2065. Quod ‘benedicam illi’ significet multiplicationem veri constat a significatione ‘benedici’ quod sit locupletari omni bono et vero, de qua in Parte Prima n. 981, 1096, 1420, 1422; hic quia ad Sarah dicitur quod Deus benediceret illi, significatur locupletatio seu multiplicatio veri, nam per ‘Sarah’, ut prius ostensum, repraesentatur et significatur verum boni, quod est verum intellectuale, de quo vero et ejus multiplicatione hic agitur; quid verum intellectuale [sit, ] videatur prius n. 1904.