis sunt distincti in caelestes et spirituales, caelestes sunt qui in affectione boni, spirituales qui in affectione veri; illis apparet Dominus ut Sol, his autem ut Luna, n. 1529-1531, 1838; hanc seu affectionem veri Dominus univit affectioni boni quae est facere bonum ex amore boni, cum Humanam Essentiam univit Divinae: inde per ‘multiplicari in valde valde’ significatur fructificatio veri ex bono in infinitum.

Poznámky pod čarou: