220. [a] Quid autem "templum" in Verbo significat, etiam dicetur: - "Templum" significat in supremo sensu Divinum Humanum Domini, et in respectivo caelum; et quia caelum, etiam significat ecclesiam, nam ecclesia est caelum Domini in terris; et quia "templum" significat caelum et ecclesiam, etiam significat Divinum Verum procedens a Domino; causa est quia hoc facit caelum et ecclesiam, nam qui recipiunt illud anima et corde, hoc est, fide et amore, illi caelum et ecclesiam constituunt. Quia "templum" illa significat, ideo dicitur "Templum Dei mei"; per "Deum meum", cum a Domino dicitur, intelligitur caelum ac Divinum Verum ibi, quod etiam est Dominus in caelo. Dominus supra caelos est, ac apparet illis qui in caelo Sunt ut Sol. Ex Domino ut Sole ibi procedit lux et calor: lux ibi in sua essentia est Divinum Verum, ac calor ibi in sua essentia est Divinum Bonum; haec duo faciunt caelum in communi et in parte. Divinum Verum est quod intelligitur per "Deum meum": inde est quod in Verbo Veteris Testamenti dicatur "Jehovah" et "Deus"; "Jehovah" ubi agitur de Divino Bono, ac "Deus" ubi de Divino Vero: inde quoque est quod angeli dicantur "dii", et quod "Deus" in lingua Hebraea dicatur Elohim in plurali: inde patet cur dicitur "Templum Dei mei."

(Quod "Jehovah" dicatur ubi agitur de Divino Bono, "Deus" autem ubi de Divino Vero, videatur n. 709, 732, 2586, 2769, 2807, 2822, 3921, 4283, 4402, 7010, 9167.

Quod "Jehovah" dicatur ab esse, ita ab essentia, "Deus" autem ab existere, ita ab existentia, n. 300, 3910, 6905. Quod etiam Divinum Esse sit Divinum Bonum, et quod Divinum Existere sit Divinum Verum, n. 3061, 6280, 6880, 6905, 10579. Et in genere quod bonum sit esse et verum existere inde, n. 5002. Quod angeli dicantur "dii" a receptione Divini Veri a Domino, n. 4295, 4402, 7268, 7873, 8301, 8192. Quod Divinum Domini in caelis sit Divinum Verum unitum Divino Bono, in opere De Caelo et Inferno 13, 133, 139, 140. Quod lux in caelis in sua essentia sit Divinum Verum, et calor ibi Divinum Bonum, utrumque a Domino, in eodem opere, n. 126-140, 275.)

[2] Quod "templum" in Verbo significet Divinum Humanum Domini, et in sensu respectivo caelum et ecclesiam, proinde etiam Divinum Verum, constare potest ex sequentibus his locis:

- Apud Johannem,

Interrogantibus Judaeis, "Quodnam signum nobis monstras, quod hoc facias? respondit Jesus, et dixit iis, Solvite TEMPLUM hoc, in tribus diebus tamen exsuscitabo illud: et dixerunt Judaei, Quadraginta sex annis aedificatum est Templum; Tunc ergo tribus diebus exsuscitabis illud? Sed Ille loquebatur de TEMPLO CORPORIS sui" (2:18-23):

quod "templum" significet Divinum Humanum Domini, hic aperte dicitur; intelligitur enim per "solutionem TEMPLI" et ejus exsuscitationem post tres dies", Ipsius mors, sepultura et resurrectio.

[3] Apud Malachiam,

Ecce Ego mitto angelum meum, qui parabit viam ante Me, et subito veniet ad Templum suum Dominus, et Angelus foederis, quem quaeritis" (3:1);

hic etiam per "Templum" intelligitur Divinum Humanum Domini; agitur enim ibi de adventu Domini, quare per venire ad "Templum suum" significatur ad Humanum suum.

[4] In Apocalypsi,

"Templum non Vidi" in Nova Hierosolyma, "nam Dominus Deus omnipotens Templum illius est et Agnus" (21:22):

agitur ibi de Novo Caelo et de Nova Terra, quando in internis erunt et non in externis; inde dicitur quod "non templum erit", sed "Dominus Deus omnipotens et Agnus": "Dominus Deus omnipotens" est Ipsum Divinum Domini, et "Agnus" est Divinum Humanum Ipsius; unde quoque patet quod Divinum Ipsius in caelis intelligatur per "Templum."

[5] Apud Esaiam,

"Vidi Dominum sedentem super throno alto et elato, et fimbriae ejus implentes templum" (6:1);

per "thronum altum et elatum" super quo Dominus sedere visus est, significatur Dominus quoad Divinum Verum in caelis superioribus; per "fimbrias" autem ejus significatur Divinum Ipsius Verum in ecclesia.

(Quod "fimbriae", cum de Domino, significant Divinum Ipsius Verum in ultimis, videatur n. 9917.)

Quod velum Templi Disruptum sit in duas partes a summo ad imum, postquam Dominus passus est (Matthaeus 27:51; Marcus 15:34 [, 38]; Luc. 23:45 ¹ ),

significaverit unionem Divini Humani Domini cum Ipso Divino Ipsius, videatur in Arcanis Caelestibus (n. 9670 ² ).

[6] Per "templum" significatur Divinum Humanum Domini, et simul caelum et ecclesia, in sequentibus locis:

- Apud Davidem,

"Incurvabo Me versus templum sanctitatis tuae, et confitebor nomini tuo" (Psalmuss 138:2):

apud Jonam,

"Dixi, Expulsus sum a coram oculis tuis, sed tamen addam respicere templum sanctitatis tuae... Et Venit ad Te oratio mea ad templum sanctitatis tuae" (2:5, 8 [B.A. 4, 7]):

apud Habakuk,

"Jehovah in templo sanctitatis ³ suae" (2:20):

apud Matthaeum,

"Vae vobis, duces caeci, qui dicitis, Quicunque juraverit per Templum, nihil est; quicunque vero juraverit per aurum Templi, reus est: stulti et caeci, utrum autem majus est, aurum aut Templum quod sanctificat aurum?" (23:16, 17):

apud Johannem,

Jesus dixit vendentibus in Templo, "Tollite exhinc illa, nec facite Domum Patris mei domum mercaturae: unde recordati sunt discipuli quod scriptum est, Zelus Domus tuae consumpsit Me" (2:16, 17).

[7] Praeterea, multis in locis alibi in Verbo nominatur "templum." Ut sciatur quod per illud intelligatur caelum et ecclesia, tum Divinum Verum procedens a Domino, velim illa loca hic adducere, ne haereat mens in eo, quod solum Templum intelligatur, et non aliquid sanctius; nam Templum quod Hierosolymae sanctum fuit ex eo quod repraesentaverit et inde significaverit sanctum.

Quod "templum" significaverit caelum, patet ab his locis:

- Apud Davidem,

"Invocavi Jehovam, et ad Deum meum clamavi; audivit de Templo suo vocem meam" (Psalmuss 18:7 [B.A. 6]);

apud eundem,

"Bonus dies in atriis tuis prae millibus; elegi ad januam stare in Domo Dei mei, prae habitare in tentoriis impietatis" (Psalmuss 84:11 [B.A. 10]);

apud eundem,

"Justus sicut palma florebit, sicut cedrus in Libano crescet; plantati in Domo Jehovae, in atriis Dei germinabunt" (Psalmuss 92:13, 14 [B.A. 12, 13]);

apud eundem,

"Unum petii a Jehovah ut maneam in Domo Jehovae et ad visitandum mane Templum Ipsius" (Psalmuss 27:4);

apud eundem,

"Quietus ero in Domo Jehovae in longitudinem dierum" (Psalmuss 23:6):

apud Johannem,

Jesus dixit, "In Domo Patris mei mansiones multae sunt" (14:2 ⁴ ).

Quod in illis locis per "Domum Jehovae" et "Domum Patris" intelligatur caelum, patet.

[8] Quod etiam ecclesia, in his:

- Apud Esaiam,

"Domus sanctitatis nostra, et decus nostrum, ubi laudaverunt Te patres nostri, facta est in incendium" (64:10 [B.A. 11]);

apud Jeremiam,

"Deserui Domum meam, dereliqui hereditatem meam" (12:7);

apud Haggaeum,

"Commovebo omnes gentes, ut veniant electio omnium gentium, et impleam Domum hanc gloria;... Mihi argentum et Mihi aurum;... major erit gloria Domus hujus posterioris quam prioris" (2:7-9);

apud Esaiam,

"Dicet Hierosolymae, Aedificare; et Templo, Fundare" (44:28);

agitur ibi de adventu Domini, et de nova ecclesia tunc.

Apud Sachariam,

"Fundata est Domus Jehovae Templum ut aedificetur" (8:9);

similiter.

Apud Danielem,

Belschazar adduci jussit "vasa auri et argenti quae eduxerat Nebuchadnezar pater ejus, quae e Templo Hierosolymae, ut biberent ex illis ac biberunt vinum et laudaverunt deos auri et argenti, aeris, ferri, ligni et lapidis"; et tunc scriptum est in pariete (5:2-4, seq.);

per "vasa auri et argenti quae ex Templo Hierosolymae", significantur bona et vera ecclesiae; per quod "biberint ex illis vinum, et laudaverint deos auri, argenti, aeris, ferri, ligni et lapidis", significatur profanatio illorum; ideo scriptum est in pariete, et ⁵ rex mutatus ab homine in feram.

[9] Apud Matthaeum,

"Accesserunt discipuli ad ostendendum Jesu structuram Templi; Jesus dixit illis, videtis omnia haec? non relinquetur hic lapis super lapide, qui non dissolvetur" (24:1, 2; Marcus 13:1-5; Luca 21:5-7);

quod "non e Templo relinquetur lapis super lapide qui non dissolvetur", significat destructionem et vastationem ecclesiae totalem; "lapis" etiam significat verum ecclesiae; et quia id significabatur, ideo in illis capitibus apud Evangelistas agitur de successiva vastatione ecclesiae.

In Apocalypsi,

"Adstitit angelus dicens, Surge et metire templum Dei et altare, et eos qui adorant in eo" (11:1);

etiam ibi per "templum" significatur ecclesia, et per "metiri" significatur explorare quale ejus. Simile significatur

Per Novum Templum, et ejus mensuras (apud Ezechielem a cap. 40 ad 48).

[10] Quod per "templum" significetur Divinum Verum quod a Domino, constat ex his locis:

- Apud Ezechielem,

"Sustulit se gloria Jehovae desuper cherubo super limen Domus, et impleta est Domus nube; atrium vero plenum erat splendore gloriae Jehovae" (10:4);

per "Domum" ibi intelligitur caelum et ecclesia; ac per "nubem" et per "gloriam" Divinum Verum.

(Quod "nubes" sit Divinum Verum videatur supra, n. 36; et quod similiter "gloria", n. ⁶ 33.)

[11] Apud Micham,

"Ibunt gentes multae et dicent, Ite et ascendamus ad montem Jehovae, et ad Domum Dei" nostri; "ut doceat nos de viis suis, et eamus in semitis Ipsius: nam a Zione exibit doctrina, et Verbum Jehovae) ex Hierosolyma" (4:2);

"mons Jehovae" et "Domus Dei" significat ecclesiam;

similiter "Zion" et "Hierosolyma": "doceri de viis suis et ire in semitis Ipsius", est instrui in Divinis Veris; quare etiam dicitur, "Ex Zione exibit doctrina, et ex Hierosolyma Verbum."

[12] Apud Esaiam,

"Vox ⁷ tumultus ab urbe, Vox Jehovae e templo" (66:6);

per "urbem" intelligitur doctrina veri; per "templum ecclesia; et per "vocem Jehovae" e templo, Divinum Verum.

In Apocalypsi,

"Prodiit vox magna e templo caeli a throno, dicens... (16:17);

"vox" ibi similiter pro Divino Vero: alibi,

"Apertum est templum Dei in caelo, et visa est arca foederis Ipsius in templo, et facta sunt fulgura, voces, tonitrua" (11:19);

"fulgura", "voces", "tonitrua", in Verbo significant Divina vera ex caelo (videatur n. 7573, 8914): alibi,

"Apertum est templum tabernaculi testimonii in caelo, et prodierunt e templo septem angeli, habentes septem plagas:... et impletum est templum fumo ex gloria Dei et Virtute Ipsius" (15:5, 6, 8);

septem angeli dicuntur prodiisse e templo quod in caelo, quia per "angelos" significantur Divina vera (videatur supra, n. 130, 200): quid per "fumum ex gloria Dei" significatur, In explicatione illorum in sequentibus videbitur. Praeterea sciendum est quod per Templum a Salomone exstructum, et quoque per Domum silvae Libani, et per singula illorum (de quibus 1 Reg., 6 et 7), significata sint spiritualia et caelestia quae ecclesiae et caeli sunt.

Poznámky pod čarou:

10579. ‘Quia non videt Me homo et vivit’: quod significet quod ipsum Divinum non videri possit quale in Se est, sed quale per Dominum in caelo, constare potest ex eo quod nemo viderit usquam Jehovam Patrem, sed cum est visus est Dominus qui visus; nam Dominus est ipsa facies Jehovae. Quod nemo viderit usquam Jehovam Patrem, constat ex Ipsius Domini verbis apud Johannem,

Deum nemo vidit unquam; Unigenitus Filius, Qui in sinu Patris est, Ille exposuit, 1:18:

apud eundem,

Non vocem Patris audivistis unquam, neque speciem Ipsius vidistis, Joh. 5:37 ¹ :

apud Matthaeum,

Non Patrem quisquam cognoscit nisi Filius, et cui voluerit Filius revelare, 11:27.

[2] Quod cum Jehovah Pater visus est, sit Dominus Qui visus, docet etiam Dominus apud Johannem,

Jesus dixit, Si cognovistis Me, etiam Patrem Meum cognovistis, et abhinc cognovistis Illum, et vidistis Illum: ² dicit Philippus, Domine, monstra nobis Patrem; dicit illi Jesus, Tantum tempus vobiscum sum, et non nosti Me, philippe? qui vidit Me, vidit Patrem; quomodo ergo tu dicis, Monstra nobis Patrem? 14:7-9

apud eundem,

Abrahamus pater vester exsultavit, ut videret diem Meum, et vidit et gavisus est: amen amen dico vobis, Priusquam Abrahamus fuit, Ego sum, 8:56, 58;

inde constare potest quod Dominus quoad Divinum Humanum sit Jehovah Qui visus, et sic quod sit facies Jehovae.

[3] Quod Dominus sit facies Jehovae, constat etiam ex Verbo, ut apud Esaiam,

Factus est illis in Salvatorem, angelus facierum Jehovae liberavit eos, ob amorem Suum et indulgentiam Suam; Hic redemit eos, et assumpsit eos, et portavit eos omnibus diebus aeternitatis, 63:8, 9:

similiter in Exodo, Ecce Ego mitto angelum ante te, ad custodiendum te in via, et ad perducendum te ad locum quem praeparavi; , custodi a facie Ejus, ne exacerbes Eum, quia non feret praevaricationem vestram: quia nomen Meum in medio Ejus, 23:20, 21;

[4] Jehovah enim ante Domini Adventum in mundum cum apparuit, in forma angeli apparuit, nam cum pertransivit caelum, induit Se illa forma, quae fuit forma humana; nam universum caelum ex Divino ibi est sicut unus homo, prout multis ostensum est ubi de Maximo Homine ³ qui est caelum, actum est, inde tunc Divinum Humanum; et qui Jehovah apparuit in forma humana sicut angelus, patet quo usque esset Ipse Jehovah, et quod ipsa illa forma quoque Ipsius esset, ⁴ quia erat Divinum Ipsius in caelo, hoc fuit Dominus ab aeterno; sed quia illa forma humana assumpta fuit per transitionem per caelum, tamen ad salvandum genus humanum necessarium fuit realiter essentialiter esse homo, ideo ⁵ placuit Ipsi nasci, et sic humanam formam actualiter assumere in qua Ipse Jehovah; quod ita sit, ⁶ docet Dominus apud Johannem,

Credite Mihi quod Ego in Patre, et Pater in Me, 14:11:

et alibi,

Ego et Pater unum sumus, 10:30.

[5] Quod Dominus ab aeterno fuerit, etiam docet apud Johannem,

In principio erat Verbum, et Verbum erat apud Deum, et Deus erat Verbum: omnia per Ipsum facta sunt, et sine Ipso factum est nihil quod factum est. Et Verbum caro factum est, et habitavit inter nos, 1:1-3, 14:

apud eundem,

Exivi a Patre et veni in mundum, iterum relinquo mundum et vado ad Patrem, 16:28 [, 29]:

apud eundem,

Jesus dixit, Glorifica Me Tu, Pater, apud Te Ipsum gloria quam habui antequam mundus esset apud Te, 17:5:

et apud eundem,

Amen amen dico vobis, Priusquam Abrahamus fuit, Ego sum, 8:58;

[6] ex his manifeste cognosci potest quod Dominus etiam quoad Humanum Suum sit Jehovah, ita quod Humanum ⁷ Suum sit Divinum; idcirco ⁸ dicitur apud Johannem, Deus erat Verbum, et Verbum caro factum est, et quoque, Priusquam Abrahamus fuit, Ego sum, et non Ego fui, Sum enim est Jehovah, Exod. 3:14. Ex his nunc constare potest quod per ⁹ 'Me non videt homo et vivit' significetur quod ipsum Divinum non videri possit quale in Se est, sed quale per Dominum in caelo. Per Dominum in caelo dicitur, quia Dominus est supra caelos, est enim Sol caeli, sed usque praesens est in ¹⁰ caelis; ¹¹ est ibi Divinum Verum, et Divinum Verum procedens a Domino ut Sole est Dominus in caelo, est ideo Divinum Verum ibi facies Ipsius.

[7] Dictum est supra quod per ‘facies Jehovae’ significentur Divina interiora Verbi, Ecclesiae, et cultus, n. 10567, 10568; causa est quia Divina interiora Verbi, Ecclesiae, et cultus, sunt Divinum Verum procedens a Domino, ita Dominus in caelo; hoc significatur per ‘faciem Jehovae’ ubi nominatur in Verbo, ut apud Matthaeum,

Videte ne contemnatis ullum ex pusillis his; dico enim vobis quod angeli eorum in caelis semper videant faciem Patris Qui in caelis est, 18:10:

in Apocalypsi,

Thronus Dei et Agni in Sancta Hierosolyma erit, et servi Ipsius ministrabunt Ipsi, et videbunt, facies Ipsius, 22:3, 4:

[8] apud Moschen,

Illuminabit Jehovah facies super ¹² te, et miserebitur tui; tollet Jehovah facies Suas super te, et ponet tibi pacem, Num. 6:25 [, 26]:

apud Davidem,

Multi dicentes, Quis ostendet nobis bonum? tolle super nos lucem facierum Tuarum, Jehovah, Ps. 4:7 [KJV Ps. 4:6]:

apud eundem,

Quousque, Jehovae, occultas facies Tuas a me? Ps. 13:2 [KJV Ps. 13:1]:

apud eundem,

Tibi dixit cor meum, Quaerite facies Meas' facies Tuas, Jehovah, quaero, Ps. 27:8:

apud eundem,

Deus miserebitur nostri, et benedicet nobis, illuminabit facies Suas nobis, Ps. 67:2 [KJV Ps. 67:1]:

apud eundem,

Deus, reduc nos, et lucere fac facies Tuas, ut salvemur, Ps. 80:4, 8, 20 [KJV Ps. 80:3, 7, 19]:

apud eundem,

Beatus populus Tuus, qui in luce facierum Tuarum ambulant, Ps. 89:16 [KJV Ps. 89:15]:

apud eundem,

Jehovah, ne abscondas facies Tuas me, Ps. 102:3 [KJV Ps. 102:2]:

apud eundem,

Abscondis facies Tuas, conturbantur, Ps. 104:29;

[9] quid per ‘facies Jehovae’ hic ¹³ intelligitur, quisque comprehendere potest, quod nempe Divinum, et quicquid Divini est, ita misericordia, pax, et Omne bonum, at in universali sensu Divinum Verum, quoniam in Divino Vero est Omne bonum; et apud hominem et apud angelum est Divinum Bonum in Divino Vero, et absque hoc non est illud, verum enim est recipiens boni, ita quoque misericordiae et pacis; inde nunc sequitur, ¹⁴ ubi non Divinum Bonum in Divino Vero est, ibi non facies Jehovae; ¹⁵ et quoque sequitur quod ubi malum in falso est, Divinum non appareat; hoc intelligitur per ¹⁶ quod Jehovah occultet et avertat facies in sequentibus his locis: apud Esaiam,

Peccata vestra absconderunt facies Jehovae a vobis, 59:2:

apud Jeremiam,

Propter malitiam eorum occultavi facies Meas ab urbe hac, 33:5:

apud Ezechielem,

Averto facies Meas ab illis, et profanant arcanum Meum, 7:22

et apud Micham,

Jehovah occultabit facies Suas ab illis, quemadmodum mala reddiderunt opera Sua, 3:4.

Sed sciendum est quod Jehovah, hoc est Dominus, nusquam avertat facies Suas ab homine, sed quod homo qui in malo est avertat suam faciem a Domino; et quia tunc Divinum ei a tergo est, ideo apparet sicut Id Se ¹⁷ occultet seu avertat; etiam res se actualiter ita habet: spiritus infernales omnes tergum vertunt ad Dominum ut Solem, at angeli semper faciem ad Ipsum; similiter homo quoad spiritum suum dum in mundo vivit.

Poznámky pod čarou: