Ezekiel 29

¹ Kô hrawhna, thla hrawhna, cha thla noh hrawhleinona liana chata ABEIPA bie cha ei hnohta vaw tlô ta:

² “Chyhsa y, Izi beipa Phirao ahei hnao la, a chô liata nata Izi mo zydua chô liata chhochhielie teh;

³ reih la, Abeipa KHAZOHPA chata he tana heta a tah: “Pachâ teh, Izi beipa Phirao, chavahzy liah liata tisadâh rarôhypa, ‘Ei Nile he kei eih a châ, keima chata tlai ei tao, ’a tahtuhpa, ei châ dyuh na.

⁴ Na kâ ru liata zy keipa cha pa-ao aw na ta, chavah liata ngazy cha na phuhlupa liata pabaisa aw na ta; na chavah liahliah tawhtapa na phuhlupa liata na chavah nga a baipa zydua chhaota ei châ daophi aw.

⁵ Chatawhcha râhpathohpa liata cha thy aw na ta, nâ nata na chavah liata nga zydua chhao cha; râhhmâhpa liata tlâh aw chi ta, na ri a huapa châ leipa aw ta, pabupa châ hra aw va chi. Sahrâpazy nata pavawzy hnohta niepa châta ei cha pie aw.

⁶ “Izarel chhôhkhapazy chata lothi chôhchahrei dei ama vaw châ hawpa vâta Izi râh liata a pahrâpa zydua zy chata, kei he ABEIPA ei châ tahpa ama pahno aw;

⁷ ku ta ama cha patu nota tlie chi ta, ama ngiatlâh liata chhôpa ta hrie chi ta, cha hnie ei ta, tlie chi ta, ama chaizy cha na chalyusa;

⁸ chavâta Abeipa KHAZOHPA chata he tana heta a tah: Na chô liata zaozi vaw patlôsa aw na ta, nâ tawhtapa chyhsa nata sa ei pahleipadia khai aw;

⁹ chatawhcha Izi râh roryhrapa nata ryhpa a châ aw. Kei he ABEIPA ei châ tahpa ama pahno aw.“‘Nile he keima eih châ ta, ei taopa cha na tahpa vâta,

¹⁰ chavâta cha dyuh na ta, na chavah chhao Syene o sâhpa tawhta Ethiôpia râhri taihta Izi râh cha a ryhpa hmeihseihpa nata roryhrapa ta ei tao aw.

¹¹ Chyhsapa phei ta tly beih leipa aw ta, sazy chhao sie beih hra aw veih ei; kô sypalih chhôh chhaota pahrâpa ta y hra aw vei.

¹² Chatawhcha Izi râh cha râh roryhrapazy hry liata roryhrapa miakha ta tao hra aw na ta; a khihpizy cha khihpi rypa zy hry liata kô sypalih rypa ta a y aw. Izi mozy cha phopizy hry liata papai aw na ta, râh to liata ei papai aw.

¹³ “Abeipa KHAZOHPA chata he tana heta tah tlôh ta: Kô sypalih tawhna chata amâ paihna chyhsazy tawhtapa Izi mozy cha ei pakhy heih aw:

¹⁴ Izi mozy seichâna palie aw na ta, ama pina râh, Pathrô râh lâta ei pakuasa aw; cha liana chata a nawhpa ta ama beih aw.

¹⁵ Khihnarâh nawh chaipa a châ aw, phopizy hry liata a palai khoh hra aw vei; pho hropa chô liata bie a hnei khao lei nawpa ta âmo ei pachy aw.

¹⁶ Âmo lâ a heihpa maihta ama hmoparaona amâ thei heihpa vâta Izarel chhôhkhazy ngâna châ khao aw vei. Chatanachata Abeipa KHAZOHPA cha ei châ tahpa ama pahno aw,” tah ta.

¹⁷ Kô syno nata kô sarina, thla hmiatuapa, cha thla noh kha noh liana chata ABEIPA bie cha ei hnohta vaw tlô heih ta:

¹⁸ “Chyhsa y, Babylaw beipa Nebukareza chata Tyre chô liata rai rôhnah ngaitapa hria awpa ta a pheisaih hri cha pahriasa ta; chyhsa to luhzy cha pôlô pa khai ha ta, chyhsa ngiatlâh cha a hliapa khei ha hra ta; châhrasala ano nata a pheisaih hri chhaota ama raihria liana chata Tyre tawhta a thôhna khâpa hmah hmô hlei veih ei.

¹⁹ Chavâta Abeipa KHAZOHPA chata he tana heta a tah: Izi râh cha Babylaw beipa Nebukareza hnohta pie aw na ta; a hmo hneirôhpazy cha la aw ta, hrao aw ta, hraona châta a lapa aw; cha cha a pheisaih hrizy hlao cha a châ aw.

²⁰ Eina chakaopa vâta Izi râh he ama hlao châta ei pie, keima châta ama hriapa vâta Abeipa KHAZOHPA chata a tah.

²¹ “Cha noh liana chata Izarel chhôhkhazy chata ki pathaosa aw na ta, âmo hry liana chata na pakah ei pa-âsa aw. Chatanachata ABEIPA cha ei châ tahpa ama pahno aw,” tahpa ta.