4
Aquæ nutrierunt illum, abyssus exaltavit illum : flumina ejus manabant in circuitu radicum ejus, et rivos suos emisit ad universa ligna regionis.
Ezechiel 31:4
Apocalypsis Revelata # 409
409. "Et cecidit super tertiam partem fluviorum, et super fontes aquarum significat quod inde omnia vera Verbi prorsus falsificata sint. - Per "fluvios" significantur vera in copia, quia per "aquas" significantur vera (50); et per "fontes aquarum" significatur Verbum (384); quod vera Verbi prorsus falsificata sint, est quia sequitur quod "tertia pars aquarum facta sit absinthium," et per "absinthium" significatur falsum infernale (410). Quod "fluvii" significent vera in copia, constare potest a sequentibus locis:
"Ecce Ego faciens novum, dabo in deserto aquas et in solitudine Fluvios, ad potandum populum Meum, electum Meum," (Esaias 43:19-20);
"Effundam aquas super sitientem, et Fluvios super aridam: effundam spiritum Meum super semen tuum, et benedictionem super natos tuos," (Esaias 44:3);
"Tunc cantabit lingua muti, quia erumpent in deserto aquae, et Fluvii in planitie deserti," (Esaias 35:6); "Aperiam super clivis Fluvios, et in medio vallium Fontes ponam, de sertum in stagnum aquarum, et terram siccam in Scaturigines aquarum," (Esaias 41:18);
"Jehovah super maria fundavit orbem, super Fluviis stabilivit eum, (Psalm. 24:2);
"Ponam in Mari manum Ipsius, et in Fluviis dextram Ipsius," (Psalm. 89:26 (B.A. 25));
"Num Fluviis succensuit Jehovah, num contra Fluvios ira Tua, num contra mare excandescentia Tua, quia equitas super equis Tuis," (Habakuk 3:8);
"Fluvius cujus rivi laetificabunt urbem Dei "(Psalm. 46:5 (B.A. 4)); 1
"Ostendit mihi purum Fluvium aquae vitae, exeuntem e throno Dei et Agni," (22)
"Diffidit petras in deserto, et bibere fecit Abyssos magnas, percussit petram et Fluvii effluxerunt," (Psalm. 78:15-16, 20; Psalm. 105:41);
"Tunc deficient aquae in mari, et Fluvius exsiccabitur," (Esaias 19:5-7; 42:15; 1, 2; Nahum 1:4; Psalm. 107:33; Hiob 14:11) 2
Jesus dixit,"Si quis venit ad Me, sicut dixit Scriptura, Flumina e ventre ejus fluent aquae viventis," (Johannes 7:37-38).
(Praeter alibi, ut Esaias 33:21; Jeremias 16:7, 8; Ezechiel 31:3-4; 47:1-12; Joel 4:18 (B.A. 3:18); Sacharias 9:10; Psalm. 80:12 (B.A. 11); 3 Psalm. 93:3-4; 4 Psalm. 98:7-8; Psalm. 110:7; Numeri 24:6-7; Deuteronomius 8:7).
Quod autem "fluvii" in opposito sensu significent falsa in copia, constare potest ex his:
"Mittet in mari legatos ad gentem conculcatam, cujus terram depraedati sunt Fluvii," (Esaias 18:2);
"Nisi Jehovah esset pro nobis, aquae submersissent nos, et Fluvius transivisset super animam nostram, (Psalm. 124:2, 4-5);
"Cum transibis per aquas, tecum Ego, et per Fluvios non submergent te," (Esaias 43:2);
"Circum dederunt me funes mortis, et Flumina belialis terruerunt me," (Psalm. 18:5);
"Draco ejecit post mulierem ex ore suo aquam sicut Fluvium, ut eam a Flumine absorptam faceret," (Apocalypsis 12:15); "Ecce Jehovah ascendere faciet super vos aquas Fluvii validas et multas, ac inundabit et transibit, et usque ad collum pertinget," (Esaias 8:7-8); 5
"Venerunt Flumina, et irruerunt in domum illam, et tamen non cecidit, fundata enim erat super Petra," (Matthaeus 7:25, 27; Luca 6:48-49);
etiam hic "flumina" pro falsis in copia, quia per "petram", significatur Dominus quoad Divinum Verum: per "flumina" etiam significantur tentationes, quia tentationes sunt inundationes falsorum.
Poznámky pod čarou:
