Ezekiel 29

Study

         

1 Kô hrawhna, thla hrawhna, cha thla noh hrawhleinona liana chata ABEIPA bie cha ei hnohta vaw tlô ta:

2 “Chyhsa y, Izi beipa Phirao ahei hnao la, a chô liata nata Izi mo zydua chô liata chhochhielie teh;

3 reih la, Abeipa KHAZOHPA chata he tana heta a tah: “Pachâ teh, Izi beipa Phirao, chavahzy liah liata tisadâh rarôhypa, ‘Ei Nile he kei eih a châ, keima chata tlai ei tao, ’a tahtuhpa, ei châ dyuh na.

4 Na kâ ru liata zy keipa cha pa-ao aw na ta, chavah liata ngazy cha na phuhlupa liata pabaisa aw na ta; na chavah liahliah tawhtapa na phuhlupa liata na chavah nga a baipa zydua chhaota ei châ daophi aw.

5 Chatawhcha râhpathohpa liata cha thy aw na ta, nâ nata na chavah liata nga zydua chhao cha; râhhmâhpa liata tlâh aw chi ta, na ri a huapa châ leipa aw ta, pabupa châ hra aw va chi. Sahrâpazy nata pavawzy hnohta niepa châta ei cha pie aw.

6 “Izarel chhôhkhapazy chata lothi chôhchahrei dei ama vaw châ hawpa vâta Izi râh liata a pahrâpa zydua zy chata, kei he ABEIPA ei châ tahpa ama pahno aw;

7 ku ta ama cha patu nota tlie chi ta, ama ngiatlâh liata chhôpa ta hrie chi ta, cha hnie ei ta, tlie chi ta, ama chaizy cha na chalyusa;

8 chavâta Abeipa KHAZOHPA chata he tana heta a tah: Na chô liata zaozi vaw patlôsa aw na ta, nâ tawhtapa chyhsa nata sa ei pahleipadia khai aw;

9 chatawhcha Izi râh roryhrapa nata ryhpa a châ aw. Kei he ABEIPA ei châ tahpa ama pahno aw.“‘Nile he keima eih châ ta, ei taopa cha na tahpa vâta,

10 chavâta cha dyuh na ta, na chavah chhao Syene o sâhpa tawhta Ethiôpia râhri taihta Izi râh cha a ryhpa hmeihseihpa nata roryhrapa ta ei tao aw.

11 Chyhsapa phei ta tly beih leipa aw ta, sazy chhao sie beih hra aw veih ei; kô sypalih chhôh chhaota pahrâpa ta y hra aw vei.

12 Chatawhcha Izi râh cha râh roryhrapazy hry liata roryhrapa miakha ta tao hra aw na ta; a khihpizy cha khihpi rypa zy hry liata kô sypalih rypa ta a y aw. Izi mozy cha phopizy hry liata papai aw na ta, râh to liata ei papai aw.

13 “Abeipa KHAZOHPA chata he tana heta tah tlôh ta: Kô sypalih tawhna chata amâ paihna chyhsazy tawhtapa Izi mozy cha ei pakhy heih aw:

14 Izi mozy seichâna palie aw na ta, ama pina râh, Pathrô râh lâta ei pakuasa aw; cha liana chata a nawhpa ta ama beih aw.

15 Khihnarâh nawh chaipa a châ aw, phopizy hry liata a palai khoh hra aw vei; pho hropa chô liata bie a hnei khao lei nawpa ta âmo ei pachy aw.

16 Âmo lâ a heihpa maihta ama hmoparaona amâ thei heihpa vâta Izarel chhôhkhazy ngâna châ khao aw vei. Chatanachata Abeipa KHAZOHPA cha ei châ tahpa ama pahno aw,” tah ta.

17 Kô syno nata kô sarina, thla hmiatuapa, cha thla noh kha noh liana chata ABEIPA bie cha ei hnohta vaw tlô heih ta:

18 “Chyhsa y, Babylaw beipa Nebukareza chata Tyre chô liata rai rôhnah ngaitapa hria awpa ta a pheisaih hri cha pahriasa ta; chyhsa to luhzy cha pôlô pa khai ha ta, chyhsa ngiatlâh cha a hliapa khei ha hra ta; châhrasala ano nata a pheisaih hri chhaota ama raihria liana chata Tyre tawhta a thôhna khâpa hmah hmô hlei veih ei.

19 Chavâta Abeipa KHAZOHPA chata he tana heta a tah: Izi râh cha Babylaw beipa Nebukareza hnohta pie aw na ta; a hmo hneirôhpazy cha la aw ta, hrao aw ta, hraona châta a lapa aw; cha cha a pheisaih hrizy hlao cha a châ aw.

20 Eina chakaopa vâta Izi râh he ama hlao châta ei pie, keima châta ama hriapa vâta Abeipa KHAZOHPA chata a tah.

21 “Cha noh liana chata Izarel chhôhkhazy chata ki pathaosa aw na ta, âmo hry liana chata na pakah ei pa-âsa aw. Chatanachata ABEIPA cha ei châ tahpa ama pahno aw,” tahpa ta.