2 Thatihzy Rona 27

Study

          |

1 Zawtha cha a bei tua no ta kô syno nata kô pangawh châ ta, Zerusale liata kô hrawhleicharu a bei ta. A nô moh cha Zerusah, Zadôka sawchanônô a châ.

2 A paw Uziah hmotaopa hawhpa maih tao hra ta, ABEIPA mohmô liata hmo phapa tao tyh ta, ABEIPA achhyna-o liata deikua cha a ngia vei. Châhrasala chyhsa zy chata hmo pha lei ngaitapa tao tyh ei ta.

3 ABEIPA o cha ochhi machhua lâta tao ta, Ôphel kuh chô liata a hluhpi sa hra ta.

4 Zudah tlâh râh liata khihzy sa ta, lyurâhpa liata o rôhnah ngaitapa zy, o sâhpa zy sa hra ta.

5 Amawna pathlazy abei adyuh ta, pahnie ta. Amawna pathlazy chata cha kô liata tâkâ talent za kha nata sâh phao thy kha nata bali sâh phao thy kha pie ei ta, cha hawhna hra chata Amawna pathlazy chata a kô nona nata a kô thôhna liata chhao pie ei ta.

6 Chatanachata Zawtha chata ABEIPA a Khazohpa hmiakô liata a pha ngaitapa ta a taopa vâta a tha vaw tlô ta.

7 Zawtha hmotaopa a hropa zydua a chariah adyuhpa zydua zy, a yzie zydua zy cha Izarel nata Zudah beizy thâtih rona châbu liata ropa ta a y.

8 A bei tua nota kô syno nata kô pangawhpa châ ta, Zerusale liata kô hrawhleicharu a bei ta.

9 Zawtha cha a mahpaw zy hnohta a mô ta, Davi khihpi liata pabu ei ta; a sawchapawpa Ahaza cha ano vyuhpa ta a bei haw.