Athaona 19

¹ Vâlyuhchâpa pano cha zâlâ ta Sawdawma khih za tlô ei ta; Lawta cha Sawdawma khih kuh ochhi liana chata a vaw tyuh ta. Lawta ta âmo vaw hmô ta, aly awpa ta a duah ta, a hmia alei lâ a khupa ta a naoh ta,

² “Ei zibeipa saih u, ngiachhiepa ta nama sei o liana heta a ngia chy ula, a rie ula, nama pheizy a si teh u, chatanachata mydi ta thyu aw eichi ta, sie lavâh eichi,” tah ta. Amo chata, “Châ vei, khihliah liata tlao eimâ rie aw,” tah ei ta.

³ Châhrasala ano chata thata reipasao ta; ano hnohta vawh ei ta, a o liana chata a ngia haw ei ta; chatawhcha ano chata âmo châta niepa tao ta, viahchhâ thinô pahlao leipa chatei ta; nie haw ei ta.

⁴ Châhrasala amâ mô hlâta khih liata chyhsa, Sawdawma khih liata chyhsazy tlai chata, vaih to liatahpa zydua ta hawti machâ ta, o cha dôh khai ei ta;

⁵ Lawta cha aw ei ta, a hnohta, “Atazâ na hnohta chyhsa a vaw ngiapazy kha khataih liata ama y? Amo eima y khei thei nawpa ta vaw pua teh,” tah ei ta.

⁶ Lawta cha chhikao thaby liata âmo lâ vawh ta, ochhi khaw heih ta,

⁷ “Uhnawh saih u, ngiachhiepa ta chata ngâsâ ta molei kha u.

⁸ Moh teh u, chapaw a pahno beih leipa sawchanô pano ei hnei; na ngiachhie ula, âmo cha nâmo lâta ei vaw papua aw na, a pha nama tahpa hawhta ama chô liata tao teh u; he chyhsazy chô liana deikua he khâpahmah tao chacheita khah u, ei o chhôh liata a vaw ngia tlôh ei ta,” tah ei ta.

⁹ Châhrasala âmo chata, “A hnei teh!” tah ei ta. Chatawhcha âmo chata, “He chyhsa baohra heta he liata y awpa ta a vaw paih ta, ryureituhpa ta y â chhuah ta! Atahmâ la âmo chô liata taopa hlâta hmahta na chô liata a pha lei ngaitapa ta eima tao aw,” tah ei ta. Lawta cha thata by ei ta, ochhi parao awpa ta a vaw hnia ei ta.

¹⁰ Châhrasala chyhsazy chata ama ku chahraoh ei ta, ochhi khâchâ khaw ei ta.

¹¹ Chatawhcha chhikao thaby liata chyhsazy cha a lai a chyhta, ama mo pachaosa ei ta, chatanachata ochhi cha hmô thei khao leipa ta thachhâ ngaitapa ta y ei ta.

¹² Chatawcha chyhsazy chata Lawta hnohta, “He chyhsazy leipa heta he liana heta chhôhkha hropazy na hnei ma? Na piahpa nata na sawchapawzy nata nata sawchanôzy nata khih chhôh liata na sanawh maih cha khih tawhta puakhei teh;

¹³ ABEIPA hmiakô liana chata ama awna pyu cha a ru ngaitapa vâta, he khih he eima pahleipadia aw, pahleipadia awpa ta ABEIPA chata maniah tuah tlôh ta,” tah ei ta.

¹⁴ Chatanachata Lawta cha pua ta, a sawchanôzy a hneituhpa a piahpazy hnohna chata reih ta, “Thyu ula, he khih tawhtapa he pua teh u, ABEIPA ta khih he a pahleipadia aw,” tah ta. Châhrasala a piahpazy pachâ ta cha saisopa hawhta deita châ ta.

¹⁵ My a pavâhpata nahta vâlyuhchâpazy chata, “Thyu la, na lahpinô nata he liata na sawchanô pano a ypazy he a chhi teh, chata leipa ta cha he khih hriena liata na leidia pathlei aw na,” tahpa ta Lawta cha parah ei ta.

¹⁶ Châhrasala chhôhmohpa ta y thlâh ha ta, chatanachata ABEIPA ta ano a ngiachhiepa vâta chyhsazy chata ano nata a lahpinô nata a sawchanô panozy ama ku ta patu ei ta, a chhi ei ta, khih khôtho lâna chata soh haw ei ta.

¹⁷ Khôtho lâ ama puakhei tawhna chata, “Na hro nawpa ta â râ teh; na hnôh lâ a heih leipa la, bypi liata rai a duah hra khâ; tlâh lâna hao ta a râ teh, chata leipa ta la na leidia pathlei aw na,” tah ta.

¹⁸ Châhrasala Lawta chata ama hnohta, “Ei zibei saih u, cha hawhna chata châ kha se;

¹⁹ na sei heta, na mo adypa ta nâma ta na zawngiahna cha palâsapa ta, cha zawngiahna cha ei hro pabohpa ta ei chô liata na palâsa; tlâh lâna hao ta a râ thei aw va na, hmo pha lei ngaitapa heta na vaw tlô thlupa ta ei thi pathlei aw na.

²⁰ Moh teh, hao khih hao a râ nawpa ta a hnia chai ta, khih chyhpa ta châ tlôh hra ta, tlao parahsa teh, khih chyhpa ta châ vei mâ? Chatanachata ei hroh aw,” tah ta.

²¹ Ano chata a hnohta, cha pasai la vâ na, khih na reipa cha pahleipadia leipa ta a y aw.

²² A parah la, cha lâna chata a râ teh; cha na tlô hlâ lei cha khâpahmah tao thei tlôh lei khâh aw na ta,” tah ta. Chavâta cha khih moh cha Zawa* bi haw ei ta.

²³ Lawta chata Zawa khih a tlô nata alei chô liata noh cha vaw chhi haw ta.

²⁴ Chatawhcha ABEIPA chata Sawdawma nata Kawmawra khih chô liana chata avâ liata ABEIPA tawhna chata kaih nata mei pasuasa ta;

²⁵ cha khihzy nata bypi zydua nata khih liata chyhsa zydua nata alei liata hmo a pyuhpazy cha pahleipadia khai ha ta.

²⁶ Lawta lahpinô cha hnôh lâ y ta, hnôh lâ a heih ta alôh tô lâta a vaw lie haw ta.

²⁷ Chatawhcha Abaraha cha ABEIPA hmiakô liata a duana su lâna khata mydi ta khy ta;

²⁸ Sawdawma nata Kawmawra nata bypi râh zydua lâ cha za sai ta, moh thlâh ha ta, meikhuh cha patisana meikhuh hawh tlaita a charih ngâ kaw ta.

²⁹ Chatawhcha Khazohpa ta bypi khihzy a pahleipadia nota nata Lawta yna khihzy cha a pahleipadia nona chata Khazohpa ta Abaraha cha a thei thlâh ha ta, Lawta cha leidiana hry tawhtapa cha papua ta.

³⁰ Chatawhcha Lawta cha Zawa khih tawhna chata khy ta, tlâh liana chata y ta, a sawchanô pano cha a hnohta y hra ei ta, Zawa khih liata y ngâh tlôh lei khâh ta; ano nata a sawchanôzy pano cha lôpu liata y ei ta.

³¹ Chatawhcha a uhtheipa chata a seihnaipa hnohta, “Eima paw he machâ haw ta, khizaw zydua yzie hawhta maniah a y khei awpa ta he râh liana heta chapaw pakha hmah y khao tlôh leipa ei ta.

³² A vy teh, eima paw he kresawti padosa ei si, chatanachata eima paw chi pathla â mua leipa ta eima tao thei nawpa ta, ano hnohta eimâ zia aw,” tah ta.

³³ Cha zâ liana chata ama paw cha kresawti padosa ei ta; a uhtheipa cha a ngia ta, a paw hnohna chata a kei zia ta; ano cha a vaw ziapa cha pahno leipa ta, a thyu nota chhao pahno hra vei.

³⁴ A mylâpa chata a uhtheipa chata a seihnaipa hnohta, “Azâhnia zâ kha ei pâ hnohta a zia na ta; atazâ chhao kresawti padosa heih ei si; chatawhcha nâma a ngia la, eima paw chi pathla a mua leipa ta eima tao thei nawpa ta a hnohta a kei zia hra teh,” tah ta.

³⁵ Cha zâ chhao cha ama paw cha kresawti padosa heih ei ta; a seihnaipa chata thyu ta a hnohta a kei zia ta; ano chata a vaw zia nona chata pahno leipa ta, a thyu nota chhao pahno hra vei.

³⁶ Cha hawhna chata Lawta sawchanôzy pano chata ama paw liana chata saw phaoh rairieh ei ta.

³⁷ A uhtheipa chata sawchapaw sa ta, a moh Môaba bi ta; cha cha atahmâhlâ Môaba mo pathlatuhpa châ ta.

³⁸ A seihnaipa chhao chata sawchapaw sa hra ta, a moh Benami bi ta; cha cha atahmâhlâ Amawna pathlatuhpa cha a châ.