Zawhana 15

¹ “Kei krezô hmeiseihpa ei châ, ei Paw sahdô mohôtuhpa a châ.

² Ei chiah a pathei leipa maih thy tyh ta, a patheipa maih a pathai tyh, a pathei hluh rili nawpa ta.

³ Nama hnohta ei bie reipa vâta atahmâ chhao nama pathai haw.

⁴ Keima liata y thlâh ha teh u, kei chhao nâmo liata ei y thlâh ha aw. A chiah cha krezô liata a y thlâh ha leipa khiahtala, ano deita ta a pathei thei leipa hawhta, nâmo chhao keima liata nama y thlâh ha leipa khiahtala, pathei thei aw veih ei chi.

⁵ Kei krezô cha ei châ, nâmo a chiahzy nama châ. Ahyrai keima liata y thlâh ha ta, kei chhao ano liata ei y thlâh hana cha, cha cha a hluhpi a pathei tyh, keima leipa ta khâpahma tao thei tlôh eichi va.

⁶ Chyhsa keima liata a y thlâh ha leipa khiahtala, a chiah hawhta thypa ta y ta, a uah tyh; chatawhcha pakhy ei ta, mei liata thy ei ta, a kâ tyh.

⁷ Nâmo keima liata y thlâh hapa ta, ei bie nâmo liata a y thlâh ha hra khiahta cha nama khopa maih hiah teh u, nama châta taopa ta a y lymâ aw.

⁸ He vâna heta ei Paw cha palyupalihpa ta a y tyh, a hluhpi nama patheipa liana heta, chatanachata ei pachupazy nama châ aw.

⁹ Paw ta kyh eina pachâpa hawhta kei chhaota nama kyh ei cha pachâpa ei he; ei kyhpachâna liata y thlâh ha teh u.

¹⁰ Nâmo ta ei biepiepazy nama zyh khiahtala, ei kyhpachâna liata nama y thlâh ha aw, kei ta ei Paw biepiepazy zyh na ta, a kyhpachâna liata ei y thlâh hapa hawhna heta.

¹¹ Ei lypa nâmo liata a y thlâh ha nawpa nata, namâ lypa â ki nawpa ta, he biezy he nama hnohta ei reih hih.

¹² “He he ei biepiepa a châ, kei ta nama kyh ei cha pachâpa hawhta nâmo ta nâmo kyh a pachâ ula.

¹³ Chyhsa ta a viasa châta a hro a pie hlei tawhta, kyhpachâna tha viapa ahyhma ta hnei veih ei.

¹⁴ bie ei cha piepa maih nama tao khiahtala, ei viasazy nama châ aw.

¹⁵ Sei cha tah khao aw veih ei na, a zibeipa hmotaopa sei ta pahno tlôh va; viasazy tlao ei cha tah ei, Paw tawhta hmo ei pahnopa zydua nama hnohta phuah ha tlôh na ta.

¹⁶ Nâmo ta nâ tlyh veih ei chih, keima ta tlao châ tlyh ei na ta, pathei awpa nata nama thei y thlâh ha awpa ta ei cha rao hra ei; ei moh ta Paw lâta nama hiapa maih, a cha piena awpa ei ta.

¹⁷ Nâmosasyh ta kyh namâ pachâ rairieh thei nawpa ta he biezy he ei cha pie ei.

¹⁸ “Khizaw ta a châhao khiah ei tala, a châ hao hlâ chhaota, keima einâ haopa nama pahno na.

¹⁹ Nâmo khizaw liatahpa châ ula, khizaw ta kyh a pachâ aw ei; khizaw liatahpa châ tlôh lei khâh eichi ta, khizaw liatahpa ei châ tlypa ei vâna heta, khizaw ta a châhao ei.

²⁰ ‘Sei, a zibeipa hlâta lai vei,’ tahpa bie ei cha chho hapa ei kha a thei thlâh ha teh u. Âmo ta kei eina taola haw khiahtala, nâmo chhao a cha taola aw ei; ei bie ama zyh khiahtala, nâmo bie chhao ama zyh aw.

²¹ Châhrasala he hmo zydua he ei moh vâta nama chôta ama tao aw, nâ tuahtuhpa ama pahno leipa vâta.

²² Kei a vypa ta ama hnohta bie reih leipa aw sala, moleina ama hnei lei awpa tlai; atahmâ deikua ama moleina liata reina awpa hnei khao veih ei.

²³ Ahyrai kei nâ haopa cha ei Paw a haopa a châ.

²⁴ Hmo, mo hropa ahyhma tao beih leipazy ama hry liata tao leipa aw sala, moleina ama hnei lei awpa tlai; atahmâ deikua âmo ta kei nata ei Paw eima pano ta maniah hmô haw ei ta, maniah amâ hao haw.

²⁵ Khâparai châ sala ama ryhpa châbu liata âmo ta, ‘Khâpa kyh leipa ta einâ hao ei,’ tahpa bie ropa kha a vaw tlô nawpa ta a châ hih.

²⁶ Paw tawhtapa Thlahpalôhtuhpa nama hnohta ei tuah awpa, Paw tawhta a puapa hmeiseihna Thlahpa cha a vaw tlô tita, ano chata ei bie a pahnosa aw;

²⁷ nâmo chhaota nama pahnosa aw, a thaota tawhta ei hnohta nama ypa vâta.;