10262. ‘Hinem’: quod significet conjunctionis quantum, constat ex significatione ‘hinis’ quae erat mensura liquidorum, hic olei, quod sit conjunctionis quantum, per ‘oleum’ enim significatur Divinum Bonum caeleste Domini, quod est ipsum conjunctivum omnium in caelis, inde per mensuram ejus significatur conjunctionis quantum, et conjunctionis omne. Quod Divinum Bonum caeleste Domini sit ipsum conjunctivum omnium, est quia id est ipsum esse vitae omnium; vivificat enim omnia per Divinum Verum procedens ex Divino illo Bono, et vivificat secundum receptionis quale; angeli sunt receptiones, et quoque homines; vera et bona apud illos dant quale ¹ , secundum id enim fit receptio, ita conjunctio.

[2] ² Binae mensurae quae in usu sancto, memorantur in Verbo, una pro liquidis, quae vocabatur hin, altera pro siccis, quae vocabatur ephah; per hinem mensurabatur oleum et vinum, et per epham farina ³ et simila; mensura hin, quae pro oleo et vino, dividebatur in quattuor, at mensura ephah dividebatur in decem; quod mensura hin divisa fuerit in quattuor, erat causa ut significaret conjunctivum, nam quattuor sunt conjunctio; quod autem mensura ephah divisa fuerit in decem, erat causa ut significaret receptivum, cujus quale designabatur per numeros, nam ‘decem’ significant multum, omne, et plenum; quod ‘quattuor’ sint conjunctio, videatur n. 8877, 9601, 9674, 10136, 10137 et quod ‘decem’ sint multum, omne, et plenum, aeque ac centum, n. 1988, 3107, 4400, 4638, 8468, 8540, 9745, 10253.

[3] Quod mensura hin fuerit pro oleo et vino in sacrificiis, et quo divisa fuerit in quattuor, mensura autem ephah pro ⁴ farina et simila, quae pro minhah in sacrificiis, et quod divisa fuerit in decem, constare potest in Exodo 29:40;

in Lev. 5:11, 23:13;

in Num. 15:3-10, 28:5, 7, 14. Ex his patet quod per ‘hinem’ significetur quantum conjunctionis, et per ‘epham’ quantum receptionis; oleum etiam conjungebat similam, et haec recepit, nam in minhah erat oleum et simila.

[4] Erant praeterea aliae mensurae quae in communi usu, tam pro siccis quam pro liquidis; mensurae pro siccis vocabantur homer et omer, et mensurae pro liquidis korus et bathus; homer continebat decem ephas, et ephah decem omeres; korus ⁵ autem continebat decem bathos, et bathus decem minores partes, de quibus videatur Exod. 16:36; Ezech. 45:11, 13, 24;

[5] at apud Ezechielem, ubi ⁶ de novo templo, exstat alia divisio ephae et bathi, ibi ephah et bathus non dividuntur in decem, sed in sex; et hin ibi correspondet ephae, ut ⁷ patet apud illum prophetam 45:13, 14, 24, 46:5, 7, 11, 14; causa est quia ibi non agitur de bono caelesti et ejus conjunctione, sed de bono spirituali et hujus conjunctione, et ⁸ in regno spirituali correspondent numeri duodecim, sex, et tria, quoniam per ⁹ illos significantur omnia, et cum praedicantur de veris et bonis, omnia veri et boni in complexu; quod illa significentur per ‘duodecim’, videatur n. 3272, 3858, 3913, 7973, quod etiam per ‘sex’, n. 3960 fin. , 7973, 8148, 10217, similiter per ‘tria’, per qui significatur a principio ad finem, ita plenum, et quoad res, omne, n. 2788, 4495, 5159, 7715, 9825, 10127; quod hi numeri ¹⁰ similia involvant, est quia numeri majores simile ¹¹ significant cum simplicibus a quibus per multiplicationem existunt, n. 5291, 5335, 5708, 7973.

[6] Quoniam per ‘hinem’ significatur quantum conjunctionis etiam cum vero spirituali, ideo quoque ad minham ¹² in sacrificiis ex ariete ¹³ sumebatur tertia pars hinis olei, et ad libamen tertia pars vini, Num. 15:6, 7, per ‘arietem’ enim significatur bonum spirituale, n. 2830, 9991. Ex his nunc iterum manifeste patet quod per numeros in Verbo significentur res; ad quid alioquin ¹⁴ fuisset designatio quantitatis et mensurae per numeros toties apud Moschen, et ¹⁵ apud Ezechielem, et alibi?

Poznámky pod čarou:

10217. ‘Quoad numeratos illorum’: quod significet quoad ordinationem et dispositionem, constat ex significatione 'numerare cum de omnibus Ecclesiae, quae sunt vera et bona fidei et amoris, quod sit ordinatio et dispositio eorum, inde numerati, sunt quae ordinata et disposita sunt; quod ‘numerare’ id significet, est quia numerare involvit lustrationem, et quod a Domino lustratur, hoc etiam ordinatur et disponitur; etiam vox qua exprimitur hic numerare, in lingua originali significat lustrare, censere, animadvertere, et quoque visitare, mandare, praeesse, ita ordinare et disponere; quod hae significationes isti voci sint, est quia unum involvit alterum in sensu spirituali, et sensus spiritualis est vocum sensus interior, qui pluries ¹ inest vocibus linguarum, praecipue orientalium.

[2] Quod ‘numerare’ in sensu spirituali, in quo agitur de veris et bonis fidei et amoris, sit ordinare et disponere, constat etiam ex locis in Verbo, ubi ‘numerare’ dicitur, et quoque ubi ‘numerus’, ut apud Esaiam,

Vox tumultus regnorum gentium congregatarum, Jehovah Zebaoth numerans (ordinans) exercitum belli, 13:4:

apud eundem,

Tollite in altum oculos vestros, et videte quis creavit haec, qui eduxit in numerum exercitum eorum, omnes nomine vocat; de multitudine potentium et fortium robore vir non ² deest, 40:26:

apud Davidem,

Jehovah Qui numerat ³ numerum stellarum, omnes nominibus vocat, Ps. 147:4 ⁴ ;

quod per ‘numerare’ ⁵ in his locis significetur ordinare et disponere, patet, nam agitur de Jehovah, hoc est, Domino, Qui non numerat aliquem exercitum nec stellas, sed ordinat et disponit illa quae per ⁶ exercitum et per stellas significantur, quae sunt vera et bona fidei et amoris, non enim agitur ⁷ de bellis in mundo naturali sed de bellis in ⁸ mundo spirituali, quae sunt bella ⁹ seu pugnae verorum ex bono contra falsa ex malo; ¹⁰ quod ‘bella’ in spirituali sensu sint tales pugnae, videatur n. 1664, 2686, 8273, 8295, quod ‘exercitus’ ¹¹ sit vera et bona Ecclesiae et caeli, ¹² n. 7988, 8019, et quod ‘stellae’ sint cognitiones veri et boni, n. 2495, 2849, 4697.

[3] Cum notum est quid significatur per ‘numerare’ et quid per ‘filios Israelis’, constare potest quare non Davidi ¹³ licuit numerare populum, et quare, ¹⁴ postquam numeravit, Gad propheta ad illum missus ¹⁵ denuntiavit ¹⁶ poenam, 2 Sam. 24:1-15, et quare hic dicitur quod quisque daret expiationem animae suae, ne sit in illis plaga in numerando illos; per ‘filios’ enim ‘Israelis’ significantur vera et bona Ecclesiae, et per ‘numerare’ significatur ordinare et disponere; et quia solius Domini est ordinare et disponere vera et bona fidei et amoris apud unumquemvis in ¹⁷ Ecclesia et in caelo, ideo cum id ab homine fit, ut factum a Davide per Joabum, tunc significabat ordinationem et dispositionem talium ab homine et non a Domino, quod non est ordinare et disponere, sed destruere; si numeratio filiorum Israelis ¹⁸ non talia ¹⁹ involvisset, non aliquid peccati aut reatus fuisset in numerando illos.

[4] Quod per ‘filios Israelis’ significentur vera et bona spiritualia, quae sunt vera et bona Ecclesiae et caeli, videatur n. 5414, 5801, 5803, 5812, 5817, 5819, 5826, 5833, 5879, ²⁰ 5951, 7957, 8234, 8805, similiter per ‘tribus’, in quas filii Israelis distincti fuerunt, n. 3858, 3926, 4060, 6335, 6397; quia per ‘filios Israelis’ ²¹ et per ‘tribus’ talia significantur, et illa sunt innumerabilia, ideo in Verbo dicitur de ²² illis quod numerus eorum esset sicut arena maris, quae non mensurabitur nec numerabitur, Hoschea 50:10: Quis numerabit pulverem Jacobi et numerum Israelis, Num. 23:10:

²³ Jehovah ad Abrahamum, Ponam semen tuum ut pulverem terrae, ut si possit numerare pulverem terrae, etiam futurum ut semen tuum numeretur, Gen. 13:16 ²⁴ , 16:10: et alibi, ²⁵

Suspice versus caelum, et numera stellas, num potes numerare has, sic erit semen tuum, Gen. 15:5;

quod per ‘filios Israelis’ et ‘semen Abrahami’ ²⁶ non intellecta fuerit posteritas ejus sed vera et bona spiritualia, quae innumerabilia ²⁷ , et quoque quoad plurimam partem ineffabilia, constare potest ex eo quod non major multitudo ²⁸ illorum fuerit quam aliarum gentium, quod etiam testatur Moscheh,

Non propter multitudinem vestram prae omnibus populis desideravit Jehovah vos ut eligeret vos, siquidem vos estis pauciores omnibus populis, Deut. 7:7:

[5] etiam 'pernumerare' significatur ordinare et disponere, apud Jeremiam,

In urbibus Hierosolymae ²⁹ et Jehudae adhuc transibunt greges juxta manus numerantis, 33:13;

‘greges’ sunt quoque bona et vera Ecclesiae, n. 6048, 8937, 9135, ‘juxta manus numerantis’ est juxta dispositionem Domini:

apud Davidem,

Quis scit vehementiam irae Tuae? ad numerandum dies nostros, rectum notifica, ut induamus cor sapientiae, Ps. 90:11, 12 ³⁰ ;

‘numerare dies’ pro ³¹ ordinare et disponere status vitae; ³² et dies dicuntur numerati cum ordinati et dispositi, ita cum finiti, ut apud Esaiam,

Per ³³ excisionem dierum meorum abiturus sum ad portas inferni; numeratus sum, residuum annorum meorum, 38:10:

et apud Danielem,

Scriptura apparuit coram rege Belschazare, numeratus, appensus, et divisus, 5:25;

cum enim ‘numerare’ significat ordinare et disponere, tunc ‘numeratum’ significat absolutum, sicut cum linea numeris subducta est, finito calculo.

[6] Quod per ‘numerare’ significetur ordinare et disponere, est quia per ‘numerum’ significatur quale rei et status, et quale determinatur per numerum ³⁴ adjunctum, inde numerare est qualificare rem, et qualificatio rei in spiritualibus fit per ordinationem et dispositionem a ³⁵ Domino; hoc significatur per ‘numerum’ apud Johannem,

Facit ut omnibus daret characterem super manum dextram aut super frontes; et ut nemo ³⁶ posset emere aut vendere nisi qui haberet characterem, aut nomen bestiae, aut numerum nominis ejus; haec sapientia est; qui habet intelligentiam, computato numerum bestiae, numerus enim hominis est, nempe numerus ejus est sescenta sexaginta sex, Apoc. 13:16-18;

[7] agitur in hoc capite de bestia ex mari, et de bestia ex ³⁷ terra; per ‘bestiam ex mari’ intelligitur verum Ecclesiae falsificatum per scientifica quae e mundo, et per ‘bestiam ex terra’ intelligitur verum Ecclesiae falsificatum per sensum ³⁸ litteralem Verbi applicatum ad favendum malis amorum sui et mundi, nam ‘terra’ est Ecclesia quoad ³⁹ bonum et verum, citata n. 9325, et ‘mare’ est scientificum in communi, n. 28, ⁴⁰ 2120, 2850; ‘habere characterem ejus super manum et super frontem’ est agnoscere et amare falsa illa; ‘habere nomen ejus’ aut ‘numerum nominis ejus’ est agnoscere omnia qualiacumque sunt, ‘frons’ enim significat amorem, n. 9936, et ‘nomen’ significat omne quale ⁴¹ ejus de quo agitur, n. 3006, 3421, 6674, 8274, 9310;

[8] ‘computare numerum bestiae’ est explorare et scire vera illa Ecclesiae falsificata; ‘numerus hominis’ significat rem et statum illius Ecclesiae, ⁴² ‘sescenta sexaginta sex’ significant quale ejus quoad omnia vera falsificata ⁴³ et falsa ex malo in complexu, et quoque profanationem sancti, ⁴⁴ ut et finem; ⁴⁵ illa scire et explorare est sapientis et intelligentis, quapropter dicitur, Haec sapientia est; qui habet intelligentiam, computato numerum ejus; numerus enim sex significat idem cum numero duodecim, quia est dimidium ejus, n. 3960 fin. , 7973, 8148, et duodecim significant omnia vera et bona Ecclesiae in complexu, n. 2129 fin. , 2130 fin. , 3272, 3858, 3913, 7973, inde quoque in opposito sensu omnia falsa et mala in complexu; triplicatio numeri ⁴⁶ senarii involvit etiam finem, et finis est quando verum prorsus ⁴⁷ est profanatum;

[9] ex his manifeste patet quod numeri in Verbo involvant res et status, et significent quale secundum ⁴⁸ numeros determinatos, ut quoque in ⁴⁹ his apud Johannem,

Angelus mensus est murum sanctae Hierosolymae centum quadraginta quattuor cubitorum, quae est mensura hominis, hoc est angeli, Apoc. 21:17;

etiam per numerum ⁵⁰ ibi determinatum significantur omnia vera ⁵¹ ex bono in complexu, nam centum quadraginta quattuor idem significant cum duodecim, n. 7973, ⁵² exsurgit enim ex duodecim in se multiplicatis; ⁵³ quapropter etiam hic dicitur quod mensura ⁵⁴ ejus sit mensura hominis, ⁵⁵ quemadmodum supra quod numerus ille sit numerus hominis; sed quia hic vera ex bono significantur, additur quod illa mensura etiam sit mensura angeli, ‘angelus’ enim in Verbo significat ⁵⁶ vera ex bono, ⁵⁷ quoniam est recipiens Divini Veri a Domino, n. 8192.

Poznámky pod čarou: