Athaona 18

Studie

          |

1 Chatawhcha Abaraha cha noh a sa lichih ta poh-o ochhi thaby liata a tyuh thlâ nota ABEIPA cha Mamre aoka kiapâh liana chata a hnohta a vaw luah ta.

2 A heih ta, moh ta, ano dady liana chata chyhsa pathôh a duah thlâh ha ei ta. Chatawhcha a hmôpata nahta poh-o ochhi tawhtapa cha âmo aly awpa ta a kei râ ta, alei lâ a khupa ta a naoh ta.

3 “Ei beipa, eina ngiachhie thei chi khiahtala ngiachhiepa ta na sei he na khôsai kha y.

4 Ti a chyhta cha vaw lapa sah la, nama pheizy pasi ula, tho ry liana heta a pahâ chy tua teh u,

5 viahchhâ a chyhta chhâ kei la aw na ta, nama tha a pahno teh u, cha khai tawhna chata tlâ sie la vâh eichi, chatanachata nama sei hnohta namâ vypa châ tlôh aw ta,” tah ta. Chatawhcha âmo chata, “Na reipa hawhna chata kei tao teh,” tah ei ta.

6 Chatanachata Abaraha chata poh-o chhôh liata Sara hnohna chata thlai a ngia ta, “Viahdie di ngaitapa panuana hmo thôh tao la, ny la, viahchhâzy tao teh,” tah ta.

7 Chatawhcha Abaraha cha viahchao zaw lata a keira ta, viahchao taw pha kawpa la ta, sei hnohta pie ta, chatawhcha âmo châta vaw tao parah ei ta.

8 Chatawhcha sâhpiti kuapa zy, sâhpiti zy, viahchao taw sa taopazy cha la ta, ama hmiakô liana chata kei soh ta; chatawhcha tho ry liana chata ama kiapâh ta a duah thlâh ha ta, âmo chata nie haw ei ta.

9 Âmo chata a hnohta, “Na lahpinô Sara khataih liata a y?” tah ei ta. Chatawhcha ano chata, “Hao poh-o liana haota a y,” tah ta.

10 ABEIPA chata, Daihti a vaw tlô heih tita cha, na hnohta a vy heih tlai aw na ta, na lahpinô Sara chata sawchapaw a sa aw,” tah ta. Chatawhcha a hnôh lâta poh-o ochhi thaby tawhna chata Sara ta vaw thei ta.

11 Abaraha nata Sara cha nôpi pawpi, machâ karôpa châ haw ei ta; a chanô yzie tyhpa cha Sara chô liata lei haw ta.

12 Chatawhcha Sara chata a palôhrupa ta pahneih ta, “Machâpa ei châ tawhna heta alyna ei hnei aw tlyma, ei beipa hra ta machâ haw tlôh ta?” tah ta.

13 ABEIPA chata Abaraha o ta, “Khazia e Sara ta, ‘Machâ châ haw na ta, saw ei sa hmeiseih aw mâ?’ tahpa ta a pahneih.

14 ABEIPA châta hmo kheihtaparai a ru tu mâ? A daihti raopa liata daihti vaw tlô tina chata nâ lâta a vy heih aw na ta, chatawhcha Sara chata sawchapaw a hnei aw,” th ta.

15 Sara chata ano a chipa vâta, “Pahnei va na,” tahpa ta a phih ta. Ano chata, “Châ vei, na pahnei tlaina,” tah ta.

16 Cha tawhna chata chyhsazy cha thyu ei ta, Sawdawma khih lâta moh ei ta; Abaraha cha âmo pathlie awpa ta ama hnohta sie hra ta.

17 ABEIPA chata, “Ei hmotao awpa he Abaraha liana heta ei phih aw vâ ma i.

18 Abaraha he phopi rôhnahpa nata hmotaothei ngaitapa a vaw châ tlai bao naita, ano liana chata khizaw liata phopi to ama huhiepa ta y tlôh aw ei ta.

19 ABEIPA lâpi amâ chhih theina awpa ta, a hnôh lâta a sawzy nata a chhôhkhapazy hmo a sia ngaitapa ta tao awpa nata adona kyh hawhta tao awpa ta bie a pie theina awpa ta, ano cha rao haw tlôh na ta; ABEIPA chata Abaraha kyh liata a reipa maih cha a patlôsa theina awpa ta,” tah ta.

20 Chatawhcha ABEIPA chata, “Sawdawma nata Kawmawra khih awna pyu a ru ngaitapa vâta nata thata ama moleipa vâta,

21 atahmâ zu aw na ta, ama awna pyu ei hnohta a vaw tlôpa hawhna tlai heta ama tao ma, tao vei ma moh aw na ta; ama tao leipa khiahtala, ei pahno aw,” tah ta.

22 Cha tawhtapa cha chyhsazy cha kua ei ta, Sawdawma khih lâ cha pangai ei ta; Abaraha deikua cha ABEIPA hmiakô liata a duah thlâh ha chy ta.

23 Abaraha chata a kei hnia ta, “Chyhsa siapazy cha chyhsa moleipa hryta na pahleipadia thlâh ha aw mâ?

24 Khihpi chhôh liana cha chyhsa siapa sypangawh chhâ ypa châ ei sala; chyhsa siapazy sypangawh ama ypa vâna chata tlao pahlôh aw va chi mâ? na pahleipadia thla ha aw ma?

25 Nâ ngâsâ ta cha hawhta chyhsa siapazy cha chyhsa moleipazy hnohta thi aw ei ta, chyhsa siapazy cha moleipazy hawhta pasa ama tao hra awpa cha khoh tlôh leipa aw chi ta! Cha hawh ngâsâ rie châ kha se. Alei chô zydua ryureipa ta a sia ngaitapa ta tao aw vei mâ?” tah ta.

26 Chatawhcha ABEIPA chata, “Sawdawma khihpi chhôh liana chata chyhsa siapa sypangawh chhâ ei hmô khiahtala, âmo vâna chata a khih duata ei pahlôh aw,” tah ta.

27 Abaraha chata a chhy ta, “Pachâ teh, kei dohlei nata buchâh dei na heta ABEIPA cha bie ei châ chho thei saliah ta.

28 Chyhsa siapa cha papangawh ta sypangawh tloh vei mawh ei sala zaw? Papangawh ta ama tloh leipa vâta khihpi dua ta na pahleipadia aw mâ?” tah ta. Chatawhcha ano chata, “Sypalih nata papangawh chhâ ei hmô khiahtala pahleipadia aw va na,” tah ta.

29 Ano chata bie chho lymâ heih ta, “Cha liana chata sypalih deita hmôpa châ thei ngyu aw ta,” tah ta. Ano chata, “Sypalih vâna chhao chata pahleipadia aw va na,” tah ta.

30 Chatawhcha ano chata, “Hy ABEIPA na hiehâh leipa sala, ei vaw reih heih tua aw, cha liana chata sythôh deita hmôpa châ thei ngyu aw ta,” tah ta. Ano chata, “Cha liana chata sythôh chhâ ei hmô khiahtala pahleipadia aw va na,” tah ta.

31 Ano chata, “ABEIPA, bie ei châ chho thei saliah ta : Cha liana chata syno deita hmô theipa châ ngyu aw ta,” tah ta. Ano chata, “Syno vâna chhao chata pahleipadia aw va na,” tah ta.

32 Chatawhcha ano chata, “Hy ABEIPA hiehâh leipa la, ei kha deita ei vaw reih heih tua aw. Cha liana chata pahrawh deita hmôpa châ thei ngyu aw ta,” tah ta. Ano chata, “Pahrawh vâna chata pahleipadia aw va na,” tah ta.

33 Chatawhcha ABEIPA cha Abaraha nata bie amâ chho khaipa ta nahta sie ha ta; Abaraha cha ano yna su lâta a di haw ta.

  
Scroll to see more.