9741. ‘Et facies atrium habitaculi’: quod significet caelum ultimum, constat ex significatione ‘atrii habitaculi’ quod sit externum caeli, ita caelum ultimum, sunt enim tres caeli, intimum, medium, et ultimum; intimum repraesentatum est per intimum habitaculi, ubi arca testimonii, medium per habitaculum extra velum, ultimum per atrium, de quo nunc agitur. Hoc caelum dicitur atrium, quia in illo sunt qui in bono fidei et nondum in bono charitatis erga proximum; qui in bono charitatis sunt, illi in caelo medio sunt. Qui in caelo ultimo sunt, ¹ quod vocatur atrium, vocantur angelici spiritus; qui in caelo medio, vocantur angeli spirituales; qui autem in caelo intimo, angeli caelestes.

[2] Ipsum bonum fidei, quod est bonum caeli ultimi, etiam est atrium, nam per illud introducitur homo in bonum charitatis erga proximum, quod est bonum medii caeli. Sciendum est quod bonum apud hominem faciat caelum ejus, et quod tale ei caelum sit, quale ei bonum ² ; sunt tria bona quae ordine consequuntur, bonum fidei, bonum charitatis erga proximum, et bonum amoris in Dominum; bonum fidei facit caelum ultimum seu primum, ut supra dictum est, bonum charitatis erga proximum facit caelum medium seu secundum, et bonum amoris in Dominum facit caelum intimum seu tertium.

[3] Ut melius adhuc sciatur quomodo se habet cum caelis, paucis dicetur: caeli distinguuntur in bina regna, in regnum caeleste et in regnum spirituale, et in utroque regno est internum et externum; in interno regni caelestis sunt qui in bono amoris in Dominum, et in externo ejus sunt qui in bono amoris mutui, in interno autem regni spiritualis sunt qui in bono charitatis erga proximum, et in externo ejus sunt qui in bono fidei, videatur n. 9680; externum utriusque caeli ³ est quod vocatur caelum ultimum seu primum et repraesentabatur ⁴ per atrium; inde est quod duplex atrium fuerit circa templum, exterius et interius; atrium exterius pro illis qui in externis regni spiritualis, et atrium interius pro illis qui in externis regni caelestis;

[4] de duobus illis atriis templi Hierosolymitani ⁵ , videatur 1 Reg. 6:3, 36; [2 Reg. ] 21:5;

de atrio exteriore templi novi ⁶ apud Ezechielem,

40:17, 31, 34, 42:1-fin. , et de atrio interiore ibi, 40:23, 28, 32, 44, 42:3, 43:5; inde patet quod in ultimo caelo, quod repraesentabatur per atrium exterius templi ⁷ , sit bonum fidei quod facit illud, et in ultimo caelo, quod repraesentabatur per atrium interius, sit bonum amoris mutui; qui in bono amoris mutui sunt, illi in affectione boni sunt propter bonum, qui autem in bono fidei sunt, illi in affectione veri sunt propter verum, nam bonum dominatur in regno caelesti, verum autem in regno spirituali.

[5] Quod caelum ultimum per ‘atria’ significetur, patet a locis in Verbo ubi nominantur, ut apud Ezechielem,

Sustulit se gloria Jehovae desuper cherubo super limen domus, et impleta est domus nube, et nubes implebat atrium interius, et atrium plenum erat splendore gloriae Jehovae; et vox alarum cheruborum audita est usque ad atrium exterius, 10:3-5;

quia atrium erat repraesentativum caeli ultimi, ideo implebatur illud nube et splendore gloriae Jehovae, sicut ipsa domus, ‘nubes’ enim et ‘gloria’ est Divinum Verum; quod ‘nubes’ id sit, videatur n. 5922, 6343 fin. , 6752, 8106, 8443, et quoque ‘gloria’, n. 8267, 8427, 9429; ‘vox alarum’ est verum fidei ex bono, n. 8764, 9514:

[6] apud eundem,

Sustulit me spiritus, et introduxit me in atrium templi interius; cum ecce implevit gloria Jehovae domum; et audivi loquentem ad me e domo, dicentem, Fili hominis, locus throni Mei, et locus volarum pedum Meorum, ubi habitabo in medio filiorum Israelis in aeternum, 43:4-7;

ibi templum cum atrio dicitur locus throni Jehovae, et locus volarum ⁸ pedum Ipsius, quia templum cum atrio repraesentabat caelum; ‘thronus Jehovae’ est ⁹ caelum spirituale, ¹⁰ , ¹¹ n. 5313, 8625, ‘locus volarum pedum Ipsius’ est caelum ultimum.

[7] Caelum ultimum etiam per ‘atrium’ et per ‘atria’ significatur ¹² in sequentibus his locis:

apud Davidem,

Beatus quem eligis, et appropinquare facis, inhabitabit atria Tua; saturabimur bono domus Tuae, sancto templi Tui, Ps. 65:5 [KJV Ps. 65:4];

quod ‘inhabitare atria’ sit inhabitare caelum, patet:

apud eundem,

Bonus dies in atriis Tuis prae milibus, elegi ad januam stare in domo Dei mei, prae habitare in tentoriis impietatis, Ps. 84:11 [KJV 10]:

apud eundem,

Plantati in domo Jehovae, in atriis Dei nostri germinabunt, Ps. 92:14 [KJV 13]:

apud eundem,

Date Jehovae gloriam nominis Ipsius, ferte munus, et venite in atria Ipsius, Ps. 96:8:

apud eundem,

Laudate nomen Jehovae, laudate, servi Jehovae qui stantes in domo Jehovae, in atriis domus Dei nostri, Ps. 135:1, 2:

¹³ apud Esaiam,

Colligent frumentum et mustum, comedent et laudabunt Jehovam et qui congregaturi illud bibent in atriis sanctitatis Meae, 62:9;

in illis locis ‘atria’ caelis ultimis ¹⁴ , nam caeli interiores vocantur domus Jehovae et templum Ipsius, n. 3720:

[8] apud Johannem, Angelus dixit, Surge et metire templum, et altare, et adorantes in eo, sed atrium quod extra ¹⁵ templum ejice foras, et illud non metiaris, quia datum est gentibus, quae civitatem sanctam conculcabunt menses quadraginta duos, Apoc. 11:1, 2;

‘templum et altare, et adorantes in eo’ sunt Ecclesia et Ecclesiae cultus, ‘atrium extra ¹⁵ templum’ est bonum amoris ¹⁶ mutui, ut supra dictum, ‘gentes quibus datum est civitatem sanctam conculcare’ sunt mala amoris sui et mundi, quae destruunt Ecclesiam, n. 6306; ‘menses quadraginta duo’ simile cum sex septimanis significant, et sex septimanae simile cum sex diebus unius septimanae, nam sex multiplicati in septem sunt quadraginta duo; ‘septimana’ significat integram periodum, majorem vel minorem, n. 2044, 3845; sex dies qui praecedunt septimum, qui sabbatum, significant priorem Ecclesiam usque ad finem, et novae instaurationem ¹⁷ ; sabbatum ¹⁸ est conjunctio boni et veri, ita Ecclesia, n. 8495, ¹⁹ 8510, 8890, 8893, 9274.

Poznámky pod čarou:

3720. ‘Nihil hic nisi domus Dei’: quod significet regnum Domini in ultimo ordinis, constat ex significatione ‘Domus Dei’: in Verbo multis in locis memoratur Domus Dei, et in sensu externo seu secundum litteram significat aedem ubi cultus sanctus, sed in sensu interno significat Ecclesiam, inque sensu universaliore caelum, ac in universalissimo universum regnum Domini; in supremo autem sensu Ipsum Dominum quoad Divinum Humanum; sed in Verbo nunc dicitur Domus Dei, nunc Templum; utrumque simile significat, sed cum differentia quod ‘Domus Dei’ dicatur ubi agitur de bono, at ‘Templum’ ubi de vero; inde patet quod per Domum Dei significetur Ecclesia Domini caelestis, inque universaliore sensu caelum angelorum caelestium, in universalissimo regnum caeleste Domini, ac in supremo sensu Dominus quoad Divinum Bonum; et quod per Templum significetur Ecclesia Domini spiritualis, inque universaliore sensu caelum angelorum spiritualium, in universalissimo regnum spirituale Domini, ac in supremo Dominus quoad Divinum Verum, videatur n. 2048. Quod ‘Domus Dei’ significet caeleste quod boni, et quod ‘Templum’ spirituale quod veri, est inde quia ‘domus’ in Verbo significat bonum, videatur n. 710, 2233, ¹ 2559, 3128, 3652, et quia construebatur ex lignis apud antiquissimos, ex causa quia ‘lignum’ significabat bonum, n. 643, 1110, 2784, 2812; ‘Templum’ autem significat verum quia construebatur ex lapidibus; quod ‘lapides’ sint vera, videatur n. 643, 1296, 1298:

[2] quod ligna et lapides talia significent, non ² modo constat ex Verbo ubi nominantur, sed etiam ex repraesentativis in altera vita; qui enim meritum in bonis operibus ponunt, illa apparent sibi scindere ligna; et qui meritum in veris ponunt, quod nempe crediderint se vera prae aliis novisse, et tamen male vixerunt, apparent sibi scindere lapides; quae saepius mihi visa sunt; inde mihi constare potuit quid significatio ligni ³ et lapidis, nempe quod ligni sit bonum, et lapidis sit verum; pariter ex eo quod quando visa mihi domus lignea, ilico obvenerit idea boni, et cum visa domus lapidea, obvenerit idea veri; de qua re etiam ab angelis instructus sum: inde est cum in Verbo memoratur Domus Dei, angelis obveniat idea boni, et talis boni de ⁴ quali in serie agitur; et cum memoratur Templum, quod obveniat idea veri, et talis veri de ⁴ quali in serie agitur. Inde quoque ⁵ concludi potest, quam alte et penitus recondita ⁶ sunt arcana caelestia in Verbo.

[3] Quod per ‘Domum Dei’ hic significetur regnum Domini in ultimo ordinis, est quia agitur de Jacobo, per quem quod repraesentetur Divinum Naturale Domini, prius saepe ostensum; naturale est in ultimo ordinis, nam in illo terminantur interiora omnia, ac ibi simul sunt, et quia simul ibi sunt, et sic simul conspiciuntur innumerabilia ut unum, est ibi obscurum respective; de obscuro ibi respective, etiam prius aliquoties actum.

Poznámky pod čarou: