1
Zudah chyhsa zydua chata kô hrawhleicharupa Uziah cha a chhi ei ta, a paw Amaziah vyuhpa ta abei ta tao ei ta.
2
Ano chata abeipa cha a mahpawzy hnohta a mô tawhta Elo khih cha padua pathi ta, Zudah râh liata pahlao heih ta.
3
Uziah cha a bei tua nota kô hrawhleicharupa châ ta, Zerusale liata kô sypangawh nata kô no a bei ta. A nô moh cha Zekôliah, Zerusale chyhsa châ ta.
4
A paw Amaziah hmotaopa hawhpa maih tao hrapa ta, ABEIPA mohmô liata hmo pha ngaitapa tao tyh ta.
5
Khazohpa aluahna a pahno thaipa Zekaria hro chhôhta Khazohpa tlua awpa ta tao ta; ABEIPA a tlua chhôh zydua cha Khazohpa ta thlao pachhisa lymâ ta.
6
Philistina mo hrao awpa ta pua ta, Katha kuh zy, Zabne kuh zy, Asadô kuh zy pacho ta; Asadô râh liata nata Philistina mo hry liata khihzy tao ta.
7
Khazohpa ta Philistina mozy liata nata Kurbaal liata a ypa Arabia mo nata Meuni mozy liata bao ta.
8
Amawna mozy chata Uziah liana chata chhie cheih tyh ei ta, chatanachata Izi râh taihta a moh cha pathâh lymâ ta, thatlô ngaitapa a châpa vâta.
9
Uziah chata Zerusale liata Ki Chhikao liata zy, Saikao Chhikao liata zy, Pakohna Chhikao liata zy, o sâhpa sa hra ta, kuh ta dôh ta.
10
Chatawhcha râhpathohpa liata chhao o sâhpa sa ta, sahroh hluhpi a hneipa vâta, ti pa-ona a hluhpi chao ta, Shephela nata bypi zy liata chhao, chatawhcha lyu a taopa zy nata kresawti a saohpa zy, tlâh lâ nata râh phapa zy liana chata hnei ta, lyu taona kyh lâta a pasô ngaitapa a châ.
11
Uziah chata adyuhpa pheisaih, abeipa pheisaih hyutuhpa Hananiah ry liata chârohtuhpa Zeiel nata hyutuhpa Maasei zy ta ama raopa lymâ hawhta a hlao a hlaota chariah adyuhpa hnei hra ta.
12
Chyhsa thatlôpa, riahphapa sai ama chhôhkha pawhrâhpa zydua cha sâh no nata za charu châ ei ta.
13
Ama ry liana chata pheisaih achupa a thai chiehpa sai thy sythôh nata sâh sari nata za pangawh, khakhaipa liata abeipa baotuhpa chariah adyuhpa hmeihseihpa y ei ta.
14
Uziah chata pheisaih zydua châta vyhphao zy, asei zy, thua lakhu zy, thua viahpakao zy, libaw zy, a vaw nawpa ta alô zy a chhuahnoh ta.
15
Zerusale liata o sâhpa nata kuh ki tôh liata sopa ta châtai kana nata alô laipa zy ta vaw nawpa ta chyhsa sopa zy pahnopa hmo zy tao ta. A moh cha râh to lâta pathâh ta, a thatlô ngaitana taihta noâhchhipa ta baopa ta y ta.
16
Châhrasala thatlôpa ta a y tawhna chata a palôhrupa a vaw sâh haw ta. Hmo pha lei ngaitapa ta tao ta, ABEIPA a Khazohpa chô liata hmo parao ha ta, maisâh liata rohpahâh rao awpa ta ABEIPA achhyna-o liata a ngia ta.
17
Theihthaipa Azariah chata zi ta, chyhsa riahpha ngaitapa ABEIPA theihthaipa sycharie a hlao hra ei ta;
18
Abei Uziah cha pakhâ ei ta, a hnohta, “Uziah y, ABEIPA chata rohpahâhpa raopa he na tao awpa châ leipa ta, rohpahâhpa rao awpa ta pananopa Arawna sawchapawpa theihthaipa zy tao awpa tlao a châ na. Supathaihpa tawhtapa he pua teh, hmo na parao he, ABEIPA na Khazohpa liata na rôhnah nawpa chhao châ vei,” tah ei ta.
19
Uziah cha a pathi-ia ta. Rohpahâhpa rao nawpa ta mei lana chaba ta, chatawhcha theihthaipa zy chô liata a pathi a ia ngaita nona chata ABEIPA o liata rohpahâhpa raona kiapâh liata theihthaipa zy hmiakô liata a khi liata aphawhpa hri vaw pua haw ta.
20
Chatawhcha theihthaipa beichaipa Azariah nata theihthaipa zydua chata moh ei ta, a khi liana chata phawhpa hri vaw y ta! Chatawhcha thlai papua ei ta, ABEIPA ta a hriepa vâta ano chhao a parah ngaitapa ta pua haw ta.
21
Chatawhcha Abei Uziah cha a thi no taihta phawhpa ta y ta, a phawhpa vâta o nano liata y ta. ABEIPA o tawhtapa cha papuapa ta y haw ta. Chatanachata a sawchapawpa Zawtha cha ama râh liata chyhsa zy ryureipa ta abei o liata ryureituhpa ta y haw ta.
22
Uziah hmotaopa hropa zydua cha a thaona tawhta a chhâna taihta, Amôza sawchapawpa hrohsopa Isai ta roh ta.
23
Uziah cha a mahpaw zy hnohta a mô ta, abei pabuna su liata a mahpaw zy hry liata pabu ei ta, “Ano la a phawhpa châ tlôh ta.” tah ei ta. Chatawhcha a sawchapawpa Zawtha cha ano vyuhpa ta abei haw ta.
