Zawhana 16

¹ “Cha chapiasa lei awpa ta he hmo he nama hnohta ei reih haw hih."

² Apakhyna-ozy tawhta cha to aw ei ta; ahyrai cha thie awpa maihta Khazohpa chôta hmopha a taopa hawhta ama pachâ aw, cha hawhpa daihti cha a tlô aw.

³ Cha hawhpa hmozy cha ama tao aw, Paw nata kei maniah ama pahno leipa vâta.

⁴ He biezy he nama hnohta ei reih haw hih, a daihti cha a vaw tlô tita ei cha chho haw ei tahpa nama thei heih nawpa ta.

⁵ Atahmâ deikua cha nâ tuahtuhpa lâ ei sie aw; nâmo sahlao ahyhma ta, ‘Khataih lâ na sie aw?’ tahpa ta na hiahri tlôh eichi va.

⁶ He biezy he nama hnohta ei reipa vâta nama pathipalôh cha pachârôhpa ta tlao bie ta.

⁷ Châhrasala bie hmeiseihpa ei cha chho ei: ei sie awpa nama châta a pha na, ei sie vei khiahtala Thlahpalôhtuhpa cha nâmo lâta a vy aw vei; ei sie khiahta deikua cha nâmo lâ ei vaw tuah aw.

⁸ Ano cha a vaw tlô nahta moleina kyh liata zy, siana kyh liata zy, pachiana kyh liata zy, khizaw ama thai leipa a pahnosa aw;

⁹ moleina kyh liata zy, kei einâ ngiapâ leipa vâta;

¹⁰ siana kyh liata zy, Paw lâ sie aw na ta, nâmo ta eina hmô khao lei awpa chi vâna heta;

¹¹ pachiana kyh liata zy, he khizaw bei he thai leipa ta a tlu hawpa vâta.

¹² “Nama hnohta bie rei awpa a hluhpi ei hnei, châhrasala atahmâ la pahnie tlôh lei khâh eichi ta.

¹³ Châhrasala ano hmeiseihna Thlahpa cha a vaw tlô tita, bie hmeiseihpa zydua liana cha a châ chhi aw ei; ano tao chhypa ta bie reih aw vei, bie a pahnopa maih cha tlao a cha chho aw ei, hmo a vaw tlô awpazy chhao a cha pahnosa aw ei.

¹⁴ Ano chata kei eina parônahsa aw, kei tawhtapa la aw ta, nama hnohta a cha pahnosa aw ei.

¹⁵ Paw ta hmo a hneipa zydua maih kei eih a châ, chavâta kei eih tawhtapa la aw ta, nama hnohta a cha pahnosa aw ei, ei tah.

¹⁶ “Buakha ta nâmo ta kei na hmô leipa aw eichi ta; buakhata lilaw ta, nâmo ta kei eina hmô heih aw eichi,” tah ta.

¹⁷ A pachupazy thokha ta, “Eima hnohta bie a reipa he khâpa maw, ‘Buakha ta nâmo ta kei na hmô leipa aw eichi ta, buakhata lilaw ta, nâmo ta kei eina hmô heih aw eichi,’ a tahpa nata, ‘Paw lâta ei sie awpa vâta,’ a tahpa he?” a tah ei ta.

¹⁸ Âmo chata, “He ‘buakhata’ a tahpa he khâpa tahna ma a châ? A bie reipa he a pachâna pahno ma pi,” tah ei ta.

¹⁹ Ano ama hiahri khoh tahpa Zisu ta pahno ta, ama hnohta, ‘Buakhata nâmo ta, kei na hmô leipa aw eichi ta, buakhata lilaw ta nâmo ta kei eina hmô heih aw eichi,’ tahpa ta ei bie reipa he nama hiahri ma?

²⁰ Hmeiseihta ta, hmeiseihta ta, ei cha chho ei chuh, nâmo nama mothlih tla aw ta, thata cha aw eichi ta, khizaw deikua cha amâ ly aw; nâmo pachârôhpa ta y aw eichi ta, châhrasala nama pachârôhpa cha alyna lâta a vaw lie aw.

²¹ Chanô ta saw a zeih nota a pachâ a rôh tyh, a daihti a tlô hawpa vâta; châhrasala nawh a pipa ta nahta, a thlahzopa cha a thei khao tyh vei, khizaw liata chyhsa a vaw pihpa cha alypa vâta.

²² Chatawhcha atahmâ nâmo nama pachâ a rôh, châhrasala cha hmô heih aw ei na ta, nama pathipalôh aly aw ta, namâ lypa cha ahyhma ta cha lapa aw veih ei.

²³ Cha noh liana chata nâmo ta khâpahma kei na hiahri aw veih ei chi. Hmeiseihta ta, hmeiseihta ta, ei cha chho ei chuh, Paw liata khâparai nama hiah khiahtala, keima moh ta a cha pie aw ei.

²⁴ Atahmâ taihta ei moh ta khâpahma hiah veih eichi; hiah teh u, nama hmô aw, chatanachata namâ lypa â ki nawpa ta.

²⁵ Cha biezy cha pakhopa ta nama hnohta ei reih haw; a daihti a tlô aw, cha tina chata nama hnohta pakhona ta bie reih khao leipa aw na ta, a siapata ta Paw thâtih ei cha chho aw ei.

²⁶ Cha noh liana chata keima moh ta hmo nama hiah aw; Paw lâta kei ta ei châ hawpa aw ei, cha tah veih ei na;

²⁷ Paw tlaita nama kyh cha pachâ tlôh ei ta, nâmo ta ei kyh na pachâ eichi ta, Paw tawhta a puapa ei châpa namâ ngiapâpa vâta.

²⁸ Kei Paw tawhta vaw pua ta, khizaw liata a vypa ei châ; khizaw siesaipa ta Paw lâ a di heih awpa ei châ,” tah ta.

²⁹ A pachupazy ta, “Pachâ teh, atahmâ la a siapata ta bie na reih na, a pakhona rai ta rei khao va chi!

³⁰ Nâma ta ato pahno chi ta, ahyhma ta hiahri byuh va chi, tahpa atahmâ eima pahno haw; he vâna heta Khazohpa tawhta a puapa na châpa eimâ ngiapâ na,” tah ei ta.

³¹ Zisu ta a chhy ta ama hnohta, “Atahmâ cha namâ ngiapâ haw ma?

³² A daihti a tlô aw, a tlô haw, cha tina chata nâmo o chyu lâta pai khai aw eichi ta, keima deita ta eina pathlua aw eichi; châhrasala Paw ei hnohta a ypa vâta keima deita ta y tlôh lei khâh na ta.

³³ He biezy he nama hnohta ei reih haw hih, keima liata thlahlôhpa ta nama y nawpa ta. Khizaw liana heta rietheipasapa ta nama y tyh; châhrasala thlahlôh ngaitapa ta y teh u, kei ta khizaw ei tiah haw,” tah ta.;