9489. ‘Ac cubitus et dimidius altitudo ejus’: quod significet plenum quoad gradus, constat ex significatione ‘cubiti et dimidii’ quod sit plenum, de qua mox supra n. 9488, et ex significatione ‘latitudinis’ quod sit gradus quoad bonum et quoad verum; quod altitudo id sit, est quia omne bonum et inde verum procedit ex Domino, et Dominus est in altissimo, et ideo vocatur Altissimus, n. 8153, est enim Sol caeli, n. 5097, 8812, et Sol est supra caelos, et est centrum a quo universum caelum quod ¹ infra est existit et subsistit; omnes altitudines in caelo a Sole ejus ut centro sunt differentiae boni et inde veri; inde qui in intimo caelo sunt, propiores Domino sunt quia in bono amoris in Ipsum, ita in bono prae reliquis; qui in caelo medio sunt distant inde magis, quia in bono inferiore sunt, et magis adhuc qui in caelo ultimo; qui autem in inferno sunt, prorsus Domino remoti sunt, quia in malo et inde falso; hi ne quidem spectant ad Solem, sed retro a Sole; quapropter apparent, cum inspiciuntur a angelis, in situ inverso, pedibus sursum et capite deorsum. Quoniam jam distantiae et spatia in altera vita sunt apparentiae secundum status boni et inde veri, n. 9440, ² ideo ‘altitudo’ in spirituali sensu significat gradus quoad bonum et quoad verum, seu gradus ab Altissimo, Qui est Dominus, ita ipsum Divinum Bonum.

[2] ³ Inde constat quid per ‘altitudinem’ significatur in sequentibus his locis, ut apud Jeremiam,

Venient et canent in altitudine Zionis, et confluent ad bonum Jehovae; et erit anima eorum sicut hortus irriguus, 31:12;

ibi ‘altitudo Zionis’ pro ⁴ bono caelesti, quod est bonum supra bonum spirituale; quia altitudo est bonum, ideo dicitur quod confluent a bonum Jehovae:

apud Ezechielem,

Aschur cedrus in Libano, alta facta est altitudo ejus, et longi facti rami ejus per aquas multas; pulchra fuit magnitudine sua, longitudine ramorum suorum, xxxi [3, ] 5, 7; *********

‘Aschur’ pro rationali illustrato, ‘cedrus in Libano’ pro Ecclesia spirituali, ‘altitudo ejus’ pro gradu ⁵ boni:

[3] apud eundem,

In monte altitudinis Israelis plantabo illum, 17:23:

⁶ et apud eundem,

In monte sanctitatis Meae, et in monte altitudinis Israelis, servient Mihi omnis domus Israelis, 20:40;

‘mons altidudinis Israelis’ pro summo gradu boni et inde veri apud illos qui ab Ecclesia spirituali. Quoniam pleraque in Verbo sensum oppositum habent, ita quoque altitudo, et in eo sensu significat malum amoris sui, ita elationem animi, ut Esai. 14:14 ⁷ ; Ezech. 31:10, 14, 32:5; Amos 2:9; Dan. 4:8, 17 [KJV 11, 20]; et ⁸ pluries alibi. Quod altitudo sit gradus quoad bonum et inde verum, est etiam causa quia ‘altum’ significat internum, et bonum secundum gradus versus interiora perfectus est; quod ‘altum’ sit internum, videatur n. 1735, 2148, 4210, 4599.

Poznámky pod čarou:

4599. ‘Et tetendit tentorium suum ab ultra turrim Eder’: quod significet interiora illius, constat ex significatione ‘tendere tentorium’ quod sit progressio sancti, hic versus interiora; quod ‘tentorium’ sit sanctum, videatur n. 414, 1102, 2145, 2152, 3312, 4391; ex significatione ‘ab ultra turrim’ quod sit in ¹ interiora, de qua sequitur; et ex significatione ‘Eder’ quod sit quale status, nempe progressionis sancti ad interiora; turris illa ab antiquo significationem istam habuit, sed quia in Verbo non ulterius occurrit, praeter apud Joshuam 15:21, non confirmari, sicut alia nomina ² , ex parallelis locis potest. Quod ‘ab ultra turrim’ sit ad interiora, est quia illa quae interiora sunt, exprimuntur ³ per excelsa et alta, ita per ‘montes, colles, turres, tecta domorum’, et similia; causa est quia interiora apparent coram mentibus, quae ex naturalibus mundi per sensualia externa trahunt suas ideas, sicut superiora, n. 2148:

[2] quod ‘turres’ significent interiora, constare quoque potest ex alii locis in Verbo, ut apud Esaiam,

Vinea fuit dilecto Meo in cornu filii olei, quam circumdedit et elapidavit, et plantavit illam vite nobili, et aedificavit turrim in medio illius, 5:1, 2;

