7410. Vers. 11-15. Et vidit Pharao quod facta respiratio, et aggravavit cor suum, et non audivit ad illos, quemadmodum locutus Jehovah. Et dixit Jehovah ad Moschen, Dic ad Aharonem, Extende baculum tuum, et percute pulverem terrae, et erit in pediculos in omni terra Aegypti. Et fecerunt ita, et extendit Aharon manum suam baculo suo, et percussit pulverem terrae, et fuit pediculus in homine et in bestia; omnis pulvis terrae factus est pediculus in tota terra Aegypti. Et fecerunt ita magi incantationibus suis ad educendum pediculos, et non potuerunt; et fuit pediculus in homine et in bestia. Et dixerunt magi ad Pharaonem, Digitus Dei hoc; et obfirmatum cor Pharaonis, et non audivit ad illos, quemadmodum locutus Jehovah. ‘Et vidit Pharao quod facta respiratio’ significat quod taedium cessaverit: ‘et aggravavit cor suum’ significat obstinationem: ‘et non audivit ad illos’ significat non oboedientiam: ‘quemadmodum locutus Jehovah’ significat secundum praedictionem: ‘et dixit Jehovah ad Moschen’ significat e novo instructionem: ‘Dic ad Aharonem’ significat influxum legis internae in legem externam: ‘Extende baculum tuum’ significat ut ostenderet potentiam Divinam: ‘et percute pulverem terrae’ significat quod emoveret illa quae damnata sunt in naturali: ‘et erit in pediculos’ significat quod inde exsurgent mala: ‘in omni terra Aegypti’ significat per totam mentem naturalem: ‘et fecerunt ita’ significat effectum: ‘et extendit Aharon manum suam baculo suo’ significat potentiam veri interni per verum externam: ‘et percussit pulverem terrae’ significat quod emoverentur damnata: ‘et fuit pediculus in homine et in bestia’ significat quod mala interiora et exteriora cupiditatum inde: ‘omnis pulvis terrae factus est pediculus in tota terra Aegypti’ significat quod illa ex damnatis: ‘et fecerunt ita magi incantationibus suis ad educendum pediculos’ significat conatum pervertendi ordinem Divinum et effigiandi simile in his quoque: ‘et non potuerunt’ significat quod incassum: ‘et fuit pediculus in homine et in bestia’ significat mala interiora et exteriora cupiditatum: ‘et dixerunt magi ad Pharaonem’ significat perceptionem et ejus communicationem cum illis qui in malis: ‘Digitus Dei hoc’ significat quod potentia ex Divino esset: ‘et obfirmatum cor Pharaonis’ significat obstinationem: ‘et non audivit ad illos’ significat non oboedientiam: quemadmodum locutus Jehovah' significat secundum praedictionem.