Ezekiel 30

¹ ABEIPA bie cha ei hnohta vaw tlô heih ta:

² “Chyhsa y, chhochhielie la, Abeipa KHAZOHPA chata he tana heta a tah: “Sâh chaimâh teh u, cha noh ngaita rimâ cha!

³ Noh â hnia na, ABEIPA noh cha â hnia na; meihdo zohna noh, phopizy châta raona awpa.

⁴ Izi liata zaozi a tlô aw, Ethiôpia liata pasana ru kawpa, Izi liata chyhsa thihpa paopa ta, a hneirôna lapa ta, a bohna zy paraopa ta a y aw.

⁵ Ethiôpia, Puta, Luda pho to chyhsa pahlaopazy cha Kuba nata bie a paraohpa râh chyhsa zydua âmo hnohta zaozi ta ama pao aw.

⁶ “ABEIPA chata he tana heta a tah: Izi a paduatuhpazy chhao kha ama pao aw, a thatlôna a palai tyhpa chhao kha a nawh aw; Mikdôl tawhta Syene taihta zaozi ta ama pao khai aw, Abeipa KHAZOHPA ta a tah.

⁷ Râh rory pahra hawpazy hry liata roryhrapa ta y aw ta, a khihpizy chhao cha khihpi ry hawpazy hry liatahpa ama châ aw.

⁸ Izi râh liata mei patih na ta, a baotuhpa zydua ei pahleipadia tina chata ABEIPA cha ei châ tahpa ama pahno aw.

⁹ “Cha noh liana chata Ethiôpia chyhsa a pachâ leipa sahlaozy riah pachhie awpa ta ei tawhtapa chyhsa tuapa balyh ta sie aw ei ta; Izi noh hawhta pathipalôh nôpo ngaitana ama chô liata a tlô hra aw; pachâ teh, a tlô hai na!

¹⁰ “Abeipa KHAZOHPA chata he tana heta a tah: Babylaw beipa Nebukareza ku ta Izi hmo hneirôna zy cha ei pahlei aw.

¹¹ Râh parao awpa ta ano nata a sahlaozy, phopizy hry liata chichhih ngaitapazy cha patlôsapa ama châ aw; Izi chhôh liata ama zaozi hmâh aw ei ta, râh cha chyhsa ri ta ama pabie aw.

¹² Chatawhcha Nile cha pakua aw na ta, râh cha moleipazy hnohta ei zuah aw; a râh nata a chhôh liata a ypa zydua cha khichhaipazy ku ta rory ei pahrasa aw; kei ABEIPA heta ei reih haw.

¹³ “Abeipa KHAZOHPA chata he tana heta a tah: Khazoh nohthlahpazy cha parao awna ta, Memphi liatahpa khazoh nohthlahpazy cha ei pahleipadia aw; Izi liata abeisaw rai y khao aw veih ei; chatawhcha Izi râh liana chata china ei paysa aw.

¹⁴ Pathrô cha rory pahrasa aw na ta, Zôâna liana chata mei papua aw na ta, Thebe liana chata ei bie ei patlô aw.

¹⁵ Chatawhcha Izi kuh Pelusia chô liata ei hiehâhpa lei thlu aw na ta, Thebe liata zawpizy cha ei chhaw pathla.

¹⁶ Chatawhcha Izi liana chata mei papua aw na ta, Palusia cha nôpo ngaitapa ta y aw ta; Thebe cha a cho khai aw, Memphi chata nohchhô ta khakhaipa kha a hnei aw.

¹⁷ Ôna nata Pibese satliapazy cha zaozi ta pao aw ei ta; cha khihzy cha seichâna ta a chhipa ta ama y aw.

¹⁸ Izi raopakypa ei thlie na ta, a thatlôna a palaikhei tyhpa ei pachhâsa tina chata, Tehaphanehe liana chata noh a zoh aw, ano cha meihdo ta pahli aw ta. a sawchanôzy cha seichâna ta a chhipa ta ama y aw.

¹⁹ He hawhna heta Izi râh liata pachiana ei tao aw. Chatanachata kei he ABEIPA ei châ tahpa ama pahno aw,” tahpa ta.

²⁰ Kô hrawhleikhana, thla hmiatuapa, cha thla noh sari noh liana chata ABEIPA bie cha ei hnohta vaw tlô ta:

²¹ “Chyhsa y, Izi beipa Phirao bâh cha thlie na ta: zaozi chaba awpa ta a tha a tlô heih nawpa ta thohna hniapa nata chahrypa cha châ vei.

²² Chavâta Abeipa KHAZOHPA chata he tana heta a tah: Izi beipa Phirao cha ei dyuh, a bâ a phana lâ nata a thlie chiehna lâ chhao thlie aw na ta; a ku liatahpa zaozi cha ei pathlasa aw.

²³ Izi mozy cha phopizy hry liata hie patla aw na ta, râh to liata ei papaisa khai aw.

²⁴ Chatawhcha Babylaw beipa bâhzy tha patlô aw na ta, a ku liata zaozi chabasa aw na ta; Phirao bâhzy deikua cha thlie aw na ta, a hmiakô liana chata thi kheina taihta hmahphaohpa â rohpa hawhta a roh aw.

²⁵ Babylaw beipa bâhzy cha tha patlô aw na ta, Phirao bâhzy deikua cha a bangie aw; Babylaw beipa ku liata ei zaozi chabasa na ta, Izi beipa chô liata a hmâh tina chata, kei he ABEIPA ei châ tahpa ama pahno aw;

²⁶ chatawhcha Izi mozy cha phopizy hry liata râh to liata hie patla aw na ta, papaisa khai aw na ta. Chatanachata ABEIPA cha ei châ tahpa ama pahno aw,” tahpa ta.