‘vinea’ pro Ecclesia spirituali, ‘vitis nobilis’ pro spirituali bono, ‘aedificavit turrim in medio ejus’ pro interioribus veri: similiter etiam in parabola Domini apud Matthaeum,

Homo paterfamilias plantavit vineam, et sepem ei circumposuit, et fodit in ea torcular, et aedificavit turrim, et locavit eam agricolis, Matth. 21:33 ⁴ ; Marc. 12:1:

[3] apud Ezechielem,

Filii Arvad et ⁵ exercitus tuus super muris tuis circumcirca, et Gammadaei in turribus tuis fuerunt, scuta sua suspenderunt super muris tuis circumcirca; hi perfecerunt pulchritudinem tuam, 27:11;

ibi de Tyro, per quam significantur cognitiones boni et veri, seu ii qui in illis sunt; ‘Gammadaei in turribus ejus’ pro cognitionibus veri interioris:

[4] apud Micham,

Regnabit Jehovah super eos in monte Zionis, a nunc et in aeternum, et tu turris gregis, clive filiae Zionis, ad te veniet; et redibit regnum prius, regnum filiae Hierosolymae, 4:7, 8;

describitur ibi regnum caeleste Domini, ejus intimum per ‘montem Zionis’ quod est amor in Dominum, ejus derivativum per ‘clivum filiae Zionis’ quod ⁶ est amor mutuus, qui in spirituali sensu charitas erga proximum vocatur, ejus interiora vera boni per ‘turrim gregis’; quod inde regnum spirituale caelestis, significatur per ‘regnum filiae Hierosolymae’:

apud Davidem,

Laetabitur mons Zionis; exsultabunt filiae Jehudae, propter judicia tua, circumdate Zionem, et circumcingite eam, numerate turres ejus, Ps. 48:12, 13 [KJV Ps. 48:11, 12];

‘turres’ ibi pro interioribus veris quae defendunt illa quae amoris et charitatis sunt:

[5] apud Lucam,

Quicumque non portat crucem suam, et venit post Me, non potest Meus esse discipulus: quis namque cum vult turrim aedificare, nonne prius sedens calculat sumptum, num habeat quae ad perfectionem pertinent?... aut quis rex est pergens ad committendum cum altero rege bellum, nonne sedens prius consultat, num potens sit cum decem millibus occurrere ei qui cum viginti millibus venit contra illum?... [Sic omnis ex vobis, qui non abnegat omnes suas facultates, non potest Meus esse discipulus], 14:27, 28, 31, 33;

qui internum sensum Verbi non scit, is non aliter opinatur quam quod ⁷ comparative ibi locutus Dominus, et per ‘aedificare turrim ⁸ et facere bellum’ non aliud intellectum sit, nesciens quod omnes comparationes in Verbo sint significativae et repraesentativae et quod ‘aedificare turrim’ sit comparare sibi vera interiora, et quod ‘facere bellum’ sit ex illis pugnare; agitur enim ibi de tentationibus quas illi qui ab Ecclesia [sunt] et ibi vocantur Domini discipuli, subeunt; tentationes illae significantur per crucem suam quam portabunt'; et quod nequaquam ex se et suo sed a Domino vincant, significatur per ‘qui non abnegat omnes suas facultates, non potest esse Meus discipulus’; ita haec cohaerent, at si illa quae de turri et [de] bello memorantur, solum comparative absque interiore sensu intelliguntur, non cohaerent; inde patet quid lucis a sensu interno habetur.

[6] Interiora ⁹ illorum qui in amore sui et mundi sunt, ita falsa, ex quibus pugnant, et quibus confirmant religiosum suum, in opposito sensu per turres etiam exprimuntur; ut apud Esaiam,

Deprimetur altitudo virorum, et exaltabitur Jehovah [solus Ipse in die illo; nam dies Jehovae] Zebaoth super omnem superbum et altum, et super omnem elatum, et humiliabitur, et super omnes cedros Libani altas et elatas, et super omnes quercus Bashanis, et super omnes montes altos, et super omnes colles elatos, et super omnem turrim excelsam, et super omnem murum munitum, Esai. 2:11-18;

ubi interiora et exteriora amorum illorum per ‘cedros, quercus, montes, colles, turrim, ¹⁰ et murum’, describuntur, falsa interiora per ‘turrim’; ita quoque interiora per illa quae ‘alta’ sunt; sed cum differentia quod qui in his, nempe malis et falsis sunt, se altos et supra alios credant, sed qui in bonis et veris, se minores et infra alios, Matth. 20:26, 27; Marc. 10:44; at usque bona et vera per ‘alta’ describuntur, quia in caelo propius Altissimo, hoc est, Domino, sunt. Praeterea ‘turres’ in Verbo praedicantur de veris, ‘montes’ autem de bonis.

Poznámky pod čarou: