Arcana Coelestia # 8487
8487. ‘Et incaluit sol et liquefactum est’: quod significet quod evanescat secundum gradum crescentis concupiscentiae, constat ex significatione ‘incalescere sol’ quod sit crescens concupiscentia, de qua sequitur, et ex significatione ‘liquefieri’ quod sit evanescere. Quod ‘incaluit sol’ sit 1 crescens concupiscentia, est quia ‘sol’ in bono sensu significat amorem caelestem, ex causa quia Dominus est Sol in altera vita, ac calor qui inde venit est bonum amoris, ac lux verum fidei; quod Dominus sit Sol, et inde amor caelestis, videatur n. 2 1053, 1521, 1529-1531, 2120, 2441, 2495, 3636, 3643, 4060, 4321 fin. , 4696, 5084, 5097, 5377, 7078, 3 7083, 7171, 7173, 7270; inde ‘sol’ in opposito sensu est amor sui et mundi, ac calor seu incalescentia ex sole in eo sensu est concupiscentia.
[2] Quomodo cum hoc se habet, quod bonum veri, quod significatur per ‘mannam’, evanesceret secundum gradum crescentis concupiscentiae, quod significatur per quod liquesceret cum sol incaluit, paucis dicetur: bonum veri seu bonum spirituale datur quidem homini Ecclesiae spiritualis cum regeneratur, sed quia bonum illud exstinguit omne jucundum amoris sui et mundi quod eorum vitam prius fecerat, nam opposita sunt; idcirco apud hominem illum non diu purum bonum veri manere potest, sed temperatur a Domino per jucunda amorum quae fuerunt vitae illius 4 prius; nam nisi temperaretur 5 ita bonum illud, ei injucundum fieret, ac sic fastidiretur; tale est caeleste bonum primum apud illos qui regenerantur; quantum itaque jucunda amorum sui et mundi exoriuntur, tantum bonum amoris caelestis evanescit, nam, ut dictum, opposita sunt, ita quoque vice versa;
[3] inde est quod in caelo sint vices statuum, quibus correspondent vices temporum in mundo, n. 8426, et quod ita per vices remittantur in jucunda voluptatum naturalium; nam absque mutatione statuum tali bonum amoris caelestis fieret sicut aridum, et 6 vilesceret, aliter cum temperatur per jucunda naturalia 7 simul vel successive; inde est quod principio cum filiis Israelis 8 datum est man quovis mane, 9 etiam datum sit selav in vespera; nam per ‘selav’ significatur jucundum naturale, et quoque jucundum concupiscentiae, n. 8452;
[4] at sciendum quod concupiscentiae in quas remittuntur illi qui in caelo 10 , cum illis est vespera, non sint concupiscentiae quae oppositae sunt bono caelesti sed sunt concupiscentiae quae aliquatenus cum bono illo concordant, sunt enim jucunda benefaciendi in aliqua abundantia, et inde aliquid gloriae, in quibus tamen est benevolentia ac studium serviendi, sunt quoque jucunda magnificentiae quoad decora domus, et quoad decora vestium, et similia perplura; talia sunt quae non destruunt bonum, 11 amoris caelestis sed usque abscondunt illud, ac tandem secundum gradum sicut regeneratur homo, fiunt ultima plana boni caelestis; et tunc non amplius audiunt 12 concupiscentiae sed jucunditates. Quod bonum 11 amoris caelestis absque temperatione per talia quasi arescat, et dein sicut vile fastidiatur, significatur per id quod filii Israelis, cum illis non daretur amplius selav, vocaverint mannam cibum aridum et cibum vilem, de quo ita apud Moschen, Colluvies quae in medio concupiverunt concupiscentiam, unde iterarunt et fleverunt etiam filii Israelis, et dixerunt, Quis cibabit nos carne? nunc anima nostra arida est, non quicquam nisi quod ad man oculi nostri, Num. 11:4, 6:
apud eundem,
Locutus est populus contra Deum et contra Moschen, Quare ascendere fecistis nos ex Aegypto, ut moriamur in deserto? non panis, neque aqua, jam anima nostra fastidit panem hunc vilissimum, Num. 21:5: et alibi apud eundem,
Jehovah afflixit te, et esurire fecit te, et cibabit te manne, quod non noveras, nec noverunt patres tui; ut doceret te quod non per panem solum vivat homo, sed per omne enuntiatum oris Jehovae vivat homo, Deut. 8:3;
[5] similiter ac per mannam, etiam per ‘panem azymum’ significatur bonum 13 purum a falsis, n. 8058; ille panis 14 ex simili causa vocatur panis miseriae, Deut. 16:3. Ex his nunc constare potest quid intelligitur per quod bonum 15 veri evanescat secundum gradum crescentis concupiscentiae, quae 16 significatur per quod ‘man, cum incaluit sol, liquefactum sit’.
Poznámky pod čarou:
1. increscens
2. The editors of the third Latin edition made a minor correction here. For details, see the end of the appropriate volume of that edition.
3. The following two (or in some cases more) words are transposed in the Manuscript.
4. prioris
5. illud bonum
6. vix alicujus vitae
7. The Manuscript inserts vel.
8. data sit manna
9. at
10. The Manuscript inserts sunt.
11. coeleste
12. The editors of the third Latin edition made a minor correction here. For details, see the end of the appropriate volume of that edition.
13. The Manuscript inserts coeleste.
14. The Manuscript inserts etiam.
15. coeleste
16. The editors of the third Latin edition made a minor correction here. For details, see the end of the appropriate volume of that edition.
