Zawhana 17

Study

         

1 Cha hmozy cha Zisu ta reih ta, avâ lâ uapa ta, “Ei Paw y, a daihti a tlô haw; na Sawchapawpa parônahsa teh, Sawchapawpa ta a cha parônahsa nawpa ta,

2 chyhsa zydua chôta bie hneipa ta na taopa khata ano hnohta na piepa maih cha chhâzaw hrona a pie thei nawpa ta.

3 He he chhâzaw hrona a châ, na Khazohpa hmeiseihpa deita nata na tuapa Zisu Krista pahnopa hih.

4 Nâma ta hmo tao awpa eina piepa chi kha tao khai na ta, khizaw liata ei cha parônahsa haw;

5 hy ei Paw y, khizaw y hlâta nâ liata a rônahna ei hneipa khata atahmâ namâ lia tlaita na parônahsa teh.

6 “Nâma ta khizaw hry tawhta a puapazy kei eina piepa chi hnohna khata na moh ei palâsa haw; âmo cha nâ eih ama châ, nâma ta âmo cha kei eina pie chi, âmo chata na bie amâ ngiah haw.

7 Nâma ta hmo kei eina piepa maih nâ tawhta a puapa a châ tahpa atahmâ ama pahno haw;

8 nâma ta bie eina piepazy chi kha ama hnohta pie ha tlôh na ta, chazy cha a ngia ei ta, nâ tawhta a puapa ei châ tahpa a dopa ta pahno haw ei ta; nâma ta eina tuah chi tahpa chhao amâ ngiapâ haw.

9 Ama châta thlah ei chhâ; he khizaw châta thlah a chhâpa châ va na, nâma ta eina piepa sahlao châta tlao a châ; nâ eih châ tlôh ei ta;

10 kei eih maih nâ eih a châ, nâ eih cha kei eih a châ, âmo vâta parônahsapa ta ei y tyh.

11 Chatawhcha kei la khizaw liata y khao aw va na, he sahlao deikua he khizaw liata ama y aw, kei nâ lâ ei vaw di ha aw, ei Paw Pathaihpa y, nâma ta kei eina piepazy chi he na moh ta hrôbieh mah y, pôhkha ama châ thei nawpa ta, keimo hawhna hra heta.

12 Ama hnohta ei y chhôhna khata nâma ta kei eina piepazy chi he, na moh ta ei hrôbieh tyh; âmo cha vaih na ta, âmo hry liata pakha hmahta leidia veih ei, leidia sawchapawpa leipa khata cha, Khazohpa châ bie a tlô nawpa ta.

13 Châhrasala atahmâ nâ lâ ei vy daihmâ haw; khizaw liata he biezy he ei reih, ei lypa âmo liata ama hnei pakina awpa ta.

14 Na bie ama hnohta ei pie haw; chatawhcha khizaw ta âmo cha a hao ei ta, khizaw liatahpa ama châ leipa vâta, kei khizaw liatahpa ei châ leipa hawhna hra heta.

15 Nâma ta âmo cha khizaw tawhta na la awpa ta a hawpa châ leipa na ta, chyhsa moleipa tawhna chata na hrôbieh awpa ta ei tah.

16 Âmo cha khizaw liatahpa châ veih ei, kei khizaw liatahpa ei châ leipa hawhna hra heta.

17 Âmo cha bie hmeiseihpa ta pathaisa teh; na bie cha hmeiseihpa a châ.

18 Nâma ta khizaw liata kei eina tuapa hawhna chi khata, kei chhaota âmo cha khizaw liata ei tuah hih.

19 Âmo vâta keimasasy ta ei pathaisa, âmo chhao bie hmeiseihpa ta ama pathaisa awpa ta.

20 “He sahlaozy châta deita a hawpa châ va na, ama bie vâta kei nâ ngiapâ awpazy châta chhao a hawpa ei châ,

21 ama zydua ta pôhkha ama châna awpa ta, ei Paw y, nâ keima liata na ypa nata kei nâma liata ei ypa hawhna hra heta, âmo chhao keimo liata ama yna awpa ta, nâ ta kei eina tuah chi tahpa khizaw ta ama zo thei nawpa ta.

22 Nâ ta rônahnazy eina piepa chi kha, kei ta âmo ei pie haw, âmo cha pôhkha ama châna awpa ta keimo pôhkha eima châpa hawhna hra heta,

23 kei âmo liata, nâ, keima liata âmo pôhkha ta ypa ta, ama paki thei nawpa ta, nâ ta kei eina tuah chi tahpa nata kyh eina pachâpa hawhna chi ta, âmo he ama kyh na pachâ tahpa khizaw ta ama pahno thei nawpa ta.

24 Ei Paw y, nâma ta kei eina piepazy chi he, ei yna liata ei hnohta a y awpa ta ei khoh, nâma ta eina piepa chi ei rônahna kha ama hmô nawpa ta, aleilô y hlâ chhaota nâma ta kyh na pachâ haw tlôh chi ta.

25 Hy ei Paw sia ngaitapa y, khizaw ta cha pahno leipa ei ta, kei deikua ta ei cha pahnopa kha; he sahlao chhao heta nâma ta kei eina tuah chi tahpa ama pahnopa kha.

26 Ama hnohta na moh pahnosa na ta, ei pahnosa tyh aw, nâma ta kei kyh eina pachâna chi kha, âmo liata y ta, kei chhao âmo liata ei y thei nawpa ta,” tah ta.;