Athaona 20

Studie

         |

1 Cha tawhna chata Abaraha cha Neke râh pangaipa ta a pasie ta, Kadesa nata Shura likawh liana chata yna su tao ta. Kerara khih liana chata y chy hra ta.

2 Abaraha ta a lahpinô Sara cha, “Ei sietanô a châ,” tah ta. Kerara beipa Abimeleka chata chyhsa tuah ta, Sara padysa haw ta.

3 Châhrasala Khazohpa ta cha zâ ta a mâ lâta Abimeleka lâta a vy ta, a hnohta, “Pachâ teh, chanô na dypa vâna heta a thipa dei na châ haw; chyhsa lahpinô châ tlôh ta,” tah ta.

4 Abimeleka deikua chata pahnopathei mâh leipa ta; chatanachata “ABEIPA y, chi sia ngaitapazy chhao na thie aw mâ?

5 Ano tlai chhaota ei hnohta, “Ei rilâhpa a châ,’ tah hra tlôh ta. Pathipalôh phapa a phaohpa nata ku pathaih ngaitapa hneina chôta he he ei tao,” tah ta.

6 Chatawhcha Khazohpa ta a mâ lâna chata, “Chatatlyh, he he pathipalôh phapa phaohna chôta na tao tahpa ei pahno, kei chhaota ei chô liata hmo na parao awpa châ ei cha pakhâ, chavâta ano na hria awpa ei pasaih vei.

7 Atahmâ chyhsa lahpinô kha pakua teh; ano cha hrosohpa châ tlôh ta, na châta thlahchhâ aw ta, chatawhcha na hroh aw. Na pakua leipa khiahtala, na thi tlai aw tahpa pahno teh, nâ nata na hneipa zydua chhaota,” tah ta.

8 Chatanachata Abimeleka cha mydi ta thyu ta, a sei zydua aw ta, ama theina liata cha bie zydua cha chho ta; chyhsazy chata chi ngaita ei ta.

9 Chatanachata Abimeleka chata Abaraha aw ta, a hnohta, “Eima chô liata na hmo taopa he kheihtazie ta ma a châ tly? Khâpa kyh liata ma na chôta hmo parao na ta, kei nata ei khihnarâh chô liana heta hmo molei ngaitapa na vaw tlôkhei tly? Hmo tao a ngia lei ngaitapa he ei chô liata na tao haw hih,” tah ta.

10 Chatawhcha Abimeleka chata Abaraha hnohta, “Khâpa ma hmô chi ta, he hawhpa hmo na tao tly?” tah heih ta.

11 Abaraha chata, “He khih liana heta Khazohpa china a y chachei leipa châ aw ta, ei lahpinô vâna heta chyhsa ta eina thie aw tahpa ei pangiasapa vâta a châ.

12 Cha tawhna heih hra chata, ei sietanô châ thlâh ha tlôh hra ta, ei paw sawchanônô châ ta, ei nô sawchanônô deikua châ vei; ei lahpinô ta vaw châ ta.

13 Khazohpa ta ei paw o tawhtapa eina paviavisa nona khata a hnohta, ‘He he na ngiachhiena ei chôta na palâsa awpa cha a châ: eima tlôna su maih liata, ei rilâhpa a châ, tah mah y,’ ei tahpa rai a châ,” tah ta.

14 Chatawhcha Abimeleka chata mietahkupazy nata viahchao tôhpazy nata seichapawzy nata eichanôzy a chhi ta, Abaraha cha pie ta, a lahpinô Sara chhao pakua ta.

15 Abimeleka chata, “Moh tua, ei râh cha a kawh kaw mâh tâh; na khona maih liana heta y teh,” tah ta.

16 Sara hnohna chata, “Moh tua, na rilâhpa he tâkâ sâh kha pie na ta; na hnohta a ypa zydua liana chata na châta thai pachâsa nawpa a châ hih; chyhsa zydua mohmô ta na sia khai haw,” tah ta.

17 chatanachata Abaraha chata Khazohpa lâta thlahchhâ ta; Khazohpa ta Abimeleka nata a lahpinô nata a seichanôzy patlâh heih ta, chatanachata sawzy sa heih ei ta.

18 Abaraha lahpinô Sara vâna chata ABEIPA chata Abimeleka chhôhkha zydua cha ama chhi khaw khai ha tlôh ta.

Scroll to see more.