1 Samuel 24

¹ Philistina mozy a kei chadaipa a vaw kuapa cha, “Pachâ teh, Davi cha Engedi râhpathohpa liata a y,” tahpa ta chho ei ta.

² Sawla chata Izarel chyhsa zydua hry tawhtapa â tlypa chyhsa sâh thôh a chhi ta, sathaw zy pahrâna lôpanô hry lâna chata Davi nata a chyhsa zy tlua awpa ta sie haw ei ta.

³ Lâpi liata mietahkupa sahdô lôpu yna kei tlô ta; Sawla cha a pahâ awpa ta a kei ngia ta. Davi chyhsa zy chata a hnohta.

⁴ “ABEIPA ta na hnohta, ‘Pachâ teh, na khakhaipa cha na ku liata pie aw na ta, a chô liata a pha na tahpa hawhta tao mah y,’ a tahpa noh kha a châ haw hih,” tah ei ta. Davi cha thyu ta, a ru lâta Sawla poh pai cha a tai.

⁵ Ataviapa ta cha Sawla poh pai a kei âpa vâna chata Davi cha a chhôh khai kaw ta.

⁶ A chyhsa zy hnohta, “ABEIPA sathaw a thupa a châ tahpa ei beipa chô liata he hmo ei taopa he a zie rai châ vei,” tah ta.

⁷ Davi ta cha biezy chata a chyhsa zy khâchâ pakhâ ta, Sawla adyuh awpa ta ama pua awpa cha pasaih khao leipa ta. Chatawhcha Sawla cha lôpu tawhtapa cha pua ta, sie haw heih ta.

⁸ A hnôh lâna chata Davi chhao cha thyu ta, lôpu tawhtapa cha pua ta, “Abeipa, ei beipa y!” tahpa ta Sawla cha aw ta; Sawla a vaw heih nahta Davi chata alei lâ a khupa ta a naoh ta.

⁹ Davi chata Sawla hnohta, “Pachâ teh, Davi ta na chhiena a tlua,’ tahpa ta chyhsa zy ta na hnohta ama reipa cha khazia na zo tyh.

¹⁰ Atanoh he ABEIPA ta lôpu liana heta ei ku liata a cha hlâna zie he na mo tlaita hmô chi ta; thokha chata cha thie awpa ta na chho ei ta, châhrasala cha pahlôh na ta, ‘Ei beipa chô liata ei ku rai hy aw va na, ABEIPA sathaw thupa châ tlôh ta,’ tah na ta.

¹¹ Cha dei chhao châ leipa ta, ei pâ y, moh tua, na poh pai chhao ei chaba thlâh ha hih; na poh pai a thei tlôh na ta, ei cha thie leipa liana heta” ei ku liata hmo pha leipa nata paraona y vei. Ei hrona la a chhuahpa ta na tlua ngâ hra la, na chô liata molei va na tahpa pahno tlai teh.

¹² ABEIPA ta nâma nata keima kyh he pachia sala, ABEIPA chata nâma liata phuh na lapa mawh sy; kei ta na chô liata ei ku pathla chachei ta aw va na.

¹³ Hlâno bieso ta, ‘Moleipa tawhta moleina pua tyh ta,’ tah ta; châhrasala na chô liata ei ku pathla aw va na.

¹⁴ Izarel abeipa cha ahy tluapa ta e a vaw pua? Ahy nâ chadai? I thi chiehpa! Ihli dei.

¹⁵ Chavâta ABEIPA cha pachiatuhpa châ sala, nâma nata keima kyh he pathlu sala, na pachâpa sala, na reikhei sala, na ku tawhtapa na pachha mawh sy,” tah ta.

¹⁶ Davi ta Sawla hnohta he biezy he a rei khai nahta, Sawla ta, “Na ao ma a châ, ei sawchapawpa Davi?” tah ta. Chatawhcha Sawla cha aoh tlili ta cha ta. Davi hnohta, “Kei hlâta cha na sia via ngaita; nâ la ei chô liata hmo phapa tao chi ta, kei deikua chata hmo pha leipa ei tao.

¹⁸ Atanoh he ei chô liata hmo phapa na taona zie na palâsa haw. ABEIPA ta na ku liata eina piepa chhaota eina thie leipa chi liana heta.

¹⁹ Chyhsa ta a khakhaipa hmô sala a phapa ta a papua khoh aw ma? Chavâta atanoh ta ei chô liata na hmotaopa liana heta ABEIPA ta hmo phapa ta cha thô mawh sy.

²⁰ Abei châ tlai aw chi ta, Izarel khihnarâh cha na ku liata pa-ipa ta a y aw tahpa ei pahno haw.

²¹ Chavâta ei hnôh lâta ei pathlazy a vaw y awpa zy cha pahleipadia lei awpa nata ei paw chhôhkhapa hry tawhtapa ei moh pahlei lei awpa ta ABEIPA moh ta kei lâta chhiesa teh,” tah ta.

²² Davi cha Sawla lâta chhiesa ta. Sawla cha a di haw ta. Davi nata a chyhsa zy deikua cha kuh lâna chata khy haw ei ta